சீனா போல.. இந்தியா வளர்வதை அமெரிக்கா விரும்பவில்லை” ரஷிய தூதர் பரபரப்பு குற்றச்சாட்டு!

டெல்லியில் நடைபெற்ற என்.டி.டி.வி. பாதுகாப்பு உச்சி மாநாட்டில் பேசிய இந்தியாவுக்கான ரஷிய தூதர் டெனிஸ் அலிபோவ், இந்தியாவின் வளர்ச்சி மற்றும் ரஷிய எண்ணெய் இறக்குமதி தொடர்பாக அமெரிக்காவின் அணுகுமுறையை கடுமையாக விமர்சித்துள்ளார்.

இந்தியா ரஷியாவிடம் இருந்து தொடர்ந்து கச்சா எண்ணெய் வாங்கி வரும் நிலையில், இரு நாடுகளுக்கு இடையேயான வர்த்தகம் சர்வதேச அளவில் கவனம் பெற்றுள்ளது. குறிப்பாக ரஷிய எண்ணெய் மற்றும் எரிவாயுவை வாங்கும் நாடுகள் மீது 100 சதவீதம் வரை வரி விதிக்க அமெரிக்க அதிபர் டொனால்ட் டிரம்புக்கு அதிகாரம் வழங்கும் ‘Lindsey O. Graham Sanctioning Russia and Iran Act of 2026’ சட்டம் சமீபத்தில் அமெரிக்காவில் அமலுக்கு வந்துள்ளது.

இந்த பின்னணியில் பேசிய அலிபோவ், இந்த ஆண்டு நடைபெற்ற ரைசினா டயலாக் நிகழ்ச்சியில் அமெரிக்காவின் உயர்மட்ட அதிகாரி ஒருவர், இந்தியா சீனாவைப் போன்ற போட்டியாளராக உருவெடுப்பதை அமெரிக்கா அனுமதிக்காது என்று கூறியதாக தெரிவித்தார். அந்தக் கருத்து தன்னையும் ஆச்சரியப்படுத்தியதாகக் கூறிய அவர், இந்தியா பொருளாதார ரீதியாகவும், தொழில்நுட்ப ரீதியாகவும், ராணுவ ரீதியாகவும் வலுப்பெறும் நிலையில், அதன் வளர்ச்சியை கட்டுப்படுத்த அமெரிக்கா முயற்சிக்கலாம் என்று தனது கருத்தை முன்வைத்தார்.

இதையும் படிங்க: 72 மணி நேரம்... 15 முக்கிய சந்திப்புகள்! உலக தலைவர்களை சந்தித்து மோடி போட்ட மாஸ்டர் பிளான்!

ரஷிய எண்ணெயை இந்தியா வாங்குவது ரஷியாவுக்கு ஆதரவாக மட்டும் அல்ல என்றும், இந்தியாவின் பொருளாதாரம் மற்றும் மக்களின் தேவையை கருத்தில் கொண்டே எண்ணெய் கொள்முதல் செய்யப்படுவதாகவும் அலிபோவ் தெரிவித்தார். போட்டித்தன்மை வாய்ந்த விலையில் கிடைப்பதால் இந்தியா ரஷிய எண்ணெயை வாங்குவதாகவும் அவர் கூறினார்.

இந்தியாவின் வளர்ச்சி அதிகரிக்கும் நிலையில், இதுபோன்ற பொருளாதார மற்றும் அரசியல் அழுத்தங்கள் மேலும் அதிகரிக்கலாம் என்றும் ரஷிய தூதர் தெரிவித்தார். அதேவேளை, இந்தியா தனது எரிசக்தி பாதுகாப்பை கருத்தில் கொண்டு பல்வேறு நாடுகளிடம் இருந்து கச்சா எண்ணெயை கொள்முதல் செய்து வருகிறது. சமீபத்திய தரவுகளின்படி, ஆகஸ்ட் மாதத்தில் இந்தியாவின் ரஷிய எண்ணெய் இறக்குமதி 16.5 சதவீதம் குறைந்துள்ளது.

இந்தியா–ரஷியா உறவு குறித்து பேசிய அலிபோவ், பல ஆண்டுகளாக இரு நாடுகளும் நம்பகமான கூட்டாளிகளாக செயல்பட்டு வருவதாக கூறினார். சமீபத்திய பிரதமர் நரேந்திர மோடி–ரஷிய அதிபர் விளாடிமிர் புதின் சந்திப்பும், இரு நாடுகளுக்கும் இடையே எதிர்காலத்திற்கான விரிவான செயல்திட்டம் இருப்பதை காட்டுவதாக அவர் தெரிவித்தார்.

இதனால், இந்தியாவின் வளர்ச்சி, ரஷிய எண்ணெய் கொள்முதல் மற்றும் அமெரிக்காவின் புதிய பொருளாதார நடவடிக்கைகள் தொடர்பான சர்வதேச விவாதம் மீண்டும் தீவிரமடைந்துள்ளது.

இதையும் படிங்க: ஐரோப்பாவுடன் மோதலா? உலக நாடுகளுக்கு புடின் சொன்ன முக்கிய செய்தி! ரஷ்யாவின் அடுத்த திட்டம் என்ன?