உத்தரகாண்டில் பயங்கரம்..!! ஒன்றுடன் ஒன்று மோதிக்கொண்ட ரயில்கள்..!! தொழிலாளர்களின் கதி என்ன..??

உத்தரகாண்ட் மாநிலத்தின் சமோலி மாவட்டத்தில் அமைந்துள்ள விஷ்ணுகாட்-பிபல்கோடி நீர்மின் திட்டத்தின் சுரங்கத்தில் நள்ளிரவில் நடந்த பயங்கர ரயில் மோதல் விபத்தில் சுமார் 60க்கும் மேற்பட்ட தொழிலாளர்கள் காயமடைந்துள்ளனர். தெஹ்ரி ஹைட்ரோ டெவலப்மெண்ட் கார்ப்பரேஷன் (THDC) நிறுவனத்தால் நிர்மாணிக்கப்படும் இந்த திட்டம், அலக்னந்தா ஆற்றின் கரையில் ஹெலாங் மற்றும் பிபல்கோடி இடையே அமைந்துள்ளது. 4.5 கிலோமீட்டர் நீளமுள்ள சுரங்கத்தின் உள்ளே சுமார் 2.5 கிலோமீட்டர் தொலைவில் இந்த விபத்து நிகழ்ந்துள்ளது.

விபத்துக்குள்ளான ரயில்கள், கட்டுமானப் பணிகளுக்காக பயன்படுத்தப்படும் லோகோ ரயில்கள் ஆகும். ஒரு ரயில் தொழிலாளர்கள் மற்றும் அதிகாரிகளை ஏற்றிச் சென்றது, மற்றொன்று கட்டுமானப் பொருட்களை ஏற்றிச் சென்றது. ஷிப்ட் மாற்றத்தின் போது, தொழில்நுட்பக் கோளாறு காரணமாக பின்னால் வந்த ரயில், நின்றிருந்த ரயிலுடன் மோதியதாக முதற்கட்ட தகவல்கள் தெரிவிக்கின்றன.

இதையும் படிங்க: இனி ரயில்களில் ELECTRIC KETTLES-க்கு தடை..!! மீறினால் 5 வருஷம் ஜெயில்.. பறந்த வார்னிங்..!!

பயணிகள் ரயிலில் மொத்தம் 109 பேர் இருந்தனர், அவர்களில் பெரும்பாலானோர் தொழிலாளர்கள். இந்திய ரயில்வே துறையுடன் இந்த ரயில்கள் எந்தத் தொடர்பும் இல்லை என்பது குறிப்பிடத்தக்கது; இவை திட்டத்தின் உள்ளூர் போக்குவரத்து ஏற்பாடுகள் மட்டுமே.

விபத்தில் காயமடைந்த அனைவரும் உடனடியாக மீட்கப்பட்டு, அருகிலுள்ள மருத்துவமனைகளுக்கு கொண்டு செல்லப்பட்டனர். கோபேஷ்வர் மாவட்ட மருத்துவமனையில் 42 பேர் சிகிச்சை பெற்று வருகின்றனர், அவர்களில் 4-5 பேருக்கு எலும்பு முறிவுகள் ஏற்பட்டுள்ளன. மேலும் 17 பேர் பிபல்கோடி விவேகானந்தா மருத்துவமனையில் அனுமதிக்கப்பட்டுள்ளனர். 10 பேர் கோபேஷ்வர் மருத்துவமனைக்கு மாற்றப்பட்டுள்ளனர். அனைவரின் உடல்நிலையும் சீராக உள்ளது என மருத்துவர்கள் தெரிவித்துள்ளனர். எந்த உயிரிழப்பும் ஏற்படவில்லை என்பது ஆறுதல் அளிக்கும் தகவலாகும்.

இந்த சம்பவம் குறித்து தகவல் கிடைத்தவுடன், சமோலி மாவட்ட ஆட்சியர் மற்றும் உதவி ஆட்சியர் ஆகியோர் சம்பவ இடத்திற்கு விரைந்து மீட்புப் பணிகளை மேற்பார்வையிட்டனர். மாவட்ட காவல்துறை கண்காணிப்பாளர், போலீஸ் மற்றும் நிர்வாக அதிகாரிகளுடன் மருத்துவமனைகளைப் பார்வையிட்டு, காயமடைந்தவர்களின் நிலையை கண்காணித்தார்.

உத்தரகாண்ட் முதலமைச்சர் புஷ்கர் சிங் தாமி, விபத்து குறித்து விரிவான விசாரணைக்கு உத்தரவிட்டுள்ளார். மேலும், காயமடைந்தவர்களுக்கு உயர்தர மருத்துவ சிகிச்சை வழங்குமாறு அதிகாரிகளுக்கு அறிவுறுத்தியுள்ளார். "இந்த துயர சம்பவத்தில் பாதிக்கப்பட்ட அனைவருக்கும் சிறந்த மருத்துவ உதவி கிடைக்க வேண்டும்" என அவர் தெரிவித்துள்ளார்.

இந்த நீர்மின் திட்டம், உத்தரகாண்டின் மின்சார உற்பத்தியை அதிகரிக்கும் முக்கிய திட்டமாகும். ஆனால், இதுபோன்ற விபத்துகள் தொழிலாளர்களின் பாதுகாப்பு குறித்த கேள்விகளை எழுப்பியுள்ளன. விசாரணை அறிக்கை விரைவில் வெளியாகும் என எதிர்பார்க்கப்படுகிறது. சம்பவ இடத்தில் தற்போது பணிகள் தற்காலிகமாக நிறுத்தப்பட்டுள்ளன. 

இதையும் படிங்க: பெட்டிகளில் சிமெண்ட் மூட்டைகள்..!! திடீரென ஆற்றுப்பாலத்தில் தடம் புரண்ட சரக்கு ரயில்..!! பீகாரில் பரபரப்பு..!!