அதிரடி ஆக்‌ஷனில் இறங்கும் தேர்தல் ஆணையம்.. பீகார் மட்டுமல்ல, தமிழகத்திலும் எதிரொலிக்கும் வேட்டு!

பீகார் சட்டசபை தேர்தல் இந்தாண்டு நவம்பரில் நடைபெற உள்ளது. 243 உறுப்பினர்களைக் கொண்ட இந்த சட்டசபைக்கு, 7.9 கோடி வாக்காளர்கள் உள்ளனர். பாஜக தலைமையிலான என்டிஏ கூட்டணி, முதலமைச்சர் நிதிஷ் குமார் தலைமையில் ஆட்சியில் உள்ளது. I.N.D.I.A கூட்டணி, குறிப்பாக காங்கிரஸ், ஆர்ஜேடி, மற்றும் இடதுசாரிகள், தேர்தலில் கடும் போட்டியை எதிர்பார்க்கின்றனர். 

2024 மக்களவைத் தேர்தலில் ஆர்ஜேடி 9 இடங்களையும், காங்கிரஸ் 3 இடங்களையும் கைப்பற்றியது, இது எதிர்க்கட்சிகளுக்கு உற்சாகம் அளித்துள்ளது. இந்த தேர்தல், பீகாரின் அரசியல் எதிர்காலத்தை தீர்மானிக்கும் முக்கிய நிகழ்வாகும். இந்த நிலையில் 
கடந்த ஜூன் 24 ஆம் தேதி இந்திய தேர்தல் ஆணையம் (ECI) பீகாரில் சிறப்பு தீவிர திருத்தம் (SIR) என்ற பெயரில் வாக்காளர் பட்டியல் திருத்தத்தை அறிவித்தது. இது 2003-க்கு பிறகு முதல் தீவிர திருத்தமாகும். 

நகரமயமாக்கல், புலம்பெயர்வு, இறப்பு பதிவு செய்யப்படாமை, மற்றும் வெளிநாட்டு குடியேறிகளின் பெயர்கள் உள்ளடங்கியதாக ECI காரணம் கூறியது. 7.9 கோடி வாக்காளர்களில் 4.96 கோடி பேர் 2003 பட்டியலில் உள்ளவர்கள், மீதமுள்ள 2.93 கோடி பேர் குடியுரிமை ஆவணங்களை சமர்ப்பிக்க வேண்டும். ஆனால், பிறப்பு சான்றிதழ் உள்ளிட்ட 11 ஆவணங்களில் ஆதார், வாக்காளர் அடையாள அட்டை, மற்றும் ரேஷன் கார்டு இடம்பெறவில்லை, இது பலருக்கு சிரமத்தை ஏற்படுத்தியது. ஜூலை 5, 2025 வரை, 14.18% வாக்காளர்கள் மட்டுமே படிவங்களை சமர்ப்பித்தனர், இது முன்னேற்றம் மெதுவாக இருப்பதைக் காட்டுகிறது.

இதையும் படிங்க: மகனைப் போலவே சுட்டுக் கொல்லப்பட்ட தொழிபதிபர்.. பீகாரில் தலைதூக்கும் துப்பாக்கி கலாச்சாரம்! ராகுல் ஆவேசம்

ECI, 77,895 பூத் மட்ட அலுவலர்களையும் (BLOs), 20,603 புதிய BLOக்களையும் நியமித்து, வீடு வீடாகச் சென்று ஆவணங்களை சேகரிக்கிறது. வாக்காளர்கள் ஜூலை 25 வரை ஆவணங்களை சமர்ப்பிக்கலாம், மேலும் ஆகஸ்ட் 1 முதல் செப்டம்பர் 1 வரை மனுக்கள் மற்றும் ஆட்சேபனைகளை தாக்கல் செய்யலாம். இறுதி பட்டியல் செப்டம்பர் 30 அன்று வெளியிடப்படும். ECI, வாக்காளர் பட்டியலின் ஒருமைப்பாட்டை உறுதி செய்ய இந்த நடவடிக்கை அவசியம் என்று வலியுறுத்துகிறது, மேலும் ஆதார் உள்ளிட்ட ஆவணங்களை பரிசீலிக்குமாறு உச்ச நீதிமன்றம் அறிவுறுத்தியதை ஏற்றுக்கொண்டுள்ளது.

