மணிப்பூர் முதலமைச்சராகிறார் யும்னாம் கேம்சந்த் சிங்! ஜனாதிபதி ஆட்சி முடிவுக்கு வருகிறது!

மணிப்பூர் மாநிலத்தின் புதிய முதலமைச்சராக யும்னாம் கேம்சந்த் சிங் அவர்கள் இன்று முறைப்படி தேர்வு செய்யப்பட்டுள்ளார். ஓராண்டு காலமாக நீடித்து வந்த ஜனாதிபதி ஆட்சி முடிவுக்கு வரும் நிலையில், மணிப்பூரில் மீண்டும் மக்களால் தேர்ந்தெடுக்கப்பட்ட அரசு அமையவிருப்பது அரசியல் வட்டாரத்தில் பெரும் வரவேற்பைப் பெற்றுள்ளது.

வன்முறை மற்றும் இன மோதல்களால் ஸ்தம்பித்திருந்த மணிப்பூரில் மீண்டும் அமைதியை நிலைநாட்டும் நோக்கில், புதிய அரசை அமைப்பதற்கான பணிகளை பாஜக தலைமை முன்னெடுத்தது. இன்று நடைபெற்ற பாஜக சட்டமன்ற உறுப்பினர்களின் கூட்டத்தில்  முக்கிய முடிவுகள் எடுக்கப்பட்டுள்ளன.

இதையும் படிங்க: டெல்லியில் பாஜக மேலிடம் ஆலோசனை! அண்ணாமலை, எச். ராஜாவிற்கு பதில் புதிய பொறுப்பாளர்கள் நியமனம்!

மத்திய பார்வையாளராக நியமிக்கப்பட்ட பாஜக தேசிய பொதுச் செயலாளர் தருண் சுக் முன்னிலையில், இம்பாலில் இன்று பாஜக எம்.எல்.ஏ.-க்கள் கூட்டம் நடைபெற்றது. இந்தக் கூட்டத்தில், முன்னாள் சபாநாயகரும் மூத்த தலைவருமான யும்னாம் கேம்சந்த் சிங், பாஜக சட்டமன்றக் குழுத் தலைவராக ஒருமனதாகத் தேர்ந்தெடுக்கப்பட்டார். மணிப்பூரில் நிலவிய அரசியல் முட்டுக்கட்டையை உடைக்கும் வகையில், அனைத்துத் தரப்பினரும் ஏற்றுக்கொள்ளக்கூடிய ஒரு தலைவராக அவர் அடையாளம் காணப்பட்டுள்ளார்.

கடந்த 2025-ஆம் ஆண்டு பிப்ரவரி மாதம் அமல்படுத்தப்பட்ட ஜனாதிபதி ஆட்சி, தற்போது கேம்சந்த் சிங்கின் தேர்வோடு முடிவுக்கு வருகிறது. இன்னும் ஓரிரு நாட்களில் அவர் ஆளுநரைச் சந்தித்து ஆட்சி அமைக்க உரிமை கோர உள்ளார். பிப்ரவரி 12-ஆம் தேதிக்குள் புதிய அமைச்சரவை பதவியேற்பதற்கான ஏற்பாடுகள் தீவிரமாக நடைபெற்று வருகின்றன. முன்னாள் முதல்வர் என். பிரேன் சிங் உள்ளிட்ட முக்கியத் தலைவர்கள் கேம்சந்த் சிங்கின் தேர்வுக்குத் தங்களது வாழ்த்துகளைத் தெரிவித்துள்ளனர்.

புதிய முதலமைச்சராகப் பதவியேற்க உள்ள கேம்சந்த் சிங் முன், மாநிலத்தில் அமைதியை மீட்டெடுப்பது மற்றும் இடம்பெயர்ந்த மக்களின் மறுவாழ்வு போன்ற பெரும் சவால்கள் காத்திருக்கின்றன. குறிப்பாக, பள்ளத்தாக்கு மற்றும் மலைவாழ் மக்களின் நம்பிக்கையைப் பெற்று, ஒருமித்த வளர்ச்சியை உறுதி செய்வதே அவரது அரசின் முதன்மையான இலக்காக இருக்கும் என்று எதிர்பார்க்கப்படுகிறது.

இதையும் படிங்க: 2026-ல் திமுக ஒண்ணுமே இல்லாமல் போகும்! பட்ஜெட்டை விமர்சித்த முதல்வருக்கு நைனார் நாகேந்திரன் பதிலடி!