அதிமுக ஆட்சிக்கு வந்தால் மட்டுமே மெட்ரோ வரும்?! அண்ணாமலை பேச்சால் பரபரப்பு!

கோவை: தமிழகத்தில் திமுக ஆட்சி இருண்ட காலம் என்று பாஜக மாநில முன்னாள் தலைவர் அண்ணாமலை கடுமையாக விமர்சித்தார். கோவை காளப்பட்டி நேரு நகரில் நடந்த பாஜக சக்தி கேந்திரா தெருமுனை தேர்தல் பிரசார கூட்டத்தில் பேசிய அவர், "அ.தி.மு.க. ஆட்சிக்கு வந்தால் மட்டுமே கோவை மெட்ரோ ரயில் வரும். இதை மக்கள் புரிந்து கொள்ள வேண்டும்" என்று தீவிரமாக வலியுறுத்தினார்.

கூட்டத்தில் கவுண்டம்பாளையம் எம்எல்ஏ அருண்குமார், சிங்கை எம்எல்ஏ ஜெயராமன் உள்ளிட்டோர் கலந்து கொண்டனர். கோவை மாவட்ட பாஜக தலைவர் ரமேஷ் குமார் வரவேற்றார். அண்ணாமலை பேச்சின் முக்கிய பகுதிகள்:

பொதுமக்கள் தான் நடுநிலையுடன் ஓட்டளிப்பார்கள். அவர்களுக்கு உண்மையை எடுத்துச் சொல்ல தெருமுனை பிரசாரம் நடத்துகிறோம். தமிழகத்தில் இருண்ட ஆட்சி நடக்கிறது. 2006-2011 திமுக ஆட்சிக்கு மக்கள் தண்டனை கொடுத்தனர். 10 ஆண்டுகள் ஆட்சிக்கு வர முடியவில்லை. ஆனால் மீண்டும் வந்த பிறகு அதைவிட கொடுமையான ஆட்சி நடக்கிறது.

இதையும் படிங்க: அரசு பணிகளை விற்று கல்லா கட்டுகிறதா திமுக?!! விழா நடத்துவது தான் கேடு! வெளுத்து வாங்கும் நயினார்!!

கோவை பகுதியில் மின் கட்டண உயர்வால் 325 மில்கள் மூடப்பட்டுள்ளன. மின் கட்டணத்தை குறைத்து வேலைவாய்ப்பை உருவாக்கியிருக்க வேண்டும். கோவை மெட்ரோ ரயில் திட்டம் 34 கி.மீ. தூரம் கொண்டது. 

மத்திய அரசிடம் அளிக்கப்பட்ட திட்ட வரைவில் (DPR) தவறுகள் உள்ளன. மக்கள் தொகையை 20 லட்சத்துக்கு மேல் மாற்றி, கட்டணத்தை குறைக்க கோரியும் திமுக அரசு மாற்றித் தரவில்லை. இதனால் திட்டம் தடைபட்டுள்ளது. அதிமுக ஆட்சி வந்தால் மத்திய அரசுடன் ஒருங்கிணைந்து இதை விரைவாக செயல்படுத்த முடியும்.

அதிமுக ஆட்சியில் தமிழக கடன் 4.64 லட்சம் கோடி மட்டுமே இருந்தது. திமுக ஆட்சியில் 6 லட்சம் கோடி கூடி, தற்போது 10 லட்சம் கோடிக்கு மேல் உள்ளது. இந்த கடன் மக்கள் மீதான சுமையாக மாறியுள்ளது. சட்டம்-ஒழுங்கு மோசமாக உள்ளது. பெண்களுக்கு பாதுகாப்பு இல்லை.

இந்த பேச்சு தமிழக அரசியலில் பெரும் எதிரொலியை ஏற்படுத்தியுள்ளது. கோவை மெட்ரோ திட்டம் தேர்தல் பிரச்சாரத்தில் முக்கிய விவாதமாக மாறியுள்ளது. அண்ணாமலையின் கருத்து NDA கூட்டணியின் வலுவை வெளிப்படுத்துவதாக பாஜகவினர் பார்க்கின்றனர். திமுக தரப்பில் இதை மறுப்பு தெரிவித்து வருகின்றனர். வரும் நாட்களில் இது பெரிய விவாதமாக மாறும் என எதிர்பார்க்கப்படுகிறது.

இதையும் படிங்க: மோடி தமிழகம் வரட்டும்?! அப்புறம் பேசிக்கலாம்? கூட்டணி ஆட்சியா? நயினார் நாகேந்திரன் சூசகம்!