முத்தரையர் ஓட்டு முழுசா நமக்குத்தான்! அதிமுகவை வீழ்த்த திமுக வியூகம்! ஸ்டாலின் குறி!

தமிழகத்தில் வரும் 2026 சட்டமன்ற தேர்தலில் முத்தரையர் சமுதாய ஓட்டுகள் முக்கிய திருப்புமுனையாக உருவெடுத்துள்ளன. திருச்சி, தஞ்சை, புதுக்கோட்டை, கரூர், சிவகங்கை, பெரம்பலூர், அரியலூர் உள்ளிட்ட மாவட்டங்களில் கணிசமான முத்தரையர் மக்கள் வசிக்கின்றனர். இவர்கள் சுமார் 30 தொகுதிகளில் வெற்றி-தோல்வியை தீர்மானிக்கும் சக்தி கொண்டவர்களாக உள்ளனர்.

கடந்த 1977 தேர்தலில் இருந்து முத்தரையர் சமுதாயம் பெரும்பாலும் அதிமுகவுக்கே வாக்களித்து வந்தது. ஜெயலலிதா ஆட்சியில் இச்சமூகத்தினருக்கு பல சலுகைகள், பதவிகள் வழங்கப்பட்டதால் வலுவான ஆதரவு இருந்தது. ஆனால் ஜெயலலிதா மறைவுக்குப் பிறகு அதிமுகவில் ஏற்பட்ட பிளவுகள், தலைமை மாற்றங்கள் காரணமாக இந்த ஓட்டு வங்கி சிதறத் தொடங்கியது. 2021 தேர்தலில் முத்தரையர் பெரும்பான்மை உள்ள தொகுதிகளில் அதிமுக கூட்டணிக்கு ஒரு வெற்றிகூட கிடைக்கவில்லை.

தற்போது அதிமுக சார்பில் முத்தரையர் சமூகத்தை ஒருங்கிணைக்க தீவிர முயற்சி எதுவும் இல்லை. ஜெயலலிதா காலத்தில் அமைச்சர்களாக இருந்த கு.ப.கிருஷ்ணன் தவெகவில் இணைந்து ஆதரவு திரட்டி வருகிறார். மற்ற முன்னாள் அமைச்சர்கள் பரஞ்சோதி, சிவபதி, வளர்மதி, பூனாட்சி ஆகியோர் அரசியல் களத்தில் தீவிரமாக இல்லாததால், ஓட்டுகள் அதிமுகவுக்கு கிடைப்பது சந்தேகமாகியுள்ளது.

இதையும் படிங்க: உதவி தொகையாக மாறியது கருணை தொகை! தேர்தல் விதிமீறல் வருமாம்!! இரவோடு இரவாக பெயரை மாற்றிய அதிமுக!

இந்நிலையில் திமுக அதிரடியாக களமிறங்கியுள்ளது. 2021 போலவே இம்முறையும் முத்தரையர் ஓட்டுகளை பெற திட்டமிட்டுள்ளது. திருச்சி, பெரம்பலூர் தொகுதி எம்பிக்கள் வேறு சமூகத்தினர் என்பதால், சட்டமன்ற தேர்தலில் முத்தரையர் சமூகத்தைச் சேர்ந்த வேட்பாளர்களை அதிக அளவில் நிறுத்த திமுக தலைமை முடிவு செய்துள்ளது. 

மேலும், திமுக கூட்டணியில் உள்ள 'தமிழர் தேசம்' கட்சியை நடத்தும் வீர முத்தரையர் முன்னேற்ற சங்க தலைவர் செல்வகுமாருக்கு ஒரு தொகுதி (திருமயம் அல்லது புதுக்கோட்டை மாவட்டத்தில் வேறொன்று) ஒதுக்கப்பட வாய்ப்புள்ளதாக தகவல்கள் வெளியாகியுள்ளன.

திமுகவின் இந்த உத்தி முத்தரையர் சமுதாயத்தில் செல்வாக்கை அதிகரிக்கும் என எதிர்பார்க்கப்படுகிறது. சமீப சர்வேகளில் முத்தரையர் ஆதரவு திமுகவுக்கு 50-55% வரை உள்ளதாக தெரிய வந்துள்ளது. அதிமுகவுக்கு 30-35%, தவெகவுக்கு 7-10% என பிரிந்துள்ளது. இது அதிமுகவின் பாரம்பரிய வாக்கு வங்கியை பெரிதும் பாதிக்கும்.

2026 தேர்தலில் முத்தரையர் ஓட்டுகள் யாருக்கு செல்லும் என்பது தமிழக அரசியலில் பெரும் கேள்வியாக உள்ளது. திமுகவின் இந்த முயற்சி வெற்றி பெற்றால், தென்மாவட்டங்கள் மற்றும் டெல்டா பகுதிகளில் பெரும் மாற்றத்தை ஏற்படுத்தலாம்!

இதையும் படிங்க: அரைச்ச மாவையே அரைக்கும் இபிஎஸ்! சொதப்பும் ஆலோசனை கம்பெனி?! அதிமுக எதிர்கொள்ளும் திடீர் சிக்கல்! தொண்டர்கள் சோர்வு!