“இளைஞர்கள் சரியாக வழிநடத்தப்படாவிட்டால்?” – ஆர்.எஸ்.எஸ். தலைவர் மோகன் பாகவத் முக்கிய எச்சரிக்கை

இந்தியாவின் இளைஞர்கள் சரியான பாதையில் வழிநடத்தப்பட்டால், நாட்டின் எதிர்காலத்திற்கு மிகப்பெரிய பலன் கிடைக்கும் என்றும், தவறான திசையில் சென்றால் எதிர்காலத்தில் சமூகத்திற்கு சுமையாக மாறும் வாய்ப்பு இருப்பதாகவும் ஆர்எஸ்எஸ் தலைவர் மோகன் பாகவத் தெரிவித்துள்ளார்.

நாக்பூரில் நடைபெற்ற நிகழ்ச்சி ஒன்றில் பேசிய அவர், நாட்டின் மக்கள்தொகையில் இளைஞர்கள் முக்கியப் பங்கு வகிப்பதாக குறிப்பிட்டார். இளைஞர்களின் ஆற்றல், திறமை மற்றும் சிந்தனை ஆகியவை நாட்டின் வளர்ச்சிக்கு பயன்படுத்தப்பட வேண்டும் என்றும் அவர் வலியுறுத்தினார்.

இளைஞர்களை சரியாக வழிநடத்தினால் நாடு பெரும் பயனடையும். அதேநேரத்தில், அவர்களுக்கு சரியான வழிகாட்டுதல் கிடைக்காமல் போனால் எதிர்காலத்தில் சமூகத்திற்கு சுமையாக மாறக்கூடிய சூழல் உருவாகலாம் என்று மோகன் பாகவத் எச்சரித்தார். தற்போது இளைஞர்களாக இருப்பவர்கள் 30 ஆண்டுகளுக்குப் பிறகு முதியவர்களாக மாறுவார்கள் என்பதையும் அவர் சுட்டிக்காட்டினார்.

இதையும் படிங்க: "இன்றைய இளைஞர்கள் கேள்வி கேட்கிறார்கள்... பதில் சொல்ல கற்றுக்கொள்ளுங்கள்!" – மோகன் பாகவத் அறிவுரை

எனவே, இளைஞர்கள் தங்களது தனிப்பட்ட வாழ்க்கை மற்றும் எதிர்காலத்தைப் பற்றி மட்டும் சிந்திக்காமல், தங்களுக்கு அடுத்த தலைமுறையின் தேவைகள் குறித்தும் அக்கறை கொள்ள வேண்டும் என்று அவர் கூறினார்.

அமெரிக்கா, ஆஸ்திரேலியா, சீனா, நியூசிலாந்து போன்ற நாடுகளிலிருந்து இந்தியா எந்த வகையில் வேறுபட்டது என்பதை நாட்டின் இளைஞர்கள் முதலில் புரிந்துகொள்ள வேண்டும் என்றும் மோகன் பாகவத் தெரிவித்தார். இந்தியாவை உயர்ந்த நிலைக்கு கொண்டு செல்ல எவ்வளவு முயற்சி தேவைப்படுகிறது என்பதையும் ஒவ்வொருவரும் சிந்திக்க வேண்டும் என்று அவர் கூறினார்.

உலக நாடுகளுடன் இந்தியாவை வெறுமனே ஒப்பிடாமல், நாட்டின் தனித்துவமான தேவைகள் மற்றும் நோக்கங்களை புரிந்துகொள்ள வேண்டும் என்றும் அவர் வலியுறுத்தினார். உலகின் பல நாடுகள் பