கேஸ் சிலிண்டர் Shortage..!! இண்டக்ஷன் ஸ்டவ்களை வாங்க முண்டியடிக்கும் மக்கள்..!! ஆன்லைனிலும் காலி..!!

ஈரான்-இஸ்ரேல்-அமெரிக்கா இடையேயான மோதல் காரணமாக ஹார்முஸ் ஜலசந்தி வழியான எல்பிஜி இறக்குமதி பாதிக்கப்பட்டுள்ளது. இதனால் இந்தியாவில் எல்பிஜி சிலிண்டர் தட்டுப்பாடு ஏற்பட்டு, வீட்டு உபயோகத்திற்கு முன்னுரிமை அளிக்கப்பட்ட நிலையில் வணிக சிலிண்டர்கள் விநியோகம் பல இடங்களில் நிறுத்தப்பட்டுள்ளது.

மெட்ரோ நகரங்களான சென்னை, மும்பை, டெல்லி, பெங்களூரு, கொல்கத்தா உள்ளிட்ட பகுதிகளில் ஹோட்டல்கள், உணவகங்கள் கடுமையாக பாதிக்கப்பட்டுள்ளன. பல உணவகங்கள் மெனுவை குறைத்து இட்லி, சப்பாத்தி, டீ போன்ற எளிய உணவுகளை மட்டும் வழங்கி வருகின்றன. சில இடங்களில் தற்காலிகமாக கடைகளை மூடும் நிலை ஏற்பட்டுள்ளது. ரயில்வே நிலைய உணவகங்களுக்குக் கூட இண்டக்ஷன் ஸ்டவ் அல்லது மைக்ரோவேவ் பயன்படுத்த அறிவுறுத்தப்பட்டுள்ளது. 

எல்பிஜி விலை உயர்வு காரணமாக (சில நகரங்களில் ரூ.60 முதல் ரூ.115 வரை அதிகரிப்பு) மக்களிடையே பதற்றம் அதிகரித்துள்ளது. கருப்பு சந்தையில் சிலிண்டர்கள் ரூ.2000-3000 வரை விற்பனையாகும் என்ற அச்சம் பரவியுள்ளது. வீட்டு சிலிண்டர்களுக்கு கூட சில இடங்களில் 25 நாட்களுக்கு ஒருமுறை மட்டுமே புக் செய்ய அனுமதி வழங்கப்பட்டுள்ளது.

இதையும் படிங்க: மக்களே.. இனி வீட்டு சாப்பாடு தான்..!! ஹோட்டல்களுக்கு ஆப்படித்த ஈரான் போர்..!! விலை எல்லாம் தாறுமாறா ஏறப்போகுது..!!

இந்நிலையில், மக்கள் மாற்று வழியாக இண்டக்ஷன் ஸ்டவ்களை அதிக அளவில் வாங்கி வருகின்றனர். சென்னை, திண்டுக்கல் உள்ளிட்ட தமிழ்நாட்டு பகுதிகளிலும் இதே போக்கு காணப்படுகிறது. வழக்கமான நாட்களில் ஒரு கடையில் 40 அடுப்புகள் விற்பனையாகும் நிலையில், தற்போது 130க்கும் மேற்பட்ட அடுப்புகள் விற்கப்படுகின்றன – அதாவது 3-4 மடங்கு அதிகரிப்பு.

ஆன்லைன் தளங்களான Flipkart, Amazon போன்றவற்றில் இண்டக்ஷன் ஸ்டவ் விற்பனை 4 மடங்கு முதல் 30 மடங்கு வரை உயர்ந்துள்ளது. Quick commerce ஆப்-களான Blinkit, Zepto, Swiggy Instamart, BigBasket ஆகியவை பல நகரங்களில் இண்டக்ஷன் ஸ்டவ்களை "Sold Out" அல்லது "Unavailable" எனக் காட்டுகின்றன. ஏற்கனவே வீடுகளில் இண்டக்ஷன் ஸ்டவ் வைத்திருந்து பயன்படுத்தாமல் பரணில் வைத்திருந்தவர்கள் தற்போது தூசு தட்டி சர்வீஸ் சென்டர்களுக்கு எடுத்துச் செல்கின்றனர். இதனால் சர்வீஸ் சென்டர்களிலும் கூட்டம் அதிகரித்துள்ளது.

இண்டக்ஷன் ஸ்டவ்கள் எல்பிஜியை விட பல வகைகளில் சிறப்பானவை. மின்காந்த புலத்தால் பாத்திரத்தை நேரடியாக சூடாக்குவதால் சமைப்பது வேகமாக நடக்கும். ஆற்றல் திறன் அதிகம் – கேஸை விட சுமார் இரு மடங்கு சேமிப்பு. பாதுகாப்பு அதிகம்; தானியங்கி சென்சார் மூலம் அணைக்கும் வசதி உண்டு. நீண்டகாலத்தில் மின்சார கட்டணம் எல்பிஜி விலை உயர்வை விட குறைவாக இருக்கலாம்.

ஆனால், உயர் மின்சார ஏற்றம் தேவைப்படும்; சில ஹோட்டல்களில் HT கனெக்ஷன் அவசியம். கிராமப்புறங்களில் மின்சாரம் நிலையில்லாத இடங்களில் சிரமம் ஏற்படலாம். அரசு இது தற்காலிக நெருக்கடி என்று கூறி வருகிறது. உற்பத்தியை அதிகரித்து, மாற்று இறக்குமதி வழிகளை ஏற்பாடு செய்து வருவதாக தெரிவிக்கப்பட்டுள்ளது. எனினும், மக்கள் முன்னெச்சரிக்கையுடன் இண்டக்ஷன் ஸ்டவ்களை வாங்கி வருவதால் கடைகளில் தட்டுப்பாடு நீடிக்கிறது.
 

இதையும் படிங்க: தென்மண்டலங்களுக்கு ‘செக்’... கடைசியாக வீட்டு சிலிண்டர்களுக்கும் விழுந்தது இடி... எல்.பி.ஜி. டேங்கர் லாரிகளால் அடுத்த சிக்கல்...!