சிறுபான்மை கிறிஸ்தவர்கள் ஓட்டு யாருக்கு? திமுக VS தவெக உச்சக்கட்ட மோதல்!!

தமிழக சட்டசபை தேர்தல் சூழலில், சிறுபான்மையினர் ஓட்டுகளை மையமாகக் கொண்டு கட்சிகளுக்கிடையே கடும் போட்டி நிலவி வருகிறது. குறிப்பாக கிறிஸ்துவ மக்களின் ஓட்டுகளை பெறும் போட்டியில் திமுகவும்,  ஜோசப் விஜய் (Joseph Vijay) தலைமையிலான த.வெ.க.வும் நேருக்கு நேர் மோதுகின்றன.

தமிழகத்தில் சுமார் 8 சதவீதம் அளவிற்கு கிறிஸ்துவர்கள் உள்ளனர். கன்னியாகுமரி, தூத்துக்குடி, திருநெல்வேலி, திருச்சி, திண்டுக்கல், சென்னை போன்ற பகுதிகளில் அவர்கள் கணிசமாக வசித்து வருகின்றனர். முன்னாள் முதல்வர்  ஜெ.ஜெயலலிதா (J. Jayalalithaa) காலத்தில், கிறிஸ்துவர்களின் ஓட்டுகள் பெரும்பாலும் அ.தி.மு.க.க்கு சென்றதாக அரசியல் ஆய்வாளர்கள் குறிப்பிடுகின்றனர். ஆனால், அவர் மறைவுக்குப் பிறகு, அந்த ஓட்டுகள் திமுகவுக்கு திரும்பியதாக கூறப்படுகிறது.

இந்த தேர்தலில், த.வெ.க. சார்பில் 233 தொகுதிகளில் வேட்பாளர்களை நிறுத்தியுள்ள விஜய், சிறுபான்மையினர், குறிப்பாக கிறிஸ்துவர்களின் ஆதரவை பெறும் நோக்கில் தீவிர பிரசாரம் செய்து வருகிறார். கிறிஸ்துவர்கள் அதிகம் உள்ள திருச்சி கிழக்கு மற்றும் பெரம்பூர் தொகுதிகளில் அவர் நேரடியாக போட்டியிடுவது அரசியல் முக்கியத்துவம் பெற்றுள்ளது.

இதையும் படிங்க: பணம் இன்னும் வந்து சேரல!! தவிக்கும் அதிமுக வேட்பாளர்கள்! கடைசி நேரத்தில் கை விரித்த கட்சி தலைமை!!

இதற்கிடையில், திமுகவும் தனது ஆதரவை உறுதிப்படுத்த பல்வேறு நடவடிக்கைகள் மேற்கொண்டு வருகிறது. முதல்வர் மு.க.ஸ்டாலின் (M. K. Stalin) மற்றும் அமைச்சர்கள் பல சர்ச்சுகளில் பாதிரியார்களை சந்தித்து ஆதரவு கோரியுள்ளனர். பலர் திமுக கூட்டணிக்கு ஆதரவு தெரிவித்ததாக தகவல்கள் வெளியாகியுள்ளன.

ஆனால், தரைமட்டத்தில் வேறு நிலை உருவாகி வருவதாக கூறப்படுகிறது. குறிப்பாக இளைஞர்கள் மற்றும் பெண்கள் மத்தியில் விஜய்க்கு ஆதரவு அதிகரித்து வருவதாக தகவல்கள் தெரிவிக்கின்றன. சமீபத்தில் அவர் சர்ச்சில் முழங்காலிட்டு வேண்டுதல் செய்த சம்பவமும், கிறிஸ்துவ மக்களிடையே கவனம் பெற்றுள்ளது.

இதனால், கிறிஸ்துவ ஓட்டுகள் எந்த திசையில் செல்லும் என்பது தேர்தல் முடிவை தீர்மானிக்கும் முக்கிய காரியமாக பார்க்கப்படுகிறது. இந்த போட்டி, தேர்தல் களத்தில் புதிய திருப்பத்தை உருவாக்கியுள்ளதுடன், இறுதி முடிவை எதிர்பார்க்கும் ஆர்வத்தையும் அதிகரித்துள்ளது.

இதையும் படிங்க: 50 லட்சம் பேருக்கு மட்டன், சிக்கன் பிரியாணி!! ஆர்டர் கொடுத்துவிட்டு எலெக்‌ஷனுக்கு தயாராகும் கட்சிகள்!