வாக்குப்பதிவு முடிந்து 3 நாட்களாகியும் தேர்தல் ஆணையம் மெத்தனம்! ஓட்டுப்பதிவு விவரம் வெளியாவதில் தாமதம்!

தமிழக சட்டசபைத் தேர்தல் ஓட்டுப்பதிவு முடிந்து மூன்று நாட்கள் ஆகியும், ஒவ்வொரு சட்டசபை தொகுதியிலும் எவ்வளவு ஓட்டுகள் பதிவாகின என்பதை தேர்தல் ஆணையம் இதுவரை வெளியிடாமல் தாமதம் செய்து வருகிறது. இது அரசியல் கட்சிகள் மற்றும் வாக்காளர்கள் மத்தியில் பெரும் கவனத்தை ஈர்த்துள்ளது.

கடந்த 23-ம் தேதி ஒரே கட்டமாக நடைபெற்ற தேர்தலில், மாநிலத்தில் உள்ள 5.73 கோடி வாக்காளர்களில் 4.87 கோடி பேர் ஓட்டளித்துள்ளனர். ஓட்டுப்பதிவு சதவீதம் 85.10 என்று அறிவிக்கப்பட்டுள்ளது. ஆனால், வழக்கமாக ஓட்டுப்பதிவு முடிந்த அதே நாள் இரவு தோராயமான சதவீதம் அறிவிக்கப்பட்டு, அடுத்த நாள் துல்லியமான இறுதி விபரங்கள் வெளியிடப்படும். மேலும், ஒவ்வொரு தொகுதி வாரியாக ஆண்கள், பெண்கள், மூன்றாம் பாலினத்தவர் என ஒவ்வொரு பிரிவிலும் எத்தனை பேர் ஓட்டளித்துள்ளனர் என்பதும் வெளியாகும்.

இம்முறை ஓட்டுப்பதிவு முடிந்து மூன்று நாட்கள் கடந்த நிலையில், தொகுதி வாரியான ஓட்டு விபரங்கள் இன்னும் வெளியிடப்படவில்லை. இது பலரிடையே ஆச்சரியத்தையும், சந்தேகத்தையும் ஏற்படுத்தியுள்ளது. தமிழக தேர்தல் ஆணைய அதிகாரிகள் இந்த விபரங்களை வெளியிடுவதில் ஆர்வம் காட்டாததே காரணம் என்று சில வட்டாரங்கள் கூறுகின்றன.

இதையும் படிங்க: பூத் ஏஜெண்டுகளுக்கு சிறப்பு கவனிப்பு!! ஆஃபர்களை அள்ளித் தெளிக்கும் திமுக! ,மு.க.ஸ்டாலின் திட்டம்!

தேர்தல் ஆணைய அதிகாரிகள் இதுகுறித்து கூறுகையில், “அனைத்து தொகுதிகளிலும் ஓட்டுப்பதிவு விபரங்களை சரிபார்த்து, இறுதி எண்ணிக்கையை உறுதி செய்வதில் சிறிது காலதாமதம் ஏற்பட்டுள்ளது. எனவே, ஓட்டுப்பதிவின் முழு விபரங்களை இன்று வெளியிட உள்ளோம்” என்று தெரிவித்தனர்.

வழக்கமாக தேர்தல் முடிந்த உடனேயே தொகுதி அளவிலான துல்லியமான தரவுகள் வெளியாவது வழக்கம். ஆனால் இந்த முறை ஏற்பட்டுள்ள தாமதம், அரசியல் கட்சிகள் மத்தியில் பல்வேறு கேள்விகளை எழுப்பியுள்ளது. குறிப்பாக, பூத் அளவிலான ஓட்டு விபரங்களை கட்சிகள் ஏற்கனவே சேகரித்து ஆய்வு செய்து வரும் நிலையில், அதிகாரப்பூர்வ தரவுகள் தாமதமாவது அவர்களுக்கு சிரமத்தை ஏற்படுத்தியுள்ளது.

தமிழகத்தில் இந்த தேர்தல் மிகுந்த எதிர்பார்ப்புடன் நடைபெற்றுள்ளது. 86 லட்சம் வாக்காளர்கள் ஓட்டளிக்காதது உள்ளிட்ட பல்வேறு விவரங்கள் ஏற்கனவே வெளியாகியுள்ளன. எனினும், தொகுதி வாரியான முழு ஓட்டுப்பதிவு சதவீதம் மற்றும் பிரிவு வாரியான விபரங்கள் இல்லாதது, முடிவுகளை எதிர்பார்க்கும் அனைவரின் கவனத்தையும் ஈர்த்துள்ளது.

இன்று இந்த விபரங்கள் வெளியிடப்படும் என்று தேர்தல் ஆணையம் உறுதியளித்துள்ள நிலையில், அரசியல் கட்சிகள் மற்றும் பொதுமக்கள் இந்த அதிகாரப்பூர்வ தரவுகளுக்காக காத்திருக்கின்றனர். இந்த தாமதம் ஏன் ஏற்பட்டது என்பதும், வெளியிடப்படும் விபரங்கள் எந்த அளவுக்கு துல்லியமாக இருக்கும் என்பதும் அடுத்த சில மணி நேரங்களில் தெரியவரும். 

இதையும் படிங்க: தள்ளாத 99 வயதிலும் ஜனநாயக கடமை! 1946ல் ஓட்டு போடுறேன்! முன்னாள் அமைச்சருக்கு மோடி பாராட்டு!