எதிர்க்கட்சிகள், குறிப்பாக ஆர்ஜேடி, காங்கிரஸ், திரிணாமூல் காங்கிரஸ், மற்றும் CPI(ML), SIR-ஐ “வாக்காளர்களை வேண்டுமென்றே விலக்கும் சதி” என விமர்சித்தனர். முஸ்லிம்கள், தலித்துகள், மற்றும் ஏழைகளை இலக்காகக் கொண்டு, குடியுரிமை சரிபார்ப்பு மூலம் NRC-ஐ அமல்படுத்த முயல்வதாக குற்றம்சாட்டினர். ஆர்ஜேடியின் தேஜஸ்வி யாதவ், “வெள்ள பாதிப்பு மத்தியில் 25 நாட்களில் 8 கோடி வாக்காளர்களின் பட்டியலை தயாரிக்க முடியுமா?” என கேள்வி எழுப்பினார். காங்கிரஸ் தலைவர் மல்லிகார்ஜுன் கார்கே, இது “பாஜக-RSS-இன் சதி” என்றார். ஜூலை 9 அன்று, ராகுல் காந்தி தலைமையில் இந்தியா கூட்டணி பீகாரில் பந்த் நடத்தியது.

இருப்பினும்  SIR-ஐ தடை செய்ய மறுத்த நீதிமன்றம், ஆதார், வாக்காளர் அடையாள அட்டை, மற்றும் ரேஷன் கார்டை பரிசீலிக்க ECI-ஐ அறிவுறுத்தியது. இவ்வாறு வாக்காளர் பட்டியல் சிறப்பு திருத்தத்துக்கு சுப்ரீம் கோர்ட்டு அனுமதி அளித்துள்ள நிலையில், மேற்படி நடவடிக்கையை அடுத்த மாதம் (ஆகஸ்டு) முதல் நாடு முழுவதும் மேற்கொள்ள தேர்தல் கமிஷன் திட்டமிட்டு உள்ளதாக தகவல் வெளியாகி இருக்கிறது. குறிப்பாக இந்த வழக்கின் அடுத்த விசாரணை 28-ந் தேதி நடைபெறும் நிலையில், அதன் மீது பிறப்பிக்கப்படும் உத்தரவை பொறுத்து இந்த விவகாரத்தில் இறுதி முடிவு எடுக்கப்படும் என தேர்தல் கமிஷன் வட்டாரங்கள் தெரிவித்தன.

இதற்காக சில மாநில தேர்தல் அதிகாரிகள், அங்கு கடைசியாக சிறப்பு திருத்தம் செய்யப்பட்டதன் அடிப்படையிலான வாக்காளர் பட்டியலை ஏற்கனவே வெளியிட்டு உள்ளனர். அந்தவகையில் டெல்லி தேர்தல் அதிகாரி 2008-ம் ஆண்டு வாக்காளர் பட்டியலை வெளியிட்டு உள்ளார். உத்தரகாண்டில் 2006-ம் ஆண்டு பட்டியலும் அந்த மாநில தேர்தல் கமிஷன் இணையதளத்தில் வெளியிடப்பட்டு உள்ளன. 

பல மாநிலங்களில் 2002 மற்றும் 2004-ம் ஆண்டுக்கு இடையே தீவிர திருத்தம் மேற்கொள்ளப்பட்டு இருக்கிறது. அந்த பட்டியல்கள் வெளியிடப்பட்டு உள்ளன. முன்னதாக வெளிநாட்டில் இருந்து சட்ட விரோதமாக குடியேறியிருப்பவர்களை அவர்களது பிறப்பிடத்தின் அடிப்படையில் வாக்காளர் பட்டியலில் இருந்து நீக்குவதற்காக நாடு முழுவதும் வாக்காளர் பட்டியல் சிறப்பு திருத்தம் மேற்கொள்ளப்படும் என தேர்தல் கமிஷன் கூறியிருந்தது குறிப்பிடத்தக்கது.

இதையும் படிங்க: எனக்கு என் மாமா தான் வேணும்.. 55க்கு ஆசைப்பட்டு கணவனை தீர்த்துக்கட்டிய 20 வயது இளம்பெண்..!