ஊடக விவாதங்களில் பங்கேற்க வேண்டாம்! தவெகவினருக்கு புஸ்ஸி ஆனந்த் அதிரடி உத்தரவு!

தமிழகச் சட்டமன்றத் தேர்தல் களம் சூடுபிடிக்கத் தொடங்கியுள்ள நிலையில், நடிகர் விஜய் தலைமையிலான தமிழக வெற்றிக் கழகம் (தவெக) தனது நிர்வாகிகளுக்கும் தொண்டர்களுக்கும் புதிய கட்டுப்பாடுகளை விதித்துள்ளது. கட்சியின் பொதுச்செயலாளர் புஸ்ஸி ஆனந்த் வெளியிட்டுள்ள முக்கிய அறிவிப்பில், கட்சி நிர்வாகிகள் யாரும் அனுமதியின்றி ஊடக விவாதங்களில் பங்கேற்கக் கூடாது என அதிரடியாக உத்தரவிட்டுள்ளார்.

தொலைக்காட்சி விவாதங்கள் மற்றும் சமூக ஊடக நேர்காணல்களில் தவெக சார்பில் பங்கேற்கக் கட்சியின் அதிகாரப்பூர்வ செய்தித் தொடர்பாளர்களுக்கு மட்டுமே அனுமதி வழங்கப்பட்டுள்ளது. மற்ற நிர்வாகிகள் தன்னிச்சையாகக் கட்சியின் பெயரில் விவாதங்களில் பங்கேற்று கருத்துகளைப் பகிரக் கூடாது என அறிவுறுத்தப்பட்டுள்ளது. கட்சியின் கொள்கைகளுக்கும், தலைமையின் முடிவுகளுக்கும் முரணானத் தகவல்கள் பரவுவதைத் தவிர்க்கவே இந்தக் கட்டுப்பாடு விதிக்கப்பட்டுள்ளது. இந்த உத்தரவை மீறிச் செயல்படுவோர் மீது கட்சி ரீதியான ஒழுங்கு நடவடிக்கை எடுக்கப்படும் எனப் புஸ்ஸி ஆனந்த் எச்சரித்துள்ளார்.

இதையும் படிங்க: வசனம் பேசலாம்.. ஆனால் வாக்கு விழாது! விஜய் மற்றும் தவெக-வை விமர்சித்த வானதி சீனிவாசன்!

தவெக நிர்வாகிகள் சிலர் அவ்வப்போது சர்ச்சைக்குரிய வகையில் கருத்துகளைத் தெரிவிப்பதும், அது ஊடகங்களில் விவாதப் பொருளாக மாறுவதும் கட்சிக்குச் சங்கடத்தை ஏற்படுத்தி வந்தது. குறிப்பாக, தவெகவின் 2026 தேர்தல் வியூகங்கள் குறித்து அதிகாரப்பூர்வமற்றத் தகவல்கள் வெளியாவதைத் தடுக்கவே இந்த "செக்" வைக்கப்பட்டுள்ளது. தேர்தல் நெருங்கும் வேளையில், மற்ற அரசியல் கட்சிகளின் விமர்சனங்களுக்குப் பதில் அளிக்கும்போது மிகவும் நிதானமாகவும், தலைமை வகுத்துக் கொடுக்கும் வரம்பிற்குள்ளும் பேச வேண்டும் என்பதே விஜய்யின் கட்டளையாக இருப்பதாகக் கூறப்படுகிறது.

தமிழக வெற்றிக் கழகம் தனது உட்கட்சி ஒழுங்கைச் சரிசெய்ய எடுத்து வரும் இந்த அதிரடி நடவடிக்கை, அரசியல் வட்டாரத்தில் பேசுபொருளாகியுள்ளது.

இதையும் படிங்க: விஜய்க்கு வலுக்கும் ஆதரவு.... தவெக-வுக்கு எம்ஜிஆர் அதிமுக நிபந்தனையற்ற ஆதரவு!