பாஜகவுல இருந்தா ஒண்ணும் கிடைக்காது! திமுகவுக்கு வாங்க!! அதிருப்தி அலையை பயன்படுத்தி வலை விரிக்கும் அமைச்சர்!

சென்னை: அதிமுக தலைமையிலான தேசிய ஜனநாயகக் கூட்டணியில் பாஜகவுக்கு ஒதுக்கப்பட்ட 27 தொகுதிகளில் பெரும்பாலானவை கட்சிக்கு செல்வாக்கு இல்லாத பகுதிகள் என்பதால், தமிழக பாஜகவில் அதிருப்தி அதிகரித்து வருகிறது. இந்த அதிருப்தியில் உள்ள முக்கிய நிர்வாகிகளை இழுக்க திமுக தீவிர முயற்சி எடுத்து வருவதாக தகவல்கள் வெளியாகியுள்ளன.

குறிப்பாக, முன்னாள் மாநிலத் தலைவர் அண்ணாமலைக்கு போட்டியிட தொகுதி ஒதுக்கப்படாதது பெரும் அதிருப்தியை ஏற்படுத்தியுள்ளது. இதையடுத்து அவரது ஆதரவாளர்கள் தனியாக ஆலோசனை நடத்தியுள்ளனர். தமிழக பாஜக பொருளாளர் எஸ்.ஆர்.சேகர் ‘இது எட்டப்பன்களின் காலம்’ என்று சமூக வலைதளத்தில் பதிவிட்டார். அதேபோல், கட்சி செயலர் வினோஜ் செல்வம், ‘காலம் பேசாது, காத்திருந்து பதில் சொல்லும்’ என்ற ரஜினி வசனத்தை பகிர்ந்துள்ளார்.

சென்னையில் கடந்த லோக்சபா தேர்தலில் அதிமுகவை விட பாஜக அதிக வாக்குகள் பெற்ற தி.நகர், வேளச்சேரி தொகுதிகளை கூட்டணியில் கேட்டும் பெறவில்லை. முன்னாள் கவர்னர் தமிழிசைக்காக மயிலாப்பூர் தொகுதி மட்டும் பெறப்பட்டதால், தேர்தல் பணியில் ஈடுபட்ட பல நிர்வாகிகள் ஏமாற்றம் அடைந்துள்ளனர்.

இதையும் படிங்க: பிரதமர் வரவேற்பில் அண்ணாமலை மிஸ்ஸிங் ஏன்? வரவேற்பு குழுவில் பெயர் இருந்ததா? வெளியானது ஆதாரம்!

இந்த அதிருப்தியை பயன்படுத்தி, சென்னையைச் சேர்ந்த திமுக அமைச்சர் ஒருவர், பாஜகவில் அதிருப்தியில் உள்ள முக்கிய நிர்வாகிகளை தொடர்பு கொண்டு பேசி வருவதாக தகவல் வெளியாகியுள்ளது. “பாஜகவில் இருந்தால் ஒன்றும் கிடைக்காது. திமுகவுக்கு வந்தால் எதிர்பார்த்த பதவிகள் கிடைக்கும்” என்று அவர் வாக்குறுதி அளித்து வருவதாக கூறப்படுகிறது.

அதேபோல், மண்டல அளவில் அதிருப்தியில் உள்ள பாஜக நிர்வாகிகளை இழுக்கும் பணியில் திமுகவின் முன்னாள் அமைச்சர் செந்தில் பாலாஜியும் ஈடுபட்டிருப்பதாக தெரிகிறது. இந்த முயற்சிகள் பாஜக வேட்பாளர் பட்டியல் வெளியான பிறகு பெரும் பூகம்பத்தை ஏற்படுத்தும் என்று பாஜகவினர் அச்சம் தெரிவிக்கின்றனர்.

தொகுதி ஒதுக்கீட்டில் பாஜகவுக்கு குறைந்த இடங்கள் மட்டுமே கிடைத்ததால், கட்சியின் உள்ளூர் நிர்வாகிகள் மத்தியில் பெரும் அதிருப்தி நிலவுகிறது. அண்ணாமலை தரப்பு, தமிழிசை தரப்பு, வானதி சீனிவாசன் தரப்பு என பல்வேறு குழுக்களிடையேயும் உள்ள பதற்றம் இப்போது அதிகரித்துள்ளது.

திமுகவின் இந்த இழுப்பு முயற்சி, பாஜகவின் உள் பூசலை மேலும் தீவிரப்படுத்தும் என அரசியல் வட்டாரங்கள் கருத்து தெரிவிக்கின்றன. பாஜகவில் இருந்து சில முக்கிய நிர்வாகிகள் திமுகவுக்கு தாவினால், அதிமுக-பாஜக கூட்டணியில் பெரும் பிளவு ஏற்படும் அபாயம் உள்ளது.

தமிழக சட்டமன்றத் தேர்தல் நெருங்கும் நிலையில், இரு கட்சிகளுக்கும் இடையேயான இந்த அரசியல் நகர்வுகள் பெரும் பரபரப்பை ஏற்படுத்தியுள்ளன. பாஜக வேட்பாளர் பட்டியல் வெளியான பிறகு என்ன நடக்கும் என்பதை அனைவரும் ஆவலுடன் எதிர்பார்த்துள்ளனர்.

இதையும் படிங்க: ஓரங்கட்டப்படும் நாகர்கோவில் பாஜக எம்.எல்.ஏ காந்தி! தொகுதியை கைப்பற்ற காய் நகர்த்தும் அதிமுக!