ஓமன் கடலில் இந்தியர்கள் சென்ற கப்பல் மீது ஏவுகணை தாக்குதல்! இந்தியா கண்டனம்!

ஓமன் கடற்பரப்பில் ஹோர்முஸ் நீரிணைப் பாதையில் பயணித்த பனாமா நாட்டுக் கொடி தாங்கிய 'எம்.டி ஆன் பீஸ்'  என்ற வணிகக் கப்பல் மீது நடத்தப்பட்ட பயங்கர ஏவுகணைத் தாக்குதலுக்கு மத்திய வெளியுறவுத்துறை அமைச்சகம் மிகக் கடுமையான கண்டனம் தெரிவித்துள்ளதுடன், காயமடைந்த 11 இந்திய மாலுமிகள் ஓமன் நாட்டு மருத்துவமனையில் அனுமதிக்கப்பட்டுள்ளதாகத் தெரிவித்துள்ளது.

மத்திய கிழக்கு பிராந்தியத்தில் போர் பதற்றம் தீவிரமடைந்து வரும் நிலையில், சர்வதேச வர்த்தகக் கப்பல்கள் தொடர்ந்து அச்சுறுத்தலுக்கு உள்ளாகி வருகின்றன. இந்நிலையில், இன்று ஓமன் கடற்பகுதியில் அமைந்துள்ள முக்கிய கடல்வழிப் பாதையான ஹோர்முஸ் நீரிணை வழியாகச் சென்று கொண்டிருந்த 'எம்.டி ஆன் பீஸ்' என்ற வணிகக் கப்பலைக் குறிவைத்துத் திடீரென ஏவுகணைத் தாக்குதல் நடத்தப்பட்டது.

இச்சம்பவம் குறித்து மத்திய வெளியுறவுத்துறை அமைச்சகம் (MEA) வெளியிட்டுள்ள அதிகாரப்பூர்வ அறிக்கையில், தாக்குதலுக்குள்ளான அந்தக் கப்பலில் மொத்தம் 19 மாலுமிகள் பணியாற்றி வந்ததாகவும், அவர்களில் 17 பேர் இந்தியக் குடிமக்கள் என்றும் தெரிவிக்கப்பட்டுள்ளது. ஏவுகணைத் தாக்குதலில் கப்பலில் இருந்த 12 பணியாளர்கள் காயமடைந்த நிலையில், அவர்களில் 11 பேர் இந்தியர்கள் என்பது உறுதி செய்யப்பட்டுள்ளது.

இதையும் படிங்க: #BREAKING அதிரும் அரசியல் களம்... சென்னையில் இந்தியா கூட்டணி ஆலோசனை... இந்தியா கூட்டணி கூட்டம் - முதல் முறையாக பங்கேற்கும் தவெக...!

தாக்குதல் குறித்த தகவல் கிடைத்ததும், ஓமன் நாட்டுப் பாதுகாப்புப் படையினர் மற்றும் மீட்புக் குழு அதிகாரிகளின் உடனடி உதவியுடன் காயமடைந்த இந்திய மாலுமிகள் அனைவரும் கப்பலில் இருந்து விரைவாகப் பாதுகாப்பாக வெளியேற்றப்பட்டனர். அவர்கள் அனைவரும் ஓமனில் உள்ள கசாப் (Khasab) நகரில் உள்ள அரசு மருத்துவமனையில் தீவிர மருத்துவ சிகிச்சைக்காக அனுமதிக்கப்பட்டுள்ளனர். உரிய நேரத்தில் விரைந்து செயல்பட்டு இந்திய மாலுமிகளைக் காப்பாற்றிய ஓமன் நாட்டு அதிகாரிகளுக்கு இந்திய அரசு தனது மனமார்ந்த நன்றியைத் தெரிவித்துக் கொண்டுள்ளது.

மேலும், மத்திய கிழக்கு பிராந்தியத்தில் சர்வதேச வணிகக் கப்பல்களைக் குறிவைத்துத் தொடர்ந்து நடத்தப்பட்டு வரும் இத்தகைய கண்மூடித்தனமான தாக்குதல்கள் இந்தியாவுக்கு மிகுந்த ஆழ்ந்த கவலையையும் வேதனையையும் ஏற்படுத்துவதாக மத்திய வெளியுறவுத்துறை சுட்டிக்காட்டியுள்ளது.

இப்பிராந்தியத்தின் ஒட்டுமொத்த அமைதி, பாதுகாப்பு மற்றும் நிலைத்தன்மையைக் கருத்தில் கொண்டு, அப்பாவி வணிகக் கப்பல்கள், சர்வதேச கடற்பயணிகள் மற்றும் பொதுமக்கள் உள்கட்டமைப்புகளை இலக்கு வைத்து நடத்தப்படும் இத்தகைய சட்டவிரோதத் தாக்குதல்கள் உடனடியாக முடிவுக்கு வர வேண்டும் என்று இந்தியா மீண்டும் திட்டவட்டமாக வலியுறுத்தியுள்ளது.

சர்வதேச கடல்வழிப் பாதைகளில் எந்தவித அச்சுறுத்தலும் இன்றி சரக்குக் கப்பல் போக்குவரத்து மற்றும் உலகளாவிய வர்த்தகம் விரைவில் மீண்டும் தடையின்றி சீராக நடைபெறுவதை அனைத்துத் தரப்பினரும் உறுதி செய்ய வேண்டும் என்றும் மத்திய அரசு தனது அறிக்கையில் அழுத்தமாகக் கேட்டுக்கொண்டுள்ளது.

இதையும் படிங்க: வடகிழக்கு பருவ மழை எப்போது..? எல் நினோ தாக்கம்... இந்திய வானிலை ஆய்வு மையம் அப்டேட்..!!