வெங்காயம் போல தான் திமுக பட்ஜெட்! திருச்சியில் திண்டுக்கல் சீனிவாசன் பேட்டி!

திருச்சி சர்வதேச விமான நிலையத்தில் இன்று செய்தியாளர்களைச் சந்தித்த அதிமுக பொருளாளர் திண்டுக்கல் சீனிவாசன், தமிழகத்தின் தற்போதைய அரசியல் நகர்வுகள் குறித்துத் தனது பாணியில் கலகலப்பாகவும், அதே சமயம் காரசாரமாகவும் பதிலளித்தார். திமுக அரசு தாக்கல் செய்துள்ள இடைக்கால பட்ஜெட் என்பது வெங்காயத்தை உரிப்பதைப் போன்றது. உரித்துக்கொண்டே போனால் இறுதியில் உள்ளே ஒன்றும் இருக்காது; அதுபோலத்தான் இந்த பட்ஜெட்டும் இருக்கிறது” எனச் சாடினார்.

தேமுதிக திமுக கூட்டணியில் இணைந்தது குறித்த கேள்விக்கு, “அவர்கள் ஏற்கனவே யாரிடமும் பேசவில்லை எனச் சொல்லிவிட்டார்கள். எங்குப் போக வேண்டுமோ அங்குப் போய்விட்டார்கள். எங்களைப் பொறுத்தவரை திமுகவின் மக்கள் எதிர்ப்பு அலையை முன்னிறுத்தி தேர்தலைச் சந்திப்போம்” எனத் தெரிவித்தார். மதிமுக பொதுச்செயலாளர் வைகோவின் விமர்சனங்கள் குறித்துக் கேட்டபோது, “அவர் ஒரு அப்பிராணி, பாவம் வயது முதிர்ந்தவர். அவர் குறித்துக் கருத்துச் சொல்ல விரும்பவில்லை ” என மழுப்பினார்.

தமிழக வெற்றிக் கழகத் தலைவர் விஜய் குறித்துப் பேசிய அவர், தேர்தலுக்குப் பிறகுதான் விஜய்யின் உண்மையான சக்தி என்ன என்பது தெரியும். அமெரிக்காவில் செய்வது போல மக்களை நேரடியாகச் சந்திக்காமல் தொலைக்காட்சியிலேயே பிரச்சாரம் செய்யப் போகிறார் போலத் தெரிகிறது. அவர் என்ன ஐடியாவில் இருக்கிறார் என்பது அவருக்கே வெளிச்சம் என விமர்சித்தார். அதிமுக முன்னாள் பொதுச்செயலாளர் சசிகலா புதிய கட்சி ஆரம்பிக்க உள்ளதாக வரும் தகவல்கள் குறித்துக் கேட்டதற்கு, “அவர் கட்சி ஆரம்பிப்பாரா என்பதே தெரியாது. ஒருவேளை ஆரம்பித்த பிறகு கேட்டால் பதில் சொல்கிறேன்” எனக் கூறிச் சிரித்தார்.

இதையும் படிங்க: அதிமுக எம்பி சி.வி.சண்முகம் மீதான வழக்கு ரத்து..! சென்னை உயர்நீதிமன்றம் அதிரடி!

பிரதமர் மோடியின் தமிழக வருகை மற்றும் பாஜக உடனான தொகுதிப் பங்கீடு குறித்துப் பேசுகையில், “பிரதமர் மேடையில் ஏறும் போதுதான் யாரெல்லாம் கூட்டணியில் இருப்பார்கள் என்பது தெரியவரும். அரசியலில் அதிசயங்கள் நடக்கும், அதை இப்போது வெளியே சொல்ல மாட்டார்கள்” எனப் பொடி வைத்துப் பேசினார்.

மேலும், எடப்பாடி பழனிசாமி தலைமையில் "எடப்பாடி வெல்லட்டும், தமிழகம் முன்னேறட்டும்" என்ற முழக்கத்துடன் அதிமுக தேர்தலைச் சந்திக்கும் என்றும், திமுகவின் ₹5,000 தேர்தல் கால சிறப்புத் தொகையைக் கண்டு அதிமுக பயப்படாது என்றும் அவர் தனது பேட்டியில் உறுதிபடத் தெரிவித்தார்.

இதையும் படிங்க: இதயக்கனி படத்தைப் பார்த்த பின் இ.பி.எஸ் அதிரடி...! 2026 தேர்தல் களம் சூடுபிடிப்பு!