20 ஆண்டுகால திட்டத்தை ஒரே நாள்ல முடிச்சிட்டீங்கல்ல! புதிய சட்டம் கிராம விரோதம்! மோடி மீது ராகுல் தாக்கு!
20 ஆண்டுகால 100 நாள் வேலை திட்டத்தை மத்திய அரசு ஒரே நாளில் அழித்துவிட்டது. புதிய திட்டம் கிராமங்களுக்கு எதிரானது என காங்கிரஸ் எம்பி ராகுல்காந்தி கூறினார்.
by
காங்கிரஸ் கட்சியின் முன்னணித் தலைவரும், எதிர்க்கட்சித் தலைவருமான ராகுல் காந்தி, மத்திய பாஜக அரசை கடுமையாக விமர்சித்துள்ளார். நாடாளுமன்ற குளிர்கால கூட்டத்தொடரில் நிறைவேற்றப்பட்ட புதிய மசோதா மூலம், 20 ஆண்டுகளாக செயல்பட்டு வரும் மகாத்மா காந்தி தேசிய ஊரக வேலைவாய்ப்பு உறுதித் திட்டத்தை (மன்ரேகா அல்லது எம்ஜிஎன்ஆர்இஜிஏ) மோடி அரசு ஒரே நாளில் இடித்துத் தள்ளிவிட்டதாக அவர் குற்றம்சாட்டியுள்ளார்.
வெள்ளிக்கிழமை (டிசம்பர் 19, 2025) தனது எக்ஸ் (முன்னர் ட்விட்டர்) சமூக வலைதளப் பக்கத்தில் ராகுல் காந்தி வெளியிட்ட பதிவில், “நேற்று இரவு மோடி அரசு ஒரே நாளில் 20 ஆண்டுகால மன்ரேகாவை இடித்துத் தள்ளிவிட்டது.
இது மன்ரேகாவின் மறு சீரமைப்பு (ரீவாம்ப்) அல்ல. உரிமை அடிப்படையிலான, தேவை அடிப்படையிலான வேலைவாய்ப்பு உத்தரவாதத் திட்டத்தை முழுமையாக அழித்துவிட்டு, டெல்லியில் இருந்து மத்திய அரசு கட்டுப்படுத்தும் ரேஷன் போன்ற திட்டமாக மாற்றிவிட்டது. இது வடிவமைப்பிலேயே மாநில விரோதமும் கிராம விரோதமுமாக உள்ளது” என்று கூறியுள்ளார்.
இதையும் படிங்க: மன்னிப்பு கேட்க மாட்டேன்!! ஆப்ரேஷன் சிந்தூர் குறித்து சர்ச்சை பேச்சு! காங்கிரஸ் மூத்த தலைவர் அடம்!
மன்ரேகா திட்டம் 2005-ஆம் ஆண்டு காங்கிரஸ் தலைமையிலான யூபிஏ அரசால் கொண்டுவரப்பட்டது. கிராமப்புற ஏழை குடும்பங்களுக்கு ஆண்டுக்கு குறைந்தது 100 நாட்கள் வேலைவாய்ப்பு வழங்குவது இதன் முக்கிய அம்சம்.
இது தேவை அடிப்படையில் (டிமாண்ட் டிரிவன்) செயல்படும் உரிமை சட்டம் (ரைட்ஸ் பேஸ்ட்). கிராமப்புற ஏழ்மையை போக்குவதிலும், கிராமங்களில் உள்கட்டமைப்பு பணிகளை மேம்படுத்துவதிலும் இத்திட்டம் மிக முக்கிய பங்காற்றி வருகிறது.
ஆனால் நாடாளுமன்றத்தில் நிறைவேற்றப்பட்ட புதிய மசோதா மூலம் இத்திட்டத்தின் பெயர் “விக்சித் பாரத் - ரோஜ்கர் மற்றும் அஜீவிகா மிஷன் (கிராமின்)” அல்லது சுருக்கமாக விபி-ஜி ராம் ஜி (VB-G RAM G) என மாற்றப்பட்டுள்ளது.
இது வெறும் பெயர் மாற்றம் மட்டுமல்லாமல், திட்டத்தின் அடிப்படை கட்டமைப்பையும் மாற்றியுள்ளதாக எதிர்க்கட்சிகள் குற்றம்சாட்டுகின்றன. புதிய திட்டம் மத்திய அரசின் முழு கட்டுப்பாட்டுக்குள் வருவதால், மாநில அரசுகளின் அதிகாரம் பறிபோகும் என்றும், வேலைவாய்ப்பு உத்தரவாதம் இல்லாமல் போகும் என்றும் ராகுல் காந்தி சுட்டிக்காட்டியுள்ளார்.
இந்த மசோதா மக்களவையில் நிறைவேற்றப்பட்ட போது எதிர்க்கட்சிகள் கடும் எதிர்ப்பு தெரிவித்தன. காங்கிரஸ் உள்ளிட்ட எதிர்க்கட்சிகள் இதை “கிராமங்களுக்கு எதிரான நடவடிக்கை” என்று விமர்சித்தன. ராகுல் காந்தியின் இந்த பதிவு சமூக வலைதளங்களில் பெரும் விவாதத்தை ஏற்படுத்தியுள்ளது. மன்ரேகா திட்டத்தை பாதுகாக்க வேண்டும் என்ற கோரிக்கைகளும் வலுப்பெற்று வருகின்றன.
மன்ரேகா திட்டம் கிராமப்புற இந்தியாவின் வாழ்வாதாரமாக இருந்து வரும் நிலையில், இந்த மாற்றம் பெரும் சர்ச்சையை ஏற்படுத்தியுள்ளது. எதிர்க்கட்சிகள் இதை தொடர்ந்து எதிர்த்து போராட்டங்களை நடத்த வாய்ப்புள்ளது.
இதையும் படிங்க: ராகுல் காந்தியின் ஜெர்மனி டூர்!! BMW ஷோருமில் விசிட்! பாஜக விமர்சனம்!
