போரை விரும்பல! ஆனா! எதுக்கும் தயார்!! பாகிஸ்தானை எச்சரிக்கும் தலிபான்கள்!! ஆப்கான் அதிரடி!

பாகிஸ்தானுடனான மோதல்கள் தீவிரமடைந்து வரும் நிலையில், போர் தங்கள் தேர்வல்ல என்றும் தேவைப்பட்டால் நீண்டகால போருக்கு தயார் நிலையில் இருப்பதாகவும் ஆப்கானிஸ்தானின் தலிபான் அரசு அறிவித்துள்ளது.

பாகிஸ்தானுடனான மோதல் தீவிரமடைந்து வரும் நிலையில், ஆப்கானிஸ்தான் தலிபான் அரசு "போர் எங்கள் தேர்வல்ல, ஆனால் தேவைப்பட்டால் நீண்டகால போருக்கு தயார்" என்று உறுதியாக அறிவித்துள்ளது. இது இரு நாடுகளுக்கும் இடையேயான பதற்றத்தை மேலும் அதிகரித்துள்ளது.

சமீபகாலமாக பாகிஸ்தான் - ஆப்கானிஸ்தான் எல்லைப் பகுதியில் தாக்குதல்கள் தொடர்ந்து நடைபெற்று வருகின்றன. பாகிஸ்தான், தெஹ்ரிக்-இ-தலிபான் பாகிஸ்தான் (TTP) என்ற பயங்கரவாத அமைப்புக்கு ஆப்கான் தலிபான் ஆதரவு அளிப்பதாக குற்றம் சாட்டி வருகிறது. 

இதையும் படிங்க: ஈரானிய போர்க்கப்பல் மீது அமெரிக்கா தாக்குதல்! மத்திய அரசு மௌனம் காப்பது ஏன்? காங்கிரஸ் கேள்வி!

இதையடுத்து கடந்த வாரம் 'ஆப்ரேஷன் கஜப் லில் ஹக்' என்ற பெயரில் ஆப்கானிஸ்தான் எல்லையில் 53 இடங்களில் பாகிஸ்தான் பாதுகாப்பு படைகள் தாக்குதல் நடத்தின. இதற்கு பதிலடியாக தலிபான் படைகளும் தாக்குதல் நடத்தின. 

இருதரப்பிலும் ஏராளமானோர் உயிரிழந்தனர். இதையடுத்து பாகிஸ்தான் ராணுவ அமைச்சர் கவாஜா ஆசிப், ஆப்கானிஸ்தானுடன் நேரடி போர் தொடங்கியதாக அறிவித்தார்.

இந்நிலையில் தலிபான் அரசின் துணை செய்தித் தொடர்பாளர் ஹம்துல்லா பித்ரத் கூறியதாவது: "நாங்கள் போரை விரும்பவில்லை. ஆனால் தேவை ஏற்பட்டால் நீண்டகால போருக்கு முழு தயார் நிலையில் இருக்கிறோம். 

ஆக்கிரமிப்புக்கு எதிராக தற்காத்துக்கொள்ளும் உரிமை எங்களுக்கு உண்டு. சர்வதேச ஆதரவு இல்லாமல் பாகிஸ்தானுக்கு தனியாக ஒரு நாட்டை தாக்கும் திறன் இல்லை. தொடர்ந்து தாக்குதல் நடத்தினால் காபூலில் உள்ள பாகிஸ்தான் தூதரகத்தை மூடுவோம்" என்று எச்சரித்தார்.

இரு நாடுகளுக்கும் இடையே எல்லைகள் மூடப்பட்டுள்ளன. எல்லைப் பகுதி மக்கள் கடும் அச்சத்தில் உள்ளனர். வர்த்தகம் முற்றிலும் முடங்கியுள்ளது. ஆப்கானிஸ்தானின் பாக்ராம் விமானதளம் மீது பாகிஸ்தான் தாக்குதல் நடத்தியதாக அறிவிக்கப்பட்டுள்ளது. செயற்கைக்கோள் படங்கள் மூலம் இந்த தாக்குதல் உறுதிப்படுத்தப்பட்டுள்ளது. பாக்ராம் தலிபான் அரசின் மிக முக்கிய ராணுவ சொத்துக்களில் ஒன்றாக கருதப்படுகிறது.

இந்த மோதல் தொடர்ந்தால் மேலும் பெரிய அளவில் போர் விரிவடையும் அபாயம் உள்ளது. தலிபான் அரசின் இந்த அறிவிப்பு பாகிஸ்தானுக்கு வலுவான எச்சரிக்கையாக அமைந்துள்ளது. இரு நாடுகளும் ஒருவரையொருவர் குற்றம் சாட்டி வரும் நிலையில், எல்லைப் பகுதி மக்களின் வாழ்வாதாரம் பெரிதும் பாதிக்கப்பட்டுள்ளது. சர்வதேச சமூகம் இந்தப் பதற்றத்தை கவனமாக உற்று நோக்கி வருகிறது. 

இதையும் படிங்க: எந்த பிரச்னைக்கும் போர் தீர்வல்ல!! பேச்சுவார்த்தை மூலம் தான் தீர்க்கணும்!! ராணுவம் வேண்டாம் - மோடி!