தேர்தல் வியூக நிறுவனத்தை நம்பி ஏமாந்தார் மு.க.ஸ்டாலின்! பின்னணியில் பகீர்! திமுக கோட்டை விட்டது இங்கேதான்!

தமிழக சட்டமன்றத் தேர்தலில் தி.மு.க.வுக்கு பெரும் பின்னடைவு ஏற்பட்டுள்ளது. கடந்த 2021 தேர்தலில் வெற்றி பெற்று மீண்டும் சீட் பெற்ற 30க்கும் மேற்பட்ட சிட்டிங் எம்.எல்.ஏ.க்கள் இந்த முறை படுதோல்வியைச் சந்தித்துள்ளனர். தேர்தல் வியூக நிறுவனத்தின் பரிந்துரையை நம்பியதே இந்த பின்னடைவுக்கு முக்கிய காரணமாகக் கூறப்படுகிறது.

2021-ல் தி.மு.க. முதன்முறையாக தேர்தல் வியூக நிறுவனத்தின் உதவியுடன் வேட்பாளர்களைத் தேர்வு செய்து பெரும்பான்மை பெற்றது. அதே முறையை 2024 லோக்சபா தேர்தலிலும் பின்பற்றி வெற்றி கண்டது. 

இந்த முறை சட்டமன்றத் தேர்தலிலும் அதே பார்முலாவைப் பயன்படுத்தியது தி.மு.க. தலைமை. முதல்வர் ஸ்டாலின் மருமகன் சபரீசன் தொடங்கிய இந்த வியூக நிறுவனத்துடன் சில அமைச்சர்கள் மற்றும் சிட்டிங் எம்.எல்.ஏ.க்கள் ரகசியமாக இணைந்து செயல்பட்டதாகக் கூறப்படுகிறது. மாவட்ட பொறுப்பு அமைச்சர்கள் மூலம் தங்கள் பரிந்துரைக்கு ஏற்ற வேட்பாளர்களைத் தேர்வு செய்து சீட் பெற்றனர்.

இதையும் படிங்க: ஜெயித்தது கருணாநிதி சென்டிமெண்ட்!! ஆட்சியை தக்க வைப்பதில் தடுமாறும் திமுக!! தொடரும் தோல்விகள்!

இந்த ரகசிய கூட்டணியின் விளைவாக 35க்கும் மேற்பட்ட சிட்டிங் எம்.எல்.ஏ.க்களுக்கு மீண்டும் சீட் வழங்கப்பட்டது. ஆனால், இவர்களில் 30க்கும் மேற்பட்டோர் தவெக அலையில் சிக்கி தோல்வியைத் தழுவினர். 

தி.மு.க.வின் கோட்டை எனக் கருதப்படும் சென்னை, திருவள்ளூர் மற்றும் காஞ்சிபுரம் மாவட்டங்களில் பலர் தோற்றுப் போனது பெரும் அதிர்ச்சியை ஏற்படுத்தியுள்ளது. பிரபாகர் ராஜா, எழிலன், மயிலை வேலு, எபினேசர், சுதர்சனம், சுந்தர், காரப்பாக்கம் கணபதி, கிருஷ்ணசாமி, கோவிந்தராஜன், அர்விந்த் ரமேஷ், வி.ஜி. ராஜேந்திரன் உள்ளிட்ட முக்கிய எம்.எல்.ஏ.க்கள் இந்தப் பட்டியலில் அடங்குவர்.

தேர்தல் வியூக நிறுவனத்தின் பரிந்துரையை முழுமையாக நம்பியதால் தி.மு.க. தலைமை ஏமாந்துவிட்டதாகக் கட்சி வட்டாரங்கள் தெரிவிக்கின்றன. 2021-ல் வெற்றியைத் தந்த அதே உத்தி இந்த முறை பின்னடைவைத் தந்துள்ளது. தவெக-வின் எழுச்சியை சரியாக மதிப்பிடத் தவறியதும் ஒரு முக்கிய காரணம் எனக் கூறப்படுகிறது.

இந்தத் தோல்விகள் தி.மு.க.வுக்குள் பெரும் அதிர்வலைகளை ஏற்படுத்தியுள்ளன. கட்சியின் எதிர்கால உத்திகள் மற்றும் வேட்பாளர் தேர்வு முறை குறித்து மறுபரிசீலனை செய்ய வேண்டிய நிலை ஏற்பட்டுள்ளது. தி.மு.க. தொண்டர்கள் மத்தியில் ஏமாற்றமும், கோபமும் அதிகரித்துள்ள நிலையில், கட்சித் தலைமை அடுத்தக் கட்ட நடவடிக்கைகளை எடுக்கும் என எதிர்பார்க்கப்படுகிறது.

இதையும் படிங்க: இம்மி பிசறாத கணிப்பு!! சொல்லி அடித்த செய்கை!! விஜய் Good Book-கில் இடம்பிடித்தார் ஓய்வு பெற்ற டிஜிபி ரவி!!