சித்தராமையா காலில் விழுந்து டி.கே.சிவக்குமார் மரியாதை! கர்நாடக முதல்வராக பதவியேற்பதற்கு முன் ஆசி!!

கர்நாடக முதலமைச்சர் சித்தராமையா ராஜினாமா செய்ய உள்ள நிலையில், துணை முதலமைச்சர் டி.கே. சிவக்குமார் அவரது காலில் விழுந்து வணங்கி ஆசி பெற்ற சம்பவம் மாநில அரசியல் வட்டாரத்தில் பெரும் பரபரப்பை ஏற்படுத்தியுள்ளது.

2023 சட்டசபைத் தேர்தலில் காங்கிரஸ் கட்சி 135 இடங்களில் வெற்றி பெற்று தனிப்பெரும்பான்மையுடன் ஆட்சியமைத்தது. மாநில காங்கிரஸ் தலைவர் சிவக்குமார் மற்றும் சித்தராமையா இடையே முதல்வர் பதவிக்கு கடும் போட்டி நிலவியது. கட்சி மேலிடத்தின் செல்வாக்கால் சித்தராமையா முதலமைச்சராக பொறுப்பேற்றார். சிவக்குமார் துணை முதலமைச்சர் பதவியை ஏற்றார். இருவருக்கும் தலா இரண்டரை ஆண்டுகள் முதல்வர் பதவி என கட்சி மேலிடம் ஒப்பந்தம் செய்ததாகக் கூறப்படுகிறது.

மூன்றாண்டுகள் நிறைவடைந்த நிலையில், சித்தராமையா பதவி விலகுவாரா எனும் கேள்வி எழுந்தது. டெல்லி சென்ற இருவரும் காங்கிரஸ் மேலிடத் தலைவர்களுடன், ராகுல் காந்தியுடன் உள்ளிட்டோருடன் ஏழு மணி நேரம் முக்கிய ஆலோசனை நடத்தினர். இதையடுத்து முதல்வர் பதவியை விட்டுக்கொடுக்க சித்தராமையா முன்வந்தார்.

இதையும் படிங்க: இதுதான் மக்களுக்கு மோடி கொடுத்த கிஃப்ட்! பெட்ரோல், டீசல் விலை உயர்வுக்கு வலுக்கும் கண்டனம்!

அவசர மருத்துவக் காரணங்களுக்காக கவர்னர் தனது சொந்த மாநிலமான மத்தியப் பிரதேசம் சென்றுள்ள நிலையில், சித்தராமையா தனது ராஜினாமா கடிதத்தை கவர்னர் மாளிகை அதிகாரிகளிடம் ஒப்படைக்க உள்ளார். அதன் பின்னரே புதிய முதலமைச்சர் பதவியேற்பு தேதி அறிவிக்கப்படும் என எதிர்பார்க்கப்படுகிறது.

ராஜினாமா செய்ய உள்ளதை முன்னிட்டு, தனது ஆதரவாளர்களான அமைச்சர்களுக்கு சித்தராமையா தனது இல்லத்தில் காலை விருந்து கொடுத்தார். இந்த நிகழ்ச்சியில் துணை முதலமைச்சர் சிவக்குமாரும் கலந்துகொண்டார். அப்போது சிவக்குமார் சித்தராமையாவின் காலில் விழுந்து வணங்கினார். சித்தராமையா அவரை அன்புடன் கட்டித் தழுவி தனது முழு ஆதரவை உறுதி செய்தார்.

முதல்வர் பதவியை விட்டுக்கொடுக்கும் சித்தராமையாவுக்கு ஈடாக, மாநில காங்கிரஸ் தலைவர் பதவி அவரது ஆதரவாளருக்கு வழங்கப்பட உள்ளது. மேலும் அவரது மகனுக்கும் முக்கிய பதவி அளிக்கப்படும் என தகவல்கள் வெளியாகியுள்ளன. இந்த சமாதான முடிவு கர்நாடக காங்கிரஸுக்குள் நிலவிய உட்கட்சி பூசலை முடிவுக்கு கொண்டு வரும் என எதிர்பார்க்கப்படுகிறது.

கர்நாடக அரசியலில் சித்தராமையா - சிவக்குமார் இணைப்பு எதிர்காலத்தில் எப்படி செயல்படும் என்பதை நாட்கள் தான் சொல்லும்.

இதையும் படிங்க: “நீ நல்லா சாப்பிட்டிருக்க”... அமைச்சர் பேச்சால் கிளம்பிய சர்ச்சை..! வறுத்தெடுத்த அதிமுக..!!