யாரும் பின்வாங்க வேண்டாம்!! சோனம் வாங்சுக்கை தொடர்ந்து உண்ணாவிரதத்தில் குதித்த அபிஜித் திப்கே!

நீட் தேர்வு முறைகேடு உள்ளிட்ட விவகாரங்களுக்கு பொறுப்பேற்று மத்திய கல்வி அமைச்சர் தர்மேந்திர பிரதான் பதவி விலக வேண்டும் என்ற கோரிக்கையை வலியுறுத்தி டெல்லியில் நடைபெற்று வரும் போராட்டம் புதிய கட்டத்தை எட்டியுள்ளது. இந்த போராட்டத்தை முன்னெடுத்து வரும் கரப்பான்பூச்சி ஜனதா கட்சியின் நிறுவனர் அபிஜித் திப்கே, இன்று முதல் காலவரையற்ற உண்ணாவிரதப் போராட்டத்தை தொடங்குவதாக அறிவித்துள்ளார்.

ஜூன் 20 முதல் டெல்லி ஜந்தர் மந்தரில் நடைபெற்று வரும் இந்த போராட்டத்தில், நீட் தேர்வு வினாத்தாள் கசிவு, தேர்வு முறைகேடுகள் மற்றும் கல்வி நிர்வாகத்தில் பொறுப்புணர்வு வேண்டும் என்ற கோரிக்கைகள் தொடர்ந்து வலியுறுத்தப்பட்டு வருகின்றன. இந்த நிலையில், போராட்டத்தை மேலும் தீவிரப்படுத்தும் வகையில் அபிஜித் திப்கே தனது புதிய முடிவை அறிவித்துள்ளார்.

ஆதரவாளர்களிடம் பேசிய அவர், இன்று முதல் தனது காலவரையற்ற உண்ணாவிரதத்தை தொடங்குவதாக தெரிவித்தார். மேலும், போராட்டத்தில் ஈடுபட்டுள்ள யாரும் மனம் தளர்ந்து பின்வாங்கக் கூடாது என்றும், இந்த இயக்கம் இன்னும் பெரிய மக்கள் இயக்கமாக வளர வேண்டும் என்றும் கூறினார்.

இதையும் படிங்க: 21 நாட்கள் உண்ணாவிரதம்! மோசமானது உடல்நிலை!! சோனம் வாங்சுக் வலுக்கட்டாயமாக மருத்துவமனையில் அனுமதி!

ஜூலை 20-ஆம் தேதி திட்டமிட்டபடி நாடாளுமன்றம் நோக்கி அமைதியான பேரணி நடைபெறும் என்றும், அதில் அதிகமானோர் கலந்து கொள்ள வேண்டும் என்றும் அவர் அழைப்பு விடுத்தார்.

இந்த அறிவிப்பு வெளியாகும் முன்பே, போராட்டத்தில் கலந்து கொண்டிருந்த சுற்றுச்சூழல் ஆர்வலர் சோனம் வாங்சுக் 21 நாட்களாக தொடர்ச்சியாக உண்ணாவிரதத்தில் இருந்ததால் உடல்நிலை பாதிக்கப்பட்டது. இதையடுத்து டெல்லி காவல்துறையினர் அவரை மருத்துவமனைக்கு அழைத்துச் சென்று அனுமதித்தனர். இந்த சம்பவம் போராட்டக்காரர்களிடையே பெரும் பரபரப்பை ஏற்படுத்தியது.

சோனம் வாங்சுக் மருத்துவமனையில் அனுமதிக்கப்பட்ட நிலையில், போராட்டம் தளராமல் தொடரும் என்ற வகையில் அபிஜித் திப்கே காலவரையற்ற உண்ணாவிரதத்தை அறிவித்திருப்பது கவனத்தை ஈர்த்துள்ளது.

ஜூலை 20-ஆம் தேதி நடைபெற உள்ள பேரணியை முன்னிட்டு ஜந்தர் மந்தர் பகுதியில் பாதுகாப்பு ஏற்பாடுகளும் பலப்படுத்தப்பட்டுள்ளன. இந்த போராட்டத்தின் அடுத்தகட்ட நகர்வுகள் தேசிய அளவில் அரசியல் மற்றும் கல்வி வட்டாரங்களில் கவனத்தை ஈர்த்துள்ளன.

இதையும் படிங்க: தமிழகத்தின் நீட் டாப்பர்! தேசிய அளவில் 12வது இடம்... யார் இந்த வெங்கடபதி வேலாயுதம்?