முதியோர் ஓய்வூதியத்திற்கு ஆதார் கட்டாயமா? மூத்த குடிமக்கள் அவதி... சிபிஎம் கண்டனம்!

முதியோர் ஓய்வூதியம் பெறுவதற்கு, ஆதார் எண் இணைக்கப்பட்ட வங்கிக் கணக்கில்தான் பணம் வரவு வைக்கப்படும் என்ற அரசின் திடீர் கெடுபிடியால் பல்லாயிரக்கணக்கான மூத்த குடிமக்கள் சொல்லொணாத் துயரத்திற்கு ஆளாகியுள்ளதாகவும், உடனே இந்த நிபந்தனையைக் கைவிட்டு வழக்கம் போல முதியோருக்கு ஓய்வூதியம் கிடைக்க அரசு வழிவகை செய்ய வேண்டும் என்றும் மார்க்சிஸ்ட் கம்யூனிஸ்ட் கட்சியின் மாநிலச் செயலாளர் பி.சண்முகம் வலியுறுத்தியுள்ளார்.

தமிழ்நாட்டில் சமூகப் பாதுகாப்புத் திட்டத்தின் கீழ் ஏழை எளிய முதியோர்கள், மாற்றுத்திறனாளிகள் மற்றும் விதவைகளுக்கு மாதாந்திர முதியோர் ஓய்வூதியத் தொகை அரசு கருவூலத்தின் மூலம் வழங்கப்பட்டு வருகிறது.
இந்நிலையில், முதியோர் ஓய்வூதியம் இனி ஆதார் இணைக்கப்பட்ட வங்கிக் கணக்குகளில் மட்டுமே வரவு வைக்கப்படும் என்று தமிழ்நாடு அரசு அண்மையில் அறிவித்து, அதனைத் தீவிரமாக நடைமுறைப்படுத்த முயன்று வருகிறது.

அரசின் இந்தத் திடீர் நிபந்தனையின் காரணமாக, ஆதார் விவரங்கள் இணைக்கப்படாத வங்கிக் கணக்குகள் மற்றும் ஆதார் அட்டைக்கும் வங்கிக் கணக்குப் புத்தகத்திற்கும் இடையே உள்ள பெயர்களில் நிலவும் சிறிய எழுத்துப் பிழைகள் போன்ற காரணங்களால் பல்லாயிரக்கணக்கான மூத்த குடிமக்களுக்கு மாதாந்திர ஓய்வூதியம் அதிரடியாகத் தடைபட்டுள்ளது. இதனால் அன்றாட மருந்து மாத்திரைகளுக்கும் உணவுக்கும் தவித்து வரும் முதியோர்கள், உதவித்தொகை வங்கிக் கணக்கில் வரவு வைக்கப்படாததைக் கண்டு செய்வதறியாது திகைத்து, தாலுகா மற்றும் வட்டாட்சியர் அலுவலகங்களை நோக்கிப் பெருந்திரளாகப் படையெடுத்து முறையிட்டு வருகின்றனர்.

இதையும் படிங்க: மாணவர்களுக்கு மிதிவண்டி.. தமிழக அரசின் டெண்டரில் மாற்றம்..! அக்.13 வரை நீட்டிப்பு..!!

சுட்டெரிக்கும் கடுமையான வெயில் நிலவும் இச்சூழலில், தள்ளாத வயதில் முதியோர்கள் இப்படி அலைக்கழிக்கப்படுவது அவர்களின் உடல்நலனை மிகக் கடுமையாகப் பாதிக்கும் என பி.சண்முகம் வேதனை தெரிவித்துள்ளார். மேலும், கிராமப்புறங்களில் உள்ள ஆதார் சேவை மையங்களுக்கும், தொலைவில் உள்ள வங்கிக் கிளைகளுக்கும் முதியோர்களைத் துணைக்கு அழைத்துச் செல்ல ஆட்கள் இல்லாத ஏழை எளிய முதியவர்கள் கடும் இன்னல்களை எதிர்கொண்டு வருகின்றனர்.

இந்தத் திடீர் அறிவிப்பு மூத்த குடிமக்களுக்குத் தீராத மன உளைச்சலையும், உடல்ரீதியான அலைச்சலையும் ஏற்படுத்தி இருப்பதை தமிழ்நாடு அரசு உடனடியாகக் கவனத்தில் கொள்ள வேண்டும் என்று மார்க்சிஸ்ட் கம்யூனிஸ்ட் கட்சியின் மாநிலச் செயற்குழு சுட்டிக்காட்டியுள்ளது.

ஆகவே, முதியோர் ஓய்வூதியம் பெறுவதற்கு வங்கிக் கணக்குடன் ஆதார் இணைப்பதை எக்காரணம் கொண்டும் கட்டாயமாக்கக் கூடாது என்றும், ஏழை முதியவர்களின் துயரத்தைப் போக்க இந்நிபந்தனையை உடனடியாகத் திரும்பப் பெற வேண்டும் என்றும் சிபிஎம் மாநிலச் செயலாளர் பி.சண்முகம் கேட்டுக்கொண்டுள்ளார்.

இதையும் படிங்க: காலை உணவு திட்டம்..! "உணவு பரிமாறும் முன்பு இது கட்டாயம்..!! ஆசிரியர்களுக்கு அதிரடி உத்தரவு.!!