மக்களவையில் தொடரும் கூச்சல், குழப்பம்! எதிர்க்கட்சிகள் தொடர் அமளி! முடங்கும் நடவடிக்கைகள்!

லோக்சபா மீண்டும் முடங்கியது! ராகுல் காந்தியை பேச அனுமதிக்க கோரி எதிர்க்கட்சி எம்பிக்கள் அமளியில் ஈடுபட்டதால், இன்று (பிப்ரவரி 10) சபை பிற்பகல் 2 மணி வரை ஒத்திவைக்கப்பட்டது. சபையில் கூச்சல், கோஷங்கள், குழப்பம் நிலவியது.

பாராளுமன்ற பட்ஜெட் கூட்டத் தொடர் ஜனவரி 28-ஆம் தேதி ஜனாதிபதி திரவுபதி முர்மு உரையுடன் தொடங்கியது. பிப்ரவரி 1-ஆம் தேதி 2026-27 நிதியாண்டுக்கான மத்திய பட்ஜெட் தாக்கல் செய்யப்பட்டது. ஜனாதிபதி உரைக்கு நன்றி தெரிவிக்கும் தீர்மான விவாதத்தில் ஆளும் மற்றும் எதிர்க்கட்சி எம்பிக்கள் பேசினர்.

எதிர்க்கட்சித் தலைவர் ராகுல் காந்தி, முன்னாள் ராணுவ தளபதி ஜெனரல் எம்.எம். நரவனேயின் வெளியாகாத சுயசரிதை புத்தகம் "Four Stars of Destiny" இலிருந்து பகுதிகளை மேற்கோள் காட்டி பேச முயன்றார். இது 2020 லடாக் சீன எல்லை மோதல் தொடர்பான விவரங்களை உள்ளடக்கியது. சபாநாயகர் ஓம் பிர்லா வெளியாகாத புத்தகத்தை மேற்கோள் காட்டக் கூடாது என கண்டித்தார். ரூல் 349-ஐ மேற்கோள் காட்டி ராகுலை தடுத்தார்.

இதையும் படிங்க: இது ரவுடித்தனம் பண்ணுற இடமில்லை!! ராகுல் பிடிவாதம்தான் காரணம்! கிரண் ரிஜிஜூ கொந்தளிப்பு!

இதனால் கடந்த பிப்ரவரி 2 முதல் எதிர்க்கட்சி எம்பிக்கள் சபையை முடக்கி வருகின்றனர். ராகுலை பேச அனுமதிக்க வேண்டும் என கோரி தொடர் அமளி நடத்துகின்றனர். இன்றும் சபை கூடிய உடனே அமளி தொடங்கியது. கோஷங்கள், சுவரொட்டிகள் காட்டுதல் ஆகியவற்றால் சபை செயல்படவில்லை. இதனால் பிற்பகல் 2 மணி வரை ஒத்திவைக்கப்பட்டது.

இந்நிலையில் எதிர்க்கட்சிகள் சபாநாயகர் ஓம் பிர்லா ஒருதலைபட்சமாக செயல்படுவதாக குற்றஞ்சாட்டி, அவருக்கு எதிராக நம்பிக்கையில்லா தீர்மானம் கொண்டு வர முடிவு செய்துள்ளன. காங்கிரஸ் தலைமையில் இந்தியா கூட்டணி இதற்கான நோட்டீஸ் தயாரித்து வருகிறது. விரைவில் தீர்மானம் சபையில் கொண்டு வரப்படலாம் என எதிர்பார்க்கப்படுகிறது. இது சபாநாயகருக்கு பெரும் நெருக்கடியை ஏற்படுத்தும்.

பட்ஜெட் விவாதம் தொடங்காமலேயே சபை முடங்கியுள்ளது. எதிர்க்கட்சிகள் ராகுலை பேச அனுமதிக்காவிட்டால் தீர்மானத்தை நகர்த்துவோம் என உறுதியாக உள்ளன. இந்த சம்பவம் பாராளுமன்றத்தில் ஆளும் - எதிர்க்கட்சி மோதலை மேலும் தீவிரப்படுத்தியுள்ளது. பட்ஜெட் விவாதம் எப்போது தொடங்கும் என்பது இப்போது கேள்விக்குறியாக உள்ளது.

இதையும் படிங்க: 3வது நாளாக தொடரும் அமளி!! லோக்சபா ஒத்திவைப்பு! பிப்.,9 காலை வரை ஒத்திவைத்து ஓம்பிர்லா அறிவிப்பு!