கம்பி நீட்டிய காங்., எம்பி! கட்சி மாறவும் திட்டம்! அடுத்தடுத்த திருப்பத்தில் அசாம் தேர்தல்!

அசாம் சட்டசபைத் தேர்தல் ஏப்ரல் 9-ஆம் தேதி ஒரே கட்டமாக நடைபெற உள்ள நிலையில், காங்கிரஸ் கட்சிக்கு பெரும் அதிர்ச்சி அளிக்கும் வகையில் மூத்த எம்பியும் முன்னாள் முதலமைச்சருமான பிரத்யுத் பர்தோலோய் கட்சியிலிருந்து ராஜினாமா செய்துள்ளார். அவர் காங்கிரஸ் தலைவர் மல்லிகார்ஜுன கார்கேவுக்கு ராஜினாமா கடிதம் அனுப்பியுள்ளார். வட்டாரங்கள் தெரிவிப்பதன்படி, பிரத்யுத் பர்தோலோய் விரைவில் பாஜகவில் இணைய உள்ளார்.

ராஜினாமா கடிதத்தில் பிரத்யுத் பர்தோலோய் கூறியுள்ளதாவது: "மிகுந்த மன வேதனையுடன், காங்கிரஸில் நான் வகிக்கும் அனைத்து பொறுப்புகள் மற்றும் எம்பி பதவியிலிருந்து விலகுவதாக அறிவிக்கிறேன்." நிருபர்களிடம் பேசிய அவர், "என் வாழ்நாள் முழுவதும் காங்கிரஸுடன் இணைந்து பயணித்தேன். 

ஆனால் அசாம் காங்கிரஸ் தலைமை என்னை தொடர்ந்து அவமதித்து வந்தது. கட்சி தலைமை என் மீது எந்த அனுதாபமும் காட்டவில்லை. தனிமைப்படுத்தப்பட்ட நிலைக்கு தள்ளப்பட்டேன். இனி கட்சியில் தொடர்வது எனக்கு மிகவும் கடினமாகிவிட்டது" என்று வேதனையுடன் தெரிவித்தார்.

இதையும் படிங்க: காங்கிரஸ் தலைமை மீது அதிருப்தி! பாஜகவில் இணைந்தார் புபென் போரா! அசாம் அரசியலில் அதிரடி திருப்பம்!!

அசாமில் காங்கிரஸ் கட்சியின் மிக முக்கிய தலைவர்களில் ஒருவரான பிரத்யுத் பர்தோலோய், முன்னாள் முதலமைச்சராகவும், பலமுறை எம்பியாகவும் பதவி வகித்தவர். அவரது ராஜினாமா தேர்தலுக்கு சில நாட்களே உள்ள நிலையில் காங்கிரஸுக்கு பெரும் பின்னடைவாக அமைந்துள்ளது. கட்சியின் அசாம் அலுவலகத்தில் பெரும் பதற்றம் நிலவுவதாக தகவல்கள் வெளியாகியுள்ளன.

பாஜக வட்டாரங்கள், பிரத்யுத் பர்தோலோய் விரைவில் கட்சியில் இணைந்து தேர்தல் பிரசாரத்தில் ஈடுபட உள்ளதாக கூறுகின்றன. அசாமில் பாஜகவின் ஆதிக்கத்தை மேலும் வலுப்படுத்தும் வகையில் இந்த இணைப்பு இருக்கும் என எதிர்பார்க்கப்படுகிறது. காங்கிரஸ் தலைமை இதை தடுக்க முயன்றாலும், பிரத்யுத் பர்தோலோய் தனது முடிவில் உறுதியாக இருப்பதாக தெரிகிறது.

தேர்தல் களத்தில் காங்கிரஸ்-பாஜக இடையேயான போட்டி இன்னும் தீவிரமடையும் என அரசியல் வட்டாரங்கள் கருத்து தெரிவித்து வருகின்றன. பிரத்யுத் பர்தோலோய்யின் இந்த நகர்வு அசாம் அரசியலில் பெரும் மாற்றத்தை ஏற்படுத்தும் என்று எதிர்பார்க்கப்படுகிறது.

இதையும் படிங்க: திரும்பும் பக்கமெல்லாம் தீராத தலைவலி! தமிழகம், கேரளாவிலும் சிக்கல்! ராகுல்காந்தி அப்செட்!