எங்கள் எம்.எல்.ஏ-க்களை தூக்கியபோதே உங்கள் ஆட்சி திருட்டு ஆட்சி: எடப்பாடி பழனிசாமி விளாசல்!

"லஞ்சம் இல்லை, ஊழல் இல்லாத தூய்மையான ஆட்சி நடத்துகிறோம் என்று தம்பட்டம் அடிக்கும் தமிழ்நாடு முதலமைச்சர் திரு. ஜோசப் விஜய் அவர்களே, எப்போது அதிமுகவின் சட்டமன்ற உறுப்பினர்களை விலைக்கு வாங்கித் தூக்கினீர்களோ, அன்றைக்கே உங்கள் ஆட்சி ஒரு அப்பட்டமான 'திருட்டு ஆட்சி' என்பது வெட்டவெளிச்சமாகிவிட்டது" என்று அனைத்திந்திய அண்ணா திராவிட முன்னேற்றக் கழகப் பொதுச்செயலாளரும் சட்டமன்ற எதிர்க்கட்சித் தலைவருமான  எடப்பாடி கே. பழனிசாமி இன்று தாராபுரம் தேர்தல் பிரச்சாரக் களத்தில் மிகக் காரசாரமாக இடிமுழக்கமிட்டுள்ளார்.

திருப்பூர் மாவட்டம் தாராபுரம் சட்டமன்றத் தொகுதி இடைத்தேர்தலில் அதிமுக வேட்பாளரை ஆதரித்துப் பிரம்மாண்ட பொதுக்கூட்டத்தில் கலந்துகொண்டு உரையாற்றிய எடப்பாடி பழனிசாமி, ஆளும்கட்சியான தமிழக வெற்றிக் கழகத்தின் (தவெக) போலி நேர்மையையும் ஊழல்களையும் அக்குவேறு ஆணிவேறாகத் தோலுரித்துக் காட்டினார். 

அப்போது பேசிய அவர், "மக்களிடம் சென்று லஞ்சம் இல்லை, ஊழல் இல்லை, எங்கள் ஆட்சி மிகவும் தூய்மையான ஆட்சி என்று முதலமைச்சர் விஜய் தொடர்ந்து பேசி வருகிறார்; ஜனநாயக முறைப்படி மக்களால் தேர்ந்தெடுக்கப்பட்ட அதிமுகவின் மக்கள் பிரதிநிதிகளைக் கோடிக்கணக்கான ரூபாய் பேரம் பேசி தங்களது கட்சிக்கு இழுத்து, இடைத்தேர்தலைத் திணித்தபோதே உங்கள் ஆட்சியின் சாயம் வெளுத்து, அது ஒரு திருட்டு ஆட்சி என்பது மக்களுக்குப் புரிந்துவிட்டது" என்று கடுமையாகச் சாடினார்.

இதையும் படிங்க: தவெக எம்எல்ஏவை சூழ்ந்த மக்கள்.. கூட்டத்தில் திடீர் கல் வீச்சு!! பரபரப்பு சம்பவம்!!

தவெக அரசு தொடரக் காரணமாக இருக்கும் கூட்டணிக் கட்சியான மார்க்சிஸ்ட் கம்யூனிஸ்ட் கட்சியின் மாநிலச் செயலாளர் சண்முகத்தின் பேச்சையே ஆதாரமாகச் சுட்டிக்காட்டிய எடப்பாடி பழனிசாமி, "மதுராந்தகம் இடைத்தேர்தல் களத்தில் சிபிஎம் மாநிலச் செயலாளர் தோழர் சண்முகம் வீடு வீடாகச் சென்று துண்டுப் பிரசுரம் கொடுத்து வாக்கு சேகரித்தபோது, அங்கிருந்த பொதுமக்கள் அவரிடம் வெளிப்படையாகவே பணம் கேட்டுள்ளனர். 

அதற்கு அவர் 'பணம் கொடுப்பது எங்களுக்குப் பழக்கமில்லையே' என்று கூறியதற்கு, அந்த மக்கள் 'தவெக ஆட்சியில் தவெக கட்சியினர் ஓட்டுக்கு நிறையப் பணம் கொடுக்கிறார்கள், வாரி இறைக்கிறார்கள்' என்று பதிலளித்ததாக, இந்த ஆட்சி நீடிக்கக் காரணமாக உள்ள கூட்டணிக் கட்சித் தலைவரான சிபிஎம் சண்முகமே இன்று பகிரங்கமாகக் குற்றம்சாட்டியுள்ளார்; உங்கள் கூட்டணிக் கட்சித் தலைவரே உங்கள் பணப்பட்டுவாடாவை அம்பலப்படுத்திவிட்டாரே, இதற்கு முதல்வர் விஜய் என்ன பதில் சொல்லப் போகிறார்?" என்று கேள்வி எழுப்பினார்.

மேலும், தவெகவின் தேர்தல் முறைகேடுகளை அம்பலப்படுத்திய அவர், "தவெக வேட்பாளர்கள் நின்ற பல தொகுதிகளில் வாக்காளர்களுக்கு ஓட்டுக்கு ரூ.2,000 வரை பணத்தை அள்ளிக் கொடுத்துதான் வெற்றி பெற்றனர்; ஆனால், வெளியே பேசும்போது தாங்கள் வாக்குக்குப் பணம் கொடுக்காமல் ஏதோ மக்களுக்காகவே நேர்மையாக வெற்றி பெற்றது போலப் பச்சைப் பொய்யைப் பிரச்சாரம் செய்து மக்களை ஏமாற்றி வருகின்றனர். 

லஞ்சம் இல்லாமல் ஆட்சி நடப்பதாக முதல்வர் மார்தட்டுகிறார், ஆனால் அண்மையில் லஞ்ச ஒழிப்புத்துறை நடத்திய திடீர் சோதனைகளில் மட்டும் மாநிலம் முழுவதும் 32 அரசு அலுவலகங்களில் கோடிக்கணக்கான ரூபாய் கணக்கில் வராத லஞ்சப் பணம் கட்டுக்கட்டாகப் பறிமுதல் செய்யப்பட்டுள்ளது; லஞ்சம் இல்லாமலா அரசு அலுவலகங்களில் கோடிக்கணக்கில் பணம் பிடிபடுகிறது? லஞ்சம் இல்லாமலா உங்களுக்கு ஆதரவாக இருக்கும் கம்யூனிஸ்ட் கட்சியே பணப்பட்டுவாடா நடப்பதாகப் பகிரங்கமாகக் குற்றம்சாட்டுகிறது? உங்கள் போலி முகமூடி தாராபுரம் மற்றும் மதுராந்தகம் இடைத்தேர்தல் முடிவுகளில் முற்றிலுமாகச் சுக்குநூறாக உடையும்" என்று எடப்பாடி பழனிசாமி ஆவேசமாகத் தெரிவித்தார்.

இதையும் படிங்க: எம்எல்ஏக்களை விலைக்கு வாங்கி ஆட்சி.. தவெக வீழ்ச்சிக்கு இடைத்தேர்தலே தொடக்கம்: உதயநிதி ஆவேசம்!