நான் ஓடிப்போகவில்லை! இந்தியாவுக்கு திரும்பாதது ஏன்? விஜய் மல்லையா வெளியிட்ட அதிர்ச்சி விளக்கம்!

லண்டன்: இந்திய வங்கிகளில் ஆயிரக்கணக்கான கோடி ரூபாய் கடன் பெற்று திருப்பிச் செலுத்தாதது தொடர்பான வழக்குகளை எதிர்கொண்டு வரும் தொழிலதிபர் விஜய் மல்லையா, தான் வேண்டுமென்றே இந்தியாவுக்கு திரும்புவதைத் தவிர்க்கவில்லை என்று தெரிவித்துள்ளார். மேலும், பிரிட்டனை விட்டு வெளியேற தனக்கு சட்டப்பூர்வமாகத் தடை இருப்பதாகவும் அவர் கூறியுள்ளார்.

விஜய் மல்லையா மீது பல்வேறு வங்கிகளில் சுமார் ரூ.9,000 கோடி அளவுக்கு கடன் பெற்று மோசடி செய்ததாக வழக்குகள் தொடரப்பட்டன. இதையடுத்து, 2016-ம் ஆண்டு அவர் பிரிட்டனுக்கு சென்றார். பின்னர், 2019-ல் தப்பியோடிய பொருளாதார குற்றவாளியாக அவர் அறிவிக்கப்பட்டார். அவரை இந்தியாவுக்கு நாடு கடத்துவதற்கான சட்ட நடவடிக்கைகள் தொடர்ந்து மேற்கொள்ளப்பட்டு வருகின்றன.

இந்த நிலையில், தனது நிலைப்பாட்டை விளக்கும் வகையில் விஜய் மல்லையா சமூக வலைதளத்தில் பதிவு ஒன்றை வெளியிட்டுள்ளார். அதில், தனது வழக்கு தொடர்பாக மும்பை நீதிமன்றத்தில் அமலாக்கத்துறை தாக்கல் செய்துள்ள பிரமாணப் பத்திரத்தை சுட்டிக்காட்டியுள்ளார்.

இதையும் படிங்க: டெல்லியை உலுக்கிய பயங்கரம்! 6 மாடி கட்டடம் திடீரென இடிந்து விழுந்து 6 பேர் பலி! உரிமையாளர் மீது வழக்கு!

அந்த ஆவணத்தில், 2021-ம் ஆண்டிலேயே தன்னுடைய ரூ.14,131.60 கோடி மதிப்பிலான சொத்துக்கள் பறிமுதல் செய்யப்பட்டதாக தெரிவிக்கப்பட்டுள்ளதாக மல்லையா கூறியுள்ளார். அதே நேரத்தில், தன்னை தொடர்ந்து வங்கி மோசடியாளர் என்றும், நாட்டை விட்டு தப்பிச் சென்றவர் என்றும் கூறுவதாக அவர் தனது பதிவில் தெரிவித்துள்ளார்.

மேலும், 1992-ம் ஆண்டு முதல் பிரிட்டனில் நிரந்தரமாக வசித்து வருவதாகவும், இந்தியாவுக்கு திரும்புவதை தான் திட்டமிட்டு தவிர்க்கவில்லை என்றும் மல்லையா குறிப்பிட்டுள்ளார். பிரிட்டனை விட்டு வெளியேறுவதற்கு தனக்கு சட்டரீதியான கட்டுப்பாடுகள் இருப்பதாகவும் அவர் தெரிவித்துள்ளார்.

தனது விவகாரத்தில் இந்திய அரசு தனக்கு மிகப்பெரிய அநீதி இழைத்துள்ளதாகவும் விஜய் மல்லையா குற்றம்சாட்டியுள்ளார்.

மல்லையாவின் இந்தப் பதிவு, நீண்டகாலமாக நீடித்து வரும் அவரது வழக்கு விவகாரத்தில் மீண்டும் கவனத்தை ஈர்த்துள்ளது. அவரது குற்றச்சாட்டுகள் தொடர்பாக அதிகாரப்பூர்வ தரப்பின் விரிவான பதில் வெளியாகும் நிலையில், இந்த விவகாரத்தில் அடுத்தகட்ட சட்ட நடவடிக்கைகள் என்னவாக இருக்கும் என்ற எதிர்பார்ப்பு எழுந்துள்ளது.

இதையும் படிங்க: சாத்தூர் பட்டாசு ஆலை வெடி விபத்து! அமைச்சர் வன்னி அரசின் சகோதரி உட்பட 4 பேர் மீது வழக்கு!