ஈரான் - அமெரிக்கா அமைதி ஒப்பந்தம்! இதெல்லாம் கூடாது! பட்டியலிட்டார் துணை அதிபர் ஜே.டி.வான்ஸ்!

அமெரிக்காவுக்கும் ஈரானுக்கும் இடையிலான அமைதி ஒப்பந்தம் மூன்று முக்கிய தூண்களை அடிப்படையாகக் கொண்டது என அமெரிக்கத் துணை அதிபர் ஜே.டி. வான்ஸ் தெரிவித்துள்ளார்.

ஆங்கில செய்தி சேனல் ஒன்றுக்கு அளித்த பேட்டியில் ஜே.டி. வான்ஸ் கூறியதாவது: “இந்த ஒப்பந்தம் மிகவும் எளிமையானது. முதலாவது, ஈரான் அணு ஆயுதம் வைத்திருக்கக் கூடாது. இரண்டாவது, ஹார்முஸ் ஜலசந்தி திறந்த நிலையில் இருக்க வேண்டும். மூன்றாவது, ஈரானியர்கள் ஒழுங்காக நடந்துகொண்டால் அவர்களுக்கு கிடைக்கும் பொருளாதார சலுகைகள் மற்றும் நன்மைகள்” என்றார்.

மேலும், “ஈரான் பயங்கரவாதத்துக்கு ஆதரவு அளிப்பதை நிறுத்தினால், பயங்கரவாதத்துக்கு நிதியளிப்பதை நிறுத்தினால், அணு ஆயுதத் திட்டத்தை மீண்டும் கட்டமைக்கும் முயற்சிகளை கைவிட்டால் மட்டுமே அவர்களுக்கு உண்மையான பொருளாதார நன்மைகள் கிடைக்கும். இவற்றில் எதையும் செய்யாவிட்டால் எதுவும் கிடைக்காது” என வான்ஸ் தெளிவுபடுத்தினார்.

இதையும் படிங்க: நீங்கள் குழப்பமடைவீர்கள்! அதிபர் ட்ரம்ப் மீண்டும் விஷமத்தனம்! அமெரிக்கா-ஈரான் அமைதி ஒப்பந்தம் கையெழுத்தாகுமா?

“ஈரான் எந்தப் பாதையைத் தேர்ந்தெடுத்தாலும் அமெரிக்காவே வெற்றி பெறும். அதிபர் டிரம்ப் கூறியது போல் அமெரிக்கா எப்படியும் வெற்றி பெறும். ஒன்று, அவர்கள் ஒப்பந்தத்துக்கு உட்படுவார்கள். அல்லது நாங்கள் அவர்களின் அணுசக்தித் திட்டத்தை அழித்து, ஹார்முஸ் ஜலசந்தியைத் திறந்து விடுவோம். இரண்டு சூழலிலும் அமெரிக்கா வெற்றி பெறும்” என்றார்.

ஹார்முஸ் ஜலசந்தி உலகின் முக்கிய எண்ணெய் போக்குவரத்து பாதையாகும். இந்த ஜலசந்தி மூடப்பட்டால் உலகப் பொருளாதாரம் பெரும் பாதிப்புக்கு உள்ளாகும். எனவே, இந்த ஜலசந்தி திறந்த நிலையில் இருப்பது அமெரிக்காவின் முக்கிய நிபந்தனையாக உள்ளது.

ஈரான் அணு ஆயுதத் திட்டத்தை கைவிடுவதும், பயங்கரவாத அமைப்புகளுக்கு ஆதரவை நிறுத்துவதும் இந்த ஒப்பந்தத்தின் மையமாக இருப்பதாக அமெரிக்க தரப்பு வலியுறுத்துகிறது. ஈரான் இந்த நிபந்தனைகளை ஏற்றால் பொருளாதாரத் தடைகள் தளர்த்தப்படும் என எதிர்பார்க்கப்படுகிறது.

இந்த ஒப்பந்தம் மத்திய கிழக்கு பிராந்தியத்தில் அமைதியை ஏற்படுத்தும் என அமெரிக்கா நம்புகிறது. இருப்பினும், ஈரான் தரப்பில் இருந்து இன்னும் முழுமையான உறுதிப்படுத்தல் வரவில்லை. இந்த ஒப்பந்தம் உலக அரங்கில் பெரும் கவனத்தை ஈர்த்துள்ளது.

இதையும் படிங்க: கடும் கோபத்தில் கண்கள் சிவந்த டிரம்ப்... நள்ளிரவில் ஈரானை பதம் பார்த்த அமெரிக்கா... நடந்தது என்ன?