17 நாட்களில் அதிரடி மாற்றம்! மத்திய உயர்கல்விச் செயலாளர் பதவியில் புதிய முகம்? யார் இந்த தீப்தி கவுர் முகர்ஜி?

புதுடில்லி: மத்திய கல்வி அமைச்சகத்தின் உயர்கல்வித் துறை செயலாளர் பதவியில் அதிரடி மாற்றம் செய்யப்பட்டுள்ளதாக தகவல் வெளியாகியுள்ளது. கடந்த ஜூலை 23-ம் தேதி அந்தப் பதவிக்கு நியமிக்கப்பட்ட நரேஷ் பால் கங்வார், வெறும் 17 நாட்களிலேயே மாற்றப்பட்டுள்ளார். அவருக்கு பதிலாக 1993-ம் ஆண்டு பேட்ச் ஐஏஎஸ் அதிகாரியான தீப்தி கவுர் முகர்ஜி புதிய உயர்கல்விச் செயலாளராக நியமிக்கப்பட்டுள்ளார்.

நீட் தேர்வு வினாத்தாள் கசிவு உள்ளிட்ட விவகாரங்களும், மாணவர்களின் தொடர் போராட்டங்களும் மத்திய கல்வி அமைச்சகத்தில் பரபரப்பை ஏற்படுத்தியிருந்த நிலையில், உயர்கல்வித் துறையில் அடுத்தடுத்து நிர்வாக மாற்றங்கள் மேற்கொள்ளப்பட்டு வருகின்றன. இதன் ஒரு பகுதியாக, உயர்கல்விச் செயலாளராக இருந்த வினீத் ஜோஷி கடந்த ஜூலை 23-ம் தேதி மாற்றப்பட்டு, அவருக்கு பதிலாக நரேஷ் பால் கங்வார் நியமிக்கப்பட்டார்.

ஆனால், பதவியேற்ற 17 நாட்களிலேயே கங்வார் அந்தப் பொறுப்பில் இருந்து மாற்றப்பட்டுள்ளார். அவரது குடும்பத்தினர் அரசு திட்டத்தின் கீழ் மானியம் பெற்றது தொடர்பாக சமூக வலைதளங்களில் எழுந்த விமர்சனங்களும் எதிர்ப்புகளும் இந்த மாற்றத்துக்கு காரணமாக இருக்கலாம் என சில வட்டாரங்கள் தெரிவிக்கின்றன. இருப்பினும், இந்த காரணம் தொடர்பாக அதிகாரப்பூர்வமாக உறுதிப்படுத்தப்பட்ட தகவல் வெளியாகவில்லை.

இதையும் படிங்க: மாணவர்கள் படிக்க சிறந்த நகரங்கள் பட்டியல் வெளியீடு... பெங்களூரு, மும்பையுடன் போட்டி போடும் சென்னை!

இதையடுத்து, மத்திய அரசின் மூத்த அதிகாரியான தீப்தி கவுர் முகர்ஜி உயர்கல்விச் செயலாளராக பொறுப்பேற்றுள்ளார். 1993-ம் ஆண்டு பேட்ச் ஐஏஎஸ் அதிகாரியான இவர், மத்திய அரசின் பல்வேறு முக்கிய துறைகளில் பணியாற்றிய அனுபவம் கொண்டவர்.

குறிப்பாக, மத்திய பெருநிறுவன விவகாரங்கள் அமைச்சகத்தின் செயலாளராக தீப்தி கவுர் முகர்ஜி பணியாற்றியுள்ளார். மேலும், தேசிய சுகாதார ஆணையம் உள்ளிட்ட முக்கிய அமைப்புகளிலும் பொறுப்புகளை வகித்துள்ளார்.

மத்திய கல்வி அமைச்சகத்தில் தற்போது நீட் உள்ளிட்ட போட்டித் தேர்வுகள், உயர்கல்வி நிறுவனங்களின் நிர்வாகம், மாணவர் நலன் மற்றும் கல்விக் கொள்கை சார்ந்த பல்வேறு முக்கிய விவகாரங்கள் கவனம் பெற்றுள்ளன. இந்த சூழலில் அனுபவம் வாய்ந்த மூத்த ஐஏஎஸ் அதிகாரி உயர்கல்விச் செயலாளராக நியமிக்கப்பட்டிருப்பது முக்கியத்துவம் பெற்றுள்ளது.

வெறும் 17 நாட்களில் உயர்கல்விச் செயலாளர் மாற்றப்பட்டிருப்பது மத்திய கல்வி அமைச்சகத்தில் மீண்டும் கவனத்தை ஈர்த்துள்ள நிலையில், புதிய செயலாளரின் தலைமையில் உயர்கல்வித் துறையில் அடுத்தகட்ட நடவடிக்கைகள் எப்படி இருக்கும் என்ற எதிர்பார்ப்பு எழுந்துள்ளது.

இதையும் படிங்க: "உயர்கல்வித் துறையில் இனி லஞ்சம் இருக்காது".. 60 நாட்களில் புதிய மாற்றங்கள்! அமைச்சர் விஸ்வநாதன் அதிரடி!