உரைக்கவில்லையா ஸ்டாலின் உங்களுக்கு?! செம்மொழி பூங்கா திறப்பு விழா சர்ச்சை! அண்ணாமலை காட்டம்!

கோவை நகரின் புதிய அடையாளமாக, 45 ஏக்கர் பரப்பளவில் ரூ.208.50 கோடி செலவில் உருவாக்கப்பட்ட செம்மொழி பூங்காவை இன்று (நவம்பர் 25) தமிழக முதலமைச்சர் மு.க. ஸ்டாலின் திறந்து வைத்தார்.

தமிழகத்தில் வேறு எங்கும் இல்லாத அரிய வகை தாவரங்கள், செடிகள், கொடிகள், மரவகைகளுடன் அமைக்கப்பட்ட இந்தப் பூங்கா, இயற்கை பசுமை சுற்றுலா இடமாகவும், 2.2 கி.மீ. சுற்றுப்பாதையுடன் நடைபயிற்சி இடமாகவும் உருவாக்கப்பட்டுள்ளது. 2010-ல் உலகத் தமிழ்ச் செம்மொழி மாநாட்டின் போது அறிவிக்கப்பட்ட இந்தத் திட்டம், 2023-ல் ஸ்டாலின் அடிக்கல் நாட்டி தொடங்கினார். இன்றைய திறப்பு விழா, கோவை மக்களிடம் பெரும் எதிர்பார்ப்பை ஏற்படுத்தியது.

ஆனால், விழாவின் தொடக்கத்தில் தமிழ்த்தாய் வாழ்த்து பாடப்படாததால் பெரும் சர்ச்சை எழுந்துள்ளது. தமிழக பாஜக முன்னாள் தலைவர் கே.அண்ணாமலை இதை கடுமையாக விமர்சித்துள்ளார்.

இதையும் படிங்க: உக்ரைன் மீது ரஷ்யா அடுத்தடுத்து தாக்குதல்! அமைதி பேச்சுவார்த்தை என்னாச்சு?! ஜெலன்ஸ்கி கடும் கண்டனம்!

அவரது அறிக்கையின்படி, “முதலமைச்சர் ஸ்டாலின் தலைமையில் நடந்த கோவை செம்மொழி பூங்கா திறப்பு விழாவில் தமிழ்த்தாய் வாழ்த்து பாடப்படவில்லை. தமிழகத்தில் இந்தப் பூங்காக்கள் தமிழ் மொழியைப் போற்றுவதற்காக அமைக்கப்படுகின்றன என்று தி.மு.க. கூறுவதுதான் இதில் நகைமுரண்” என்று அவர் கூறியுள்ளார்.

அண்ணாமலை தொடர்ந்து, “உயிரோடும் உணர்வோடும் இருக்க வேண்டிய தமிழ்ப் பற்றை, தங்கள் பிரிவினைவாத அரசியலுக்காகவும், பிழைப்புவாத வியாபாரத்திற்காகவும் தொடர்ந்து பயன்படுத்தி வருகிறது தி.மு.க. அதனால்தான் தமிழ் மொழி மீது அக்கறை இருப்பதுபோலக் காட்டிக்கொள்ளும் ஸ்டாலின், அரசு விழாவின் தொடக்கத்தில் தமிழ்த்தாய் வாழ்த்து பாட வேண்டும் என்பது கூட உரைக்கவில்லை” என்று விமர்சித்தார்.

“இனியாவது வெறும் உதட்டளவில் தமிழ்ப் பற்று பேசாமல், உண்மையாகவே தமிழ் மொழி மீது அக்கறை காட்டும்படி முதலமைச்சரைக் கேட்டுக்கொள்கிறோம்” என்றும் அவர் வலியுறுத்தினார்.

இந்த விமர்சனம், தமிழ் அரசியலில் புதிய சர்ச்சையைத் தூண்டியுள்ளது. தி.மு.க. தரப்பு இதுவரை எந்தப் பதிலும் தெரிவிக்கவில்லை. செம்மொழி பூங்கா திறப்பு, தமிழ் மொழி பெருமையை வலியுறுத்தும் நிகழ்வாக இருந்தாலும், தமிழ்த்தாய் வாழ்த்து இல்லாதது தமிழ் அன்பர்களிடம் அதிர்ச்சியை ஏற்படுத்தியுள்ளது. கோவை மக்கள் இந்தப் பூங்காவை தங்கள் பொழுதுபோக்கு இடமாக எதிர்பார்த்து வருகின்றனர்.
 

இதையும் படிங்க: இந்தியா கையில் சிந்து மாகாணம்? அலறவிட்ட ராஜ்நாத் சிங்!! பாக்., கதறல்!