திடீரென தீப்பிடித்த சுற்றுலா பேருந்து... ஜன்னல் வழியாக எகிறி குதித்த பயணிகள்... 9 பேர் உடல் கருகி பலி...!

உத்தரப்பிரதேச மாநிலம் கிரேட்டர் நொய்டாவில் பயணிகள் பேருந்து ஒன்று சாலையில் சென்று கொண்டிருந்தபோது, திடீரென நடுவழியில் தீப்பிடித்து எரிந்தது பரபரப்பை ஏற்படுத்தியுள்ளது.

நள்ளிரவில் இந்த தீ விபத்து ஏற்பட்டதாக கூறப்படுகிறது. சம்பந்தப்பட்ட பயணிகள் பேருந்து உத்தரப்பிரதேச மாநிலத்தில் இருந்து ஆக்ராவை நோக்கி சென்று கொண்டிருந்ததாக கூறப்படுகிறது.

அப்போது பேருந்தில் இருந்த பல பயணிகள் உறங்கிக் கொண்டிருந்தனர். திடீரென பேருந்தில் தீப்பிடித்ததால், அங்கிருந்த பயணிகளுக்கு என்ன நடக்கிறது என்பதை உணர்வதற்கே சில நிமிடங்கள் ஆகியிருக்கிறது.

இதையும் படிங்க: திமுக அரசு கொண்டு வந்த மெகா டெண்டர் ரத்து... சி.எம். விஜய் அதிரடி உத்தரவு...இதுதான் காரணமா?

இதனைத் தொடர்ந்து, சில பயணிகள் ஜன்னல் பகுதிக்கு ஓடி, ஜன்னல் வழியாக கீழே குதித்து தங்களது உயிரைத் தற்காத்துக் கொண்டனர். ஆனால், சில பயணிகள் பேருந்தில் பரவிய தீ மற்றும் அடர்ந்த புகை காரணமாக மூச்சுத்திணறலுக்கு ஆளாகியுள்ளனர்.

சிலர் ஜன்னல் வழியாக குதித்து உயிரைத் தற்காத்துக் கொண்ட நிலையில், சிலரால் பேருந்தில் இருந்து வெளியேற முடியாததால் உயிரிழப்பு ஏற்பட்டுள்ளது.

இந்த தீ விபத்தில் சுமார் 9 பேர் உடல் கருகி உயிரிழந்திருப்பதாக தகவல் வெளியாகியுள்ளது. மேலும் சிலர் காயமடைந்துள்ளனர். காயமடைந்தவர்கள் மருத்துவமனையில் அனுமதிக்கப்பட்டு சிகிச்சை பெற்று வருகின்றனர்.

தீ விபத்துக்குள்ளான இந்த பேருந்து, ராஜ் கல்பனா டிராவல்ஸ் என்ற தனியார் நிறுவனத்திற்குச் சொந்தமானது என்று கூறப்படுகிறது.

தீ விபத்து குறித்து தகவல் கிடைத்ததும், உடனடியாக அங்கு 5 தீயணைப்பு வாகனங்கள் விரைந்து சென்று, சுமார் 45 நிமிடங்கள் போராடி தீயை முற்றிலுமாகக் கட்டுக்குள் கொண்டு வந்துள்ளன.

இருப்பினும், அதற்குள்ளாக தீ மளமளவென பரவி, பேருந்து முற்றிலுமாக எரிந்து சாம்பலானது.

இந்த தீ விபத்து எப்படி ஏற்பட்டது என்பது குறித்த தகவல் இதுவரை வெளியாகவில்லை. ஷார்ட் சர்க்யூட் காரணமாக இந்த விபத்து ஏற்பட்டிருக்கலாமோ என்ற சந்தேகம் எழுந்துள்ளது.

இந்த தீ விபத்து குறித்து உத்தரப்பிரதேச முதலமைச்சர் யோகி ஆதித்யநாத் வருத்தத்தையும் இரங்கலையும் தெரிவித்துள்ளார். பாதிக்கப்பட்டவர்களுக்கு அனைத்து விதமான மருத்துவ உதவிகளையும் வழங்க அதிகாரிகளுக்கு அவர் உத்தரவிட்டுள்ளார். மேலும், உயிரிழந்தவர்களின் குடும்பத்தினருக்குத் தேவையான அனைத்து உதவிகளும் வழங்கப்படும் என்றும் உறுதியளித்துள்ளார்.

இதையும் படிங்க: துணை முதல்வர் பதவி... சீமான் மனைவியிடம் டீல் பேசிய ஆதவ் அர்ஜுனா... கடைசியில் நடந்த ட்விஸ்ட்...!