அண்ணாமலை விலகலால் ஆட்டம் காணும் பாஜக! நயினார் நாகேந்திரன் பதவிக்கு வேட்டு! தலைமைக்கு போட்டி!

தமிழக பா.ஜ.க.வில் பெரும் பரபரப்பு ஏற்பட்டுள்ளது. முன்னாள் மாநிலத் தலைவர் அண்ணாமலை கட்சியில் இருந்து வெளியேறிய பின்னர், தற்போதைய மாநிலத் தலைவர் நயினார் நாகேந்திரன் பதவி மாற்றப்பட வாய்ப்பு உள்ளதாக தகவல்கள் பரவி வருகின்றன. இதைத் தொடர்ந்து மாநிலத் தலைவர் பதவியை கைப்பற்ற பல மாநில நிர்வாகிகள் தீவிர முயற்சிகளை மேற்கொண்டு வருகின்றனர்.

சட்டசபைத் தேர்தல் தோல்விக்குப் பிறகு நயினார் நாகேந்திரன் மாற்றப்பட்டு மத்திய அமைச்சராக நியமிக்கப்படலாம் என பேச்சு எழுந்தது. புதிய மாநிலத் தலைவர் மற்றும் அமைப்புச் செயலர் நியமிக்கப்பட உள்ளதாகவும் தகவல் வெளியானது. ராம சீனிவாசன், அர்ஜுன மூர்த்தி, ஏ.பி.முருகானந்தம், வினோஜ் செல்வம் உள்ளிட்டோர் மாநிலத் தலைவர் பதவிக்கு விருப்பம் தெரிவித்துள்ளனர்.

இந்நிலையில் அண்ணாமலை ‘இது நம்ம இயக்கம்’ என்ற புதிய இயக்கத்தை தொடங்கியுள்ளார். மாநிலத் தலைவரை மாற்றினால் அதிருப்தியாளர்கள் பலர் அண்ணாமலை பக்கம் செல்ல வாய்ப்பு உள்ளதால், பா.ஜ.க. தேசியத் தலைமை தலைவர் மாற்றத்தை தற்காலிகமாக ஒத்திவைத்துள்ளது.

இதையும் படிங்க: கட்சி ஆரம்பித்த அண்ணாமலை! பாஜக அவசர ஆலோசனை! நிர்வாகிகளுக்கு பறந்த உத்தரவு!!

நயினார் நாகேந்திரன் தனது பதவியை தக்கவைக்க மாநில நிர்வாகத்தில் புதிய நிர்வாகிகளை நியமிக்கும் முயற்சியில் ஈடுபட்டுள்ளார். இன்று திருச்சியில் மாவட்டத் தலைவர்கள் கூட்டத்தை அவர் கூட்டியுள்ளார். இந்தக் கூட்டத்தில் நிர்வாகிகள் மாற்றம் மற்றும் அண்ணாமலை பக்கம் செல்லும் நிர்வாகிகளை தடுப்பது குறித்து ஆலோசிக்கப்பட உள்ளது.

ஆனால் பா.ஜ.க.வில் இருந்து ஏற்கெனவே பல நிர்வாகிகள் அண்ணாமலை பக்கம் திரும்பியுள்ளனர். பதவி கிடைக்காவிட்டால் மேலும் பலர் அவரை நோக்கி செல்லத் தயாராக இருப்பதாகக் கூறப்படுகிறது. இந்த உள் போட்டி பா.ஜ.க. தேசியத் தலைமைக்கு பெரும் நெருக்கடியை ஏற்படுத்தியுள்ளது.

பா.ஜ.க. மூத்த நிர்வாகிகள் சிலர் கூறியதாவது: “நயினார் நாகேந்திரனை மாற்றும் முடிவு சில மாதங்கள் தள்ளிப்போகும். தேர்தல் பணிகளை சரியாக செய்யாத மாநில மற்றும் மாவட்ட நிர்வாகிகளை மாற்ற திட்டமிடப்பட்டுள்ளது. அண்ணாமலை பின்னால் செல்வதை தடுக்கவும் திருச்சி கூட்டத்தில் முக்கிய ஆலோசனை நடைபெறும்” என்றனர்.

தமிழக பா.ஜ.க.வில் தொடரும் இந்த உள் குழப்பம் கட்சியின் எதிர்காலத்தை பாதிக்கும் என அரசியல் வட்டாரங்கள் கருதுகின்றன.

இதையும் படிங்க: அண்ணாமலை இயக்கத்தில் குவியும் இளைஞர்கள்! ஒரு மணி நேரத்தில் லட்சத்தை கடந்த உறுப்பினர் சேர்க்கை!!