உங்க ஸ்கூல்ல பாம் வெச்சிருக்கோம்.. பரபரப்பான டெல்லி.. பதறிய ஆசிரியர்கள், மாணவர்கள்..!!

தலைநகர் டெல்லியில் உள்ள சில முக்கியப் பள்ளிகளுக்கு இன்று காலை வெடிகுண்டு மிரட்டல் கிடைத்ததால் பெரும் பதற்றம் ஏற்பட்டது. இந்த மிரட்டல்கள் டெல்லி பொது பள்ளி (DPS) துவார்கா, கிருஷ்ணா மாடல் பொது பள்ளி மற்றும் சர்வோதய வித்யாலயா ஆகியவற்றுக்கு விடுக்கப்பட்டன. இதனால், மாணவர்கள் மற்றும் ஆசிரியர்கள் பாதுகாப்பாக வெளியேற்றப்பட்டு, போலீசார் மற்றும் வெடிகுண்டு நிபுணர்கள் தீவிர தேடுதல் நடவடிக்கைகளை மேற்கொண்டனர்.

இன்று காலை 7 மணியளவில் இந்த மிரட்டல் தகவல்கள் வந்தன. உடனடியாக போலீசார், வெடிகுண்டு செயலிழப்பு நிபுணர்களுடன் மோப்ப நாய் உதவியுடன் சம்பந்தப்பட்ட பள்ளிகளில் தீவிர சோதனை நடத்தினர். மேலும் பள்ளிகளில் உள்ள அனைத்து மாணவர்களும் வகுப்பறைகளிலிருந்து வெளியேற்றப்பட்டு, அருகிலுள்ள திறந்த இடங்களில் பாதுகாப்புடன் அமர வைக்கப்பட்டனர். தீவிர சோதனைக்குப் பிறகு, வெடிகுண்டு மிரட்டல் வெறும் புரளி என்து தெரியவந்தது. இது குறித்து வழக்குப்பதிவு செய்த போலீசார், மிரட்டல் விடுத்தது யார் என்பது குறித்த விசாரணை நடத்தி வருகின்றனர்.

இதையும் படிங்க: பரபரக்கும் அரசியல் களம்.. நாளை டெல்லி செல்கிறார் இபிஎஸ்.. அமித்ஷாவுடன் முக்கிய மீட்டிங்..!!

இந்த சம்பவம் டெல்லியில் சமீப காலங்களில் ஏற்பட்டுள்ள வெடிகுண்டு மிரட்டல் தொடர்ச்சியின் பகுதியாகும். கடந்த மாதம் ஆகஸ்ட் 21ம் தேதி, டெல்லியில் உள்ள ஆண்டிரா பள்ளி, பிஜிஎஸ் சர்வதேச பள்ளி உள்ளிட்ட ஆறு பள்ளிகளுக்கு வெடிகுண்டு மிரட்டல்கள் விடுக்கப்பட்டன. அப்போது தீயணைப்பு மற்றும் போலீஸ் குழுக்கள் பெரிய அளவிலான தேடுதல் நடவடிக்கைகளை மேற்கொண்டன. அதேபோல், ஆகஸ்ட் 20ம் தேதி 50க்கும் மேற்பட்ட பள்ளிகளுக்கு மின்னஞ்சல் மூலம் மிரட்டல்கள் அனுப்பப்பட்டன. இந்த மிரட்டல்கள் பெரும்பாலும் 'டெரரைசர்ஸ் 111' என்ற குழுவின் பெயரில் அனுப்பப்பட்டவை, அவை பொதுவாக பொய்யானவை என போலீஸ் தெரிவித்துள்ளது.

இன்றைய சம்பவத்தால் டிபிஎஸ் துவார்கா பள்ளிக்கு விடுமுறை அளிக்கப்பட்டது. மேலும் இன்று நடைபெற இருந்த தேர்வுகள் ரத்து செய்யப்பட்டன. இதனால், ஆயிரக்கணக்கான மாணவர்கள் பாதிக்கப்பட்டுள்ளனர். காவல்துறை வட்டாரங்களின்படி, இந்த மிரட்டல்கள் மின்னஞ்சல் அல்லது தொலைபேசி அழைப்புகள் மூலம் விடுக்கப்பட்டவை. சமீபத்தில் 384 மின்னஞ்சல் அடையாளங்கள், அவற்றில் 192 பள்ளிகளுடன் தொடர்புடையவை, 'டெரர் குழு உரிமையாளர்' என்று கூறி மிரட்டல்கள் பெற்றுள்ளன. இவை கூகுள் சர்வர்கள் மூலம் அனுப்பப்பட்டவை என்று தெரிய வந்துள்ளது. காவல்துறையினர் இந்த வழக்குகளை தீவிரமாக விசாரித்து, குற்றவாளிகளை கண்டறிய முயற்சி செய்து வருகின்றனர்.

அவ்வப்போது வரும் இந்த மிரட்டல்கள் டெல்லியில் பள்ளிகளின் இயல்பு நடவடிக்கைகளை கடுமையாக பாதித்துள்ளன. கடந்த சில மாதங்களில், டெல்லி உயர்நீதிமன்றம் உள்ளிட்ட பல இடங்களுக்கும் இதேபோன்ற பொய் மிரட்டல்கள் வந்துள்ளன. போலீஸ் அதிகாரிகள், "இத்தகைய மிரட்டல்கள் பொதுமக்களிடம் பயத்தை ஏற்படுத்துவதற்காகவே அனுப்பப்படுகின்றன. எந்தவித சந்தேகத்திற்குரிய பொருளும் கண்டுபிடிக்கப்படவில்லை. இருப்பினும், பாதுகாப்பு நடவடிக்கைகள் தீவிரப்படுத்தப்பட்டுள்ளன" என்று தெரிவித்தனர். பள்ளிகளைச் சுற்றியுள்ள பகுதிகளில் கூடுதல் காவல் படையினர் குவிக்கப்பட்டுள்ளனர்.

இந்த சம்பவம் பெற்றோர்களிடையே கவலையை ஏற்படுத்தியுள்ளது. பள்ளிகள் மற்றும் அரசு அதிகாரிகள், மாணவர்களின் பாதுகாப்பை உறுதி செய்ய தேவையான அனைத்து நடவடிக்கைகளையும் எடுக்க வேண்டும் என்று கோரிக்கை வைக்கப்பட்டுள்ளது. விசாரணை தொடர்ந்து நடைபெறுகிறது.

இதையும் படிங்க: ஓவர் ஸ்பீடில் வந்த BMW கார்.. தூக்கி வீசப்பட்ட பைக்.. நிதியமைச்சக துணை செயலர் உயிரிழப்பு..!!