கோவையில் வெளியூர் வேட்பாளர்கள் வென்றதே இல்லை?! வரலாற்றை மாற்றி எழுதுவாரா செந்தில் பாலாஜி!!

கோவை: தமிழக சட்டமன்றத் தேர்தல் நெருங்கும் நிலையில், கோவை மாவட்டம் முழு தமிழ்நாட்டின் கவனத்தையும் ஈர்க்கும் அரசியல் களமாக மாறியுள்ளது. அதிமுக முன்னாள் அமைச்சர் எஸ்.பி. வேலுமணி தொண்டாமுத்தூர் தொகுதியிலும், திமுக முன்னாள் அமைச்சர் செந்தில் பாலாஜி கோவை தெற்கு தொகுதியிலும் நேரடியாகப் போட்டியிடுகின்றனர். 

பாஜகவுக்கு ஒதுக்கப்பட்ட கோவை வடக்கு தொகுதியில் தற்போதைய எம்.எல்.ஏ. வானதி சீனிவாசன் அல்லது முன்னாள் மாநிலத் தலைவர் அண்ணாமலை போட்டியிடும் வாய்ப்பு உள்ளது.

1996க்குப் பிறகு நடைபெற்ற ஐந்து சட்டமன்றத் தேர்தல்களிலும் கோவையில் திமுக படுதோல்வியைச் சந்தித்துள்ளது. இந்த சோக வரலாற்றுக்கு முற்றுப்புள்ளி வைக்க வேண்டும் என்ற நோக்கத்தில், கரூரைச் சேர்ந்த செந்தில் பாலாஜியை கோவைக்கு அனுப்பியுள்ளார் முதலமைச்சர் ஸ்டாலின். தேர்தல் வியூகங்களில் கில்லாடியான செந்தில் பாலாஜி, ஆளுங்கட்சியின் அதிகாரம், பணம் மற்றும் ஆள் பலத்துடன் களமிறங்கியுள்ளார். ஆனால் கோவையின் வரலாறு வெளியூர் வேட்பாளர்களுக்கு சாதகமாக இல்லை.

இதையும் படிங்க: கோவைக்கு குறி வைக்கும் அண்ணாமலை!! வெற்றி வாய்ப்புகள் என்ன?!! ஆதரவாளர்களுடன் தீவிர ஆலோசனை!

கடந்த காலங்களில் பல முக்கிய தலைவர்கள் கோவையில் தோல்வியைத் தழுவியுள்ளனர். 1999 லோக்சபா தேர்தலில் இந்திய கம்யூனிஸ்ட் கட்சியின் மூத்த தலைவர் நல்லகண்ணு தோற்றார். 2006ல் சிங்காநல்லூர் தொகுதியில் மார்க்சிஸ்ட் கம்யூனிஸ்ட் தொழிற்சங்கத் தலைவர் சவுந்திரராஜன் 14 ஓட்டு வித்தியாசத்தில் தோற்றார். 

2014 லோக்சபா தேர்தலில் பொள்ளாச்சியில் கொ.ம.தே.க. ஈஸ்வரன் தோல்வியைச் சந்தித்தார். 2021 சட்டமன்றத் தேர்தலில் கோவை தெற்கில் கமல்ஹாசனும், தொண்டாமுத்தூரில் கார்த்திகேய சேனாபதியும் தோற்றனர். 2024 லோக்சபா தேர்தலில் அண்ணாமலையும் வெற்றி பெற முடியவில்லை.

இந்த வரலாற்றில் சில விதிவிலக்குகள் உள்ளன. அதிமுக மாவட்ட செயலாளர் அம்மன் அர்ஜுனன் மதுரையைப் பிறப்பிடமாகக் கொண்டவர் என்றாலும், கோவைக்கு குடிபெயர்ந்து நீண்டகாலமாக உள்ளூர் அரசியல் செய்ததால் மக்கள் அவரை வெளியூர்க்காரராகக் கருதவில்லை. துணை ஜனாதிபதி சி.பி. ராதாகிருஷ்ணன் திருப்பூர்க்காரர். ஒன்றுபட்ட கோவை மாவட்டத்தில் அவர் வெற்றி பெற்றாலும், மாவட்டம் பிரிந்த பிறகு கோவையில் தோற்றார்.

கரூர்க்காரரான செந்தில் பாலாஜி கோவைக்கு புதிது என்றாலும், மாநகராட்சி தேர்தலில் ஏற்கெனவே தன் செல்வாக்கை நிரூபித்துள்ளார். ஆளுங்கட்சியின் முழு பலத்துடன் அவர் புது வரலாறு படைப்பாரா அல்லது பழைய வரலாற்றின் தொடர்ச்சியாக மாறுவாரா என்பது கோவை மக்களின் கையில் உள்ளது. வேலுமணியின் உள்ளூர் செல்வாக்கு, செந்தில் பாலாஜியின் தேர்தல் உத்தி, பாஜகவின் வானதி-அண்ணாமலை இடையிலான போட்டி ஆகியவை கோவை தேர்தல் முடிவுகளை தீர்மானிக்கும் முக்கிய காரணிகளாக உள்ளன.

தமிழக அரசியலில் கோவை இப்போது மிக முக்கியமான போர்க்களமாக உருவெடுத்துள்ளது. உள்ளூர் vs வெளியூர், அதிகாரம் vs மக்கள் செல்வாக்கு ஆகியவை இங்கு மோதுகின்றன. கோவை மக்கள் யாருக்கு ஆதரவு அளிப்பார்கள் என்பதை இன்னும் சில நாட்களில் தெரிந்துகொள்ளலாம்.

இதையும் படிங்க: செந்தில்பாலாஜி Vs வேலுமணி!! கோவையில் மாஸ் காட்டப்போவது யார்? 10 தொதிகள் யார் வசம்?!