அதிமுக கட்டமைப்பை திருட விஜய் பார்க்கிறார்! முன்னாள் அமைச்சர் ஆர்.பி.உதயகுமார் குற்றச்சாட்டு!

தமிழகத்தில் தற்பொழுது புதிதாக ஆட்சி அமைத்துள்ள தமிழக வெற்றிக் கழகத்திற்கு எவ்வித அடிப்படை உள்கட்டமைப்போ அல்லது கட்டமைப்போ கிடையாது; நமது இயக்கத்தில் இருப்பது போன்ற அசுரக் கட்டமைப்பை அவர்கள் உருவாக்க இன்னும் ஆயிரம் ஆண்டுகள் ஆகும் என்பதால், அடுத்த கட்சியின் உள்கட்டமைப்பை ஆட்டையைப் போடலாம் என்று முதலமைச்சர் விஜய் முயன்று வருகிறார் என்று அதிமுக முன்னாள் அமைச்சரும், தற்போதைய சட்டமன்ற எதிர்க்கட்சித் துணைத் தலைவருமான ஆர்.பி.உதயகுமார் அவர்கள் மிகக் காரசாரமான வாதங்களை முன்வைத்துக் குற்றம் சாட்டியுள்ளார்.

கடந்த சட்டமன்றத் தேர்தல் முடிவுகளுக்குப் பிறகு, தமிழ்நாட்டில் அதிமுகவின் முக்கியச் சட்டமன்ற உறுப்பினர்கள் மற்றும் முன்னாள் நிர்வாகிகள் தங்களது பதவிகளைத் ராஜினாமா செய்துவிட்டு, அசுர வேகத்தில் தவெகவில் இணைந்து வருவது தமிழக அரசியல் வட்டாரங்களில் பெரும் புயலைக் கிளப்பியுள்ளது. தவெகவின் இந்தத் திட்டமிட்ட அரசியல் கரைப்பு உத்திகள் குறித்து மதுரை டி.கல்லுப்பட்டியில் செய்தியாளர்களைச் சந்தித்த ஆர்.பி.உதயகுமார், அதிமுகவின் உள்கட்டமைப்புக் பலம் மற்றும் தற்போதைய தவெக அரசின் செயல்பாடுகள் குறித்த அனல் பறக்கும் வாதங்களைப் பதிவு செய்தார்.

செய்தியாளர்கள் சந்திப்பில் ஆர்.பி.உதயகுமார் தனது கொள்கை விளக்க உரையில், அதிமுக என்பது புரட்சித் தலைவர் எம்.ஜி.ஆர் மற்றும் இதயதெய்வம் புரட்சித்தலைவி அம்மா அவர்களால் ரத்தமும் சதையுமாக வளர்க்கப்பட்ட ஒரு மாபெரும் இரும்புக்கோட்டை ஆகும். தற்காலிக அரசியல் லாபங்களுக்காகவும், ஆசைவார்த்தைகளுக்கு இணங்கியும் சிலர் சுயநல ஆதாயத்திற்காகக் கட்சியை விட்டு வெளியேறுவதால் இந்த இயக்கம் எவ்வகையிலும் சிதைந்துவிடாது. இந்த இயக்கத்தின் கடைசித் தொண்டன் உயிரோடு இருக்கும் வரை, அதிமுகவைத் தொட்டுக் கூடப் பார்க்க முடியாது என்பதைப் புதிய ஆட்சியாளர்கள் புரிந்து கொள்ள வேண்டும். தவெகவில் தற்பொழுது மக்கள் செல்வாக்கோ அல்லது அடிமட்டத் தொண்டர் பலமோ இல்லை. அதனால்தான், தங்களது பலவீனத்தை மறைப்பதற்காக, 50 ஆண்டுகால வரலாற்றுப் புள்ளிவிவர விபரங்களைக் கொண்ட எங்களது வலுவான உள்கட்டமைப்பைத் திருட விஜய் பார்க்கிறார் என்று தெரிவித்தார்.

இதையும் படிங்க: அதிமுக எம்.எல்.ஏக்கள் ராஜினாமா பின்னணியில் தவெகவின் குதிரை பேரம்! ஆளுநரிடம் டாக்டர் கிருஷ்ணசாமி அதிரடி புகார்!

தற்போதைய ஆட்சி நிர்வாகக் குளறுபடிகளைச் சாடிய அவர், தேர்தல் வாக்குறுதிகளை நிறைவேற்றத் துப்பில்லாதவர்கள், எதிர்க்கட்சிகளை நுகர்வுப் பண்டமாக மாற்றித் தங்களுக்குள் கரைப்பதிலேயே முழு நேரத்தையும் செலவிட்டு வருகின்றனர். இந்தத் தவறான அரசியல் முன்உதாரணங்களை மக்கள் உன்னிப்பாகக் கவனித்துக் கொண்டுதான் இருக்கிறார்கள். அற்ப ஆசைகளுக்காகத் தாய் இயக்கத்திற்குத் துரோகம் இழைப்பவர்களுக்கு வரும் காலம் தகுந்த பாடத்தைப் புகட்டும் என்று தனது பேட்டியை நிறைவு செய்தார்.

இதையும் படிங்க: விஜய்யின் வெற்றி வெறும் கானல் நீர்! ஸ்ரீவில்லிபுத்தூரில் தவெக அரசை சாடிய ராஜேந்திரபாலாஜி!