போராட்டத்தில் குதித்த லயோலா கல்லூரி மாணவர்கள்... கொதிக்கும் தமிழகம்.. ரத்தாகுமா நீட்..?

நீட் தேர்வு அறிமுகப்படுத்தப்பட்ட காலத்திலிருந்தே தமிழகம் அதற்கு வலுவான எதிர்ப்பை பதிவு செய்து வருகிறது. மருத்துவக் கல்வியில் மாநில அளவிலான தகுதித் தேர்வுகளை நடத்தி, சமூக நீதி அடிப்படையில் இட ஒதுக்கீடு மற்றும் கிராமப்புற மாணவர்களின் வாய்ப்புகளை உறுதி செய்து வந்த தமிழகத்துக்கு, தேசிய அளவிலான இந்தத் தேர்வு பெரும் சுமையாகவும், ஏற்றத்தாழ்வுகளை அதிகரிக்கும் கருவியாகவும் கருதப்படுகிறது. குறிப்பாக, பயிற்சி மையங்களின் வணிகமயமாக்கல், கிராமப்புற மற்றும் அரசுப் பள்ளி மாணவர்களுக்கு ஏற்படும் பாதகம், மாணவர்களின் மன அழுத்தம் மற்றும் சில சமயங்களில் தற்கொலை போன்ற விளைவுகள் ஆகியவை எதிர்ப்புக்கான முக்கிய காரணங்களாக இருந்து வருகின்றன. 

தமிழக அரசியல் கட்சிகளில் பெரும்பாலானவை நீட்டுக்கு எதிராக நிலைப்பாடு எடுத்துள்ளன. முன்னாள் முதலமைச்சர் மு.கருணாநிதியின் காலத்திலிருந்து தொடரும் இந்த எதிர்ப்பு, மு.க.ஸ்டாலின் தலைமையிலும் தொடர்கிறது. தமிழக சட்டமன்றம் பல முறை நீட் விலக்கு கோரி தீர்மானம் நிறைவேற்றியுள்ளது. 2021-ஆம் ஆண்டு நீட் விலக்கு மசோதா நிறைவேற்றப்பட்டும், மத்திய அரசு அதை ஏற்கவில்லை. தற்போதைய ஆளும் தமிழக வெற்றிக் கழகம் உள்ளிட்ட பல கட்சிகளும் நீட்டை ஒழிக்க வேண்டும் என்று வலியுறுத்தி வருகின்றன. பாஜக மட்டும் இதற்கு ஆதரவாக இருக்கும் நிலையில், மற்ற கட்சிகள் ஒன்றிணைந்து எதிர்க்கின்றன.

2026-ஆம் ஆண்டு நீட் தேர்வில் ஏற்பட்ட பேப்பர் லீக் போன்ற முறைகேடுகள், தேர்வு ரத்து, மறுதேர்வு மற்றும் அதனால் ஏற்பட்ட மாணவர் மரணங்கள் ஆகியவை நாடு முழுவதும் பெரும் கொந்தளிப்பை ஏற்படுத்தின. டெல்லியில் ஜந்தர் மந்தரில் தொடங்கிய மாணவர்கள் போராட்டம் குறிப்பாக Cockroach Janata Party தலைமையிலான இளைஞர் இயக்கம் கல்வி அமைச்சர் தர்மேந்திர பிரதான் பதவி விலகல், தேர்வு முறைகேடுகளுக்கு உரிய விசாரணை, நீட் ஒழிப்பு உள்ளிட்ட கோரிக்கைகளுடன் தீவிரமடைந்தது. போலீஸ் நடவடிக்கை, போராட்டக்காரர்கள் மீதான தாக்குதல் போன்ற சம்பவங்கள் இந்தப் போராட்டத்தை மேலும் பரவலாக்கின. 

இதையும் படிங்க: தலைநகரை கடந்து பரவிய போராட்ட ’தீ’... தமிழகத்தில் திரும்பிய திசையெல்லாம் தகிக்கும் மாணவர்கள் போராட்டம்...!

இந்த டெல்லி போராட்டத்தின் எதிரொளியாக தமிழகத்திலும் மாணவர்கள் தீவிரமாகக் களமிறங்கினர். சென்னை, கோயம்புத்தூர், மதுரை உள்ளிட்ட இடங்களில் SFI, DYFI, Youth Congress உள்ளிட்ட அமைப்புகள் சார்பில் உட்கார்ந்து போராட்டம், ஃப்ளாஷ் மொபைல் போராட்டங்கள், பேரணிகள் நடைபெற்றன. பல இடங்களில் மாணவர்கள் கைது செய்யப்பட்டனர். பல்வேறு கல்லூரிகளில் மாணவர்கள் தங்கள் போராட்டங்களை முன்னெடுத்து வருகின்றனர். சென்னை லயோலா கல்லூரியில் மாணவர்கள் உள்ளிருப்பு போராட்டம் நடத்தி வருகின்றனர். நீட் தேர்வை ஒழிக்க வேண்டும் என்றும் மத்திய கல்வி அமைச்சர் தர்மேந்திர பிரதான் பதவி விலக வலியுறுத்தியும் வகுப்புகளை புறக்கணித்து உள்ளிருப்பு போராட்டத்தை மேற்கொண்டு உள்ளனர். மேலும் நீட் தேர்வுக்கு எதிராக கண்டனம் முழக்கங்களை எழுப்பி வருகின்றனர். தமிழகத்தில் மாணவர்கள் நீட் எதிர்ப்பு போராட்டத்தை நடத்தி வருவது அதிர்வலைகளை ஏற்படுத்தி உள்ளது. 

இதையும் படிங்க: என்ன CM.. பாஜகவுக்கு விசுவாசமா.? ஆதரவும், கைதும்..! அப்பாவு விமர்சனம்..!!