அமிர்தராஜ் தோத்தா? அனிதா ராதாகிருஷ்ணனே பொறுப்பு?! முதல்வர் ஸ்டாலினுக்கு பறந்த முக்கிய கடிதம்!!

தூத்துக்குடி மாவட்டம் ஸ்ரீவைகுண்டம் தொகுதியில் காங்கிரஸ் வேட்பாளர் ஊர்வசி அமிர்தராஜ் தோற்றால் அதற்கு அமைச்சர் அனிதா ராதாகிருஷ்ணனே முழுக் காரணம் என்று தி.மு.க. நிர்வாகிகள் சிலர் கட்சித் தலைவரும் முதல்வருமான மு.க.ஸ்டாலினுக்கு புகார் மனு அனுப்பியுள்ளனர்.

ஸ்ரீவைகுண்டம் தொகுதியில் தி.மு.க. கூட்டணியில் காங்கிரஸ் சார்பில் போட்டியிட்ட அமிர்தராஜுக்கு தி.மு.க. நிர்வாகிகள் சரியான ஒத்துழைப்பு கொடுக்கவில்லை என்ற குற்றச்சாட்டு எழுந்துள்ளது. 

இதுகுறித்து தூத்துக்குடி தெற்கு மாவட்ட தி.மு.க. நிர்வாகிகள் சிலர் முதல்வர் ஸ்டாலினுக்கு அனுப்பிய புகார் கடிதத்தில், “அமைச்சர் அனிதா ராதாகிருஷ்ணன் தொகுதி தேர்தல் பொறுப்பாளராக இருந்தும், கூட்டணி தர்மத்தைப் பேணாமல் செயல்பட்டார். திருநெல்வேலி மற்றும் தென்காசி மாவட்டங்களில் பிரசாரம் செய்த அவர், ஸ்ரீவைகுண்டத்தில் பிரசாரம் செய்யவில்லை. 

இதையும் படிங்க: கரூர்காரர்களின் மண்ணை தூவி ஆட்டைய போட்ட கோவை திமுக!! தீர விசாரிக்கும் செந்தில்பாலாஜி குரூப்ஸ்!

மாறாக, அ.தி.மு.க. வேட்பாளர் சண்முகநாதனுக்கு ஆதரவாக செயல்பட்டு, தி.மு.க. நிர்வாகிகளுக்கு அவருக்கு ஆதரவாக பிரசாரம் செய்ய உத்தரவிட்டார். இதனால் உள்ளடி வேலை சிறப்பாக நடைபெற்றது. காங்கிரஸாரையும் சிறப்பாக பணியாற்ற விடவில்லை” என்று குற்றம் சாட்டப்பட்டுள்ளது.

அமிர்தராஜ் தோல்வியடைந்தால் அதற்கு முழு பொறுப்பும் அமைச்சர் அனிதா ராதாகிருஷ்ணனுக்கே உண்டு என்று புகார் கடிதத்தில் தெரிவிக்கப்பட்டுள்ளது.

இந்தப் புகார் தி.மு.க.வுக்குள் புதிய உள் பிரச்னையை ஏற்படுத்தியுள்ளது. ஏற்கனவே தேர்தல் பணிகளில் உள்ளடி வேலைகள் குறித்த புகார்கள் பல இடங்களில் எழுந்துள்ள நிலையில், ஸ்ரீவைகுண்டம் விவகாரம் கட்சியின் உயர்மட்டத்தில் பரபரப்பை ஏற்படுத்தியுள்ளது.

தி.மு.க. தலைமை இந்தப் புகாரை எப்படி கையாளப் போகிறது என்பது அடுத்த சில நாட்களில் தெரியவரும். ஓட்டு எண்ணிக்கை முடிவுகள் வெளியான பிறகு இந்த விவகாரம் மேலும் சூடுபிடிக்கும் என எதிர்பார்க்கப்படுகிறது.

இதையும் படிங்க: உள்ளடி வேலை பார்த்த பொன்முடி! மகனுடன் சேர்ந்து ஸ்கெட்ச்! விழுப்புரம் திமுகவில் சலசலப்பு!