டீப்ஃபேக் வீடியோவுக்கு எதிராக உலக நாடுகள் ஒன்றிணைய வேண்டும்! பிரதமர் மோடியின் முக்கிய அழைப்பு!

இந்தியாவில் டிஜிட்டல் தொழில்நுட்ப பயன்பாடு தொடர்ந்து அதிகரித்து வரும் நிலையில், கேமிங் துறையும் வேகமாக வளர்ந்து வருவதாக பிரதமர் நரேந்திர மோடி தெரிவித்துள்ளார். டெல்லியில் நடைபெற்ற 10வது மொபைல் காங்கிரஸ் மாநாட்டில் பேசிய அவர், எதிர்கால தேவைகளுக்கான தொழில்நுட்பங்களை இந்தியாவிலேயே உருவாக்குவதில் அதிக கவனம் செலுத்த வேண்டும் என்று வலியுறுத்தினார்.

தற்போதைய டிஜிட்டல் உலகில் டீப்ஃபேக் வீடியோக்கள் மிகப்பெரிய சவாலாக உருவெடுத்துள்ளதாக பிரதமர் குறிப்பிட்டார். உண்மையான நபர்கள் பேசுவது அல்லது செயல்படுவது போல செயற்கையாக உருவாக்கப்படும் வீடியோக்கள் பல்வேறு பிரச்சினைகளை ஏற்படுத்தக்கூடும் என்றும், இதனை எதிர்கொள்ள சர்வதேச அளவில் ஒருங்கிணைந்த கட்டமைப்பு தேவை என்றும் அவர் தெரிவித்தார்.

இணையத்தை பயன்படுத்தும் பொதுமக்களும் அதிக விழிப்புடன் இருக்க வேண்டும் என பிரதமர் கேட்டுக்கொண்டார். போலியான தகவல்கள், மோசடி செய்திகள் மற்றும் பல்வேறு இணையவழி அச்சுறுத்தல்கள் குறித்து பயனர்கள் கவனமாக செயல்பட வேண்டும் என்றும் அவர் அறிவுறுத்தினார்.

இதையும் படிங்க: இந்தியாவின் பெருமை!விமானப்படை வீரர்களை கவுரவித்த பிரதமர் மோடி!! ஜனாதிபதி முர்முவும் வாழ்த்து!

இந்தியாவில் கேமிங் துறை வேகமாக முன்னேறி வருவதாக குறிப்பிட்ட பிரதமர், தொழில்நுட்ப வளர்ச்சியை பயன்படுத்தி புதிய வாய்ப்புகளை உருவாக்க வேண்டும் என்றார். குறிப்பாக இந்தியாவின் தேவைகளுக்கு ஏற்ற தொழில்நுட்பங்களை உள்நாட்டிலேயே உருவாக்குவது முக்கியம் என்றும் அவர் கூறினார்.

டிஜிட்டல் தொழில்நுட்பம் பொதுமக்களின் அன்றாட வாழ்க்கையிலும் பல்வேறு மாற்றங்களை ஏற்படுத்தியுள்ளதாக பிரதமர் தெரிவித்தார். குழந்தைகள் தொலைவில் இருந்தாலும் தொடர்ந்து கல்வி கற்கவும், குடும்பத்தினர் மற்றும் நண்பர்களுடன் தொடர்பில் இருக்கவும், வீட்டிலிருந்தபடியே பணியாற்றவும் டிஜிட்டல் வசதிகள் உதவியுள்ளதாக அவர் கூறினார்.

விவசாயிகளுக்கான அரசின் நிதியுதவியும் டிஜிட்டல் தொழில்நுட்பம் மூலம் எளிதாக சென்றடைவதாக பிரதமர் குறிப்பிட்டார். நிதி வங்கி கணக்கில் வரும்போது, அதன் தகவல் விவசாயிகளின் கைபேசிக்கு நேரடியாக சென்றடைவதால் வெளிப்படைத்தன்மை அதிகரித்துள்ளதாகவும் அவர் தெரிவித்தார்.

இன்றைய ஸ்மார்ட்போன்கள் அழைப்புகள் மற்றும் குறுஞ்செய்திகளுக்கான சாதனமாக மட்டும் இல்லாமல், பல்வேறு சேவைகளை ஒரே இடத்தில் வழங்கும் கருவியாக மாறிவிட்டதாகவும் பிரதமர் கூறினார். மக்கள் நீண்ட நேரம் காத்திருப்பதை குறைத்து, பல சேவைகளை விரைவாகப் பெறுவதற்கும் மொபைல் தொழில்நுட்பம் உதவுவதாக அவர் தெரிவித்தார்.

மேலும், தொலைதூர பகுதிகளிலும் இணைய வசதி கிடைக்கும் வகையில் கூடுதல் மொபைல் டவர்கள் அமைக்க அரசு நடவடிக்கை எடுத்து வருவதாக பிரதமர் கூறினார். கடந்த 10 முதல் 12 ஆண்டுகளில் இந்தியாவின் தொலைத்தொடர்பு கட்டமைப்பு குறிப்பிடத்தக்க அளவில் விரிவடைந்துள்ளதாகவும் அவர் தெரிவித்தார்.

இதையும் படிங்க: இந்த உயரத்திற்கு வருவேன் என நினைக்கவே இல்லை! என் பலமே மக்கள் தான்! 25 ஆண்டு பயணத்தை நினைவுகூர்ந்த மோடி!