எரிந்து கொண்டிருக்கும் பருத்தி குடோன் திமுக! பரமக்குடியில் பொன் ராதாகிருஷ்ணன் அதிரடி!

ராமநாதபுரம் மாவட்டம் பரமக்குடியில் இன்று நடைபெற்ற பாஜக சட்டமன்ற ஆய்வு குழு கூட்டத்தில் பங்கேற்ற முன்னாள் மத்திய அமைச்சர் பொன் ராதாகிருஷ்ணன், செய்தியாளர்களிடம் தமிழக அரசியல் சூழல் குறித்துக் காரசாரமாகப் பதிலளித்தார்.

திராவிட முன்னேற்றக் கழகம் என்பது ஒரு பருத்தி குடோன் போன்றது. அதற்கு இப்போது தீ பற்றவைக்கப்பட்டு விட்டது; அது எரிந்து கொண்டிருக்கிறது. என் பார்வையில் திமுக-விற்கு முற்றுப்புள்ளி வைக்கப்பட்டு விட்டது. 2026 சட்டமன்றத் தேர்தலில் தேசிய ஜனநாயக கூட்டணி மிகப்பெரிய வெற்றி பெற்று தமிழகத்தில் ஆட்சி மாற்றத்தைக் கொண்டு வரும். தூய்மையான, நேர்மையான மற்றும் ஊழலற்ற வளர்ச்சியை நோக்கிய ஆட்சி அமையும்.

திமுக கூட்டணியில் காங்கிரஸ், விடுதலைச் சிறுத்தைகள் மற்றும் கம்யூனிஸ்ட் கட்சிகளுக்குள் கடும் புகைச்சல் ஏற்பட்டுள்ளது. கடந்த தேர்தல்களில் இருந்த அந்த ஒருங்கிணைப்பு இந்த முறை இருக்காது. இந்த புகைச்சல் தீபந்தமாக மாறி கொழுந்துவிட்டு எரிகிறதா அல்லது வெறும் புகைச்சலோடு நிற்கிறதா என்பது தேர்தல் நேரத்தில் தெளிவாகத் தெரியும்.

இதையும் படிங்க: திமுக ஆட்சியை அகற்றும் கூட்டணியில் புதிய தமிழகம் - டாக்டர் கிருஷ்ணசாமி அதிரடி!

மத்திய அரசை முதல்வர் ஸ்டாலின் 'டப்பா இன்ஜின்' என்று விமர்சித்தது குறித்த கேள்விக்கு, "எந்த டப்பா? அந்த காலத்தில் ஒரு 'கஞ்சா டப்பா' இருக்குமே.. அந்த டப்பாவைக் குறிப்பிடுகிறாரா?" என மழுப்பலாகவும் கிண்டலாகவும் பதிலளித்தார்.

மதுராந்தகத்தில் நடைபெற்ற தேசிய ஜனநாயகக் கூட்டணிக் கூட்டம் தமிழக அரசியலில் பெரிய மாற்றத்தை ஏற்படுத்தியது. அதேபோல் வரும் மார்ச் 1-ஆம் தேதி மதுரையில் நடைபெறவுள்ள பிரம்மாண்ட பொதுக்கூட்டத்தில் பிரதமர் நரேந்திர மோடி பங்கேற்க உள்ளார். இந்தக் கூட்டம் தமிழகத்தில் மிகப்பெரிய அரசியல் மாற்றத்திற்கு வித்திடும். தேர்தல் வரை கூட்டணிகள் பெருகவும் குறையவும் வாய்ப்புகள் உள்ளன" எனத் தெரிவித்தார்.

2014 நாடாளுமன்றத் தேர்தலில் தேசிய ஜனநாயக கூட்டணி 18 சதவீத வாக்குகளைப் பெற்றுப் பலத்தை நிரூபித்ததைச் சுட்டிக்காட்டிய அவர், தற்போது அந்தப் பலம் பலமடங்கு அதிகரித்துள்ளதாக நம்பிக்கை தெரிவித்தார்.

இதையும் படிங்க: திமுக ஒரு இலக்க இடங்களிலேயே சுருங்கும்!  மதுரையில் அன்புமணி ராமதாஸ் காட்டம்!