கர்நாடகாவுக்கு 4 துணை முதல்வர்கள்?! சித்தராமைய்யா மகனுக்கு முக்கிய பதவி? சிவக்குமார் அமைச்சரவையில் ட்விஸ்ட்!
கர்நாடகத்தில் டிகே சிவக்குமார் தலைமையில், புதிதாக அமையவுள்ள அமைச்சரவையில் 4 பேருக்கு துணை முதல்வர் பதவி வழங்கப்படவுள்ளதாக தகவல்கள் வெளியாகியுள்ளன.
by
பெங்களூரு: கர்நாடக அரசியலில் பெரும் மாற்றம் ஏற்பட்டுள்ளது. முதல்வர் சித்தராமையாவின் ராஜினாமா ஏற்கப்பட்டதைத் தொடர்ந்து, துணை முதல்வர் டி.கே. சிவகுமார் தலைமையில் புதிய அமைச்சரவை அமைய உள்ள நிலையில், அதில் நான்கு துணை முதல்வர் பதவிகள் உருவாக்கப்பட உள்ளதாக கட்சி வட்டாரங்கள் தெரிவிக்கின்றன.
2023 சட்டமன்றத் தேர்தலில் காங்கிரஸ் வெற்றி பெற்றபோது, முதல்வர் பதவிக்கு சித்தராமையா மற்றும் டி.கே. சிவகுமார் இடையே கடும் போட்டி நிலவியது. இருவரையும் சமாதானப்படுத்த காங்கிரஸ் மேலிடம் சுழற்சி முறையை முன்மொழிந்தது.
அதன்படி தலா இரண்டரை ஆண்டுகள் முதல்வர் பதவி வகிப்பது என முடிவானது. அதனை ஏற்று சித்தராமையா முதல்வரானார். மூன்று ஆண்டுகள் நிறைவடைந்த நிலையில், கட்சியின் உயர்மட்ட உத்தரவை ஏற்று மே 29 அன்று சித்தராமையா தனது ராஜினாமா கடிதத்தை ஆளுநர் தாவர்சந்த் கெலாட்டிடம் சமர்ப்பித்தார்.
இதையும் படிங்க: கர்நாடக முதல்வர் சித்தராமையாவின் ராஜினாமா ஏற்பு! ஆளுநர் மாளிகை அதிகாரப்பூர்வ அறிவிப்பு!
இன்று (மே 30) அந்த ராஜினாமா ஏற்கப்பட்டது. ஆளுநர் உடனடியாக அமைச்சரவையை கலைத்து உத்தரவிட்டுள்ளார். இதனால் கர்நாடக அரசியலில் பரபரப்பு உச்சமடைந்துள்ளது.
நேற்று மாலை டெல்லி புறப்பட்ட டி.கே. சிவகுமார், காங்கிரஸ் தலைவர்கள் ராகுல் காந்தி மற்றும் மல்லிகார்ஜுன் கார்கே ஆகியோரை சந்தித்து புதிய அமைச்சரவை அமைப்பு குறித்து ஆலோசனை நடத்த உள்ளார். சித்தராமையா அமைச்சரவையில் இருந்த பல மூத்த அமைச்சர்களுக்கு புதிய அமைச்சரவையில் இடம் கிடைக்க வாய்ப்பு குறைவு என கர்நாடக காங்கிரஸ் நெருங்கிய வட்டாரங்கள் தெரிவிக்கின்றன.
முக்கியமாக, புதிய அமைச்சரவையில் நான்கு துணை முதல்வர்கள் நியமிக்கப்படலாம் என எதிர்பார்க்கப்படுகிறது. இது கட்சியின் உள் சமன்பாட்டை பலப்படுத்தும் நடவடிக்கையாக பார்க்கப்படுகிறது. மேலும், சித்தராமையாவின் மகனும் சட்டமேலவை உறுப்பினருமான யதீந்திரா புதிய அமைச்சரவையில் இடம்பெறுவார் என்றும், அவருக்கு முக்கிய பொறுப்பு வழங்கப்படும் என்றும் தகவல்கள் வெளியாகியுள்ளன.
சித்தராமையாவின் நீண்ட கால அனுபவத்துடன் டி.கே. சிவகுமாரின் தலைமையில் புதிய அமைச்சரவை அமையவுள்ளது. இந்த மாற்றம் கர்நாடக அரசியலில் புதிய சகாப்தத்தை உருவாக்குமா என்பதை அடுத்த சில நாட்களில் தெரியவரும். தற்போது பல்வேறு ஊகங்களும், எதிர்பார்ப்புகளும் கட்சியினர் மத்தியில் நிலவி வருகின்றன.
இதையும் படிங்க: சித்தராமையா காலில் விழுந்து டி.கே.சிவக்குமார் மரியாதை! கர்நாடக முதல்வராக பதவியேற்பதற்கு முன் ஆசி!!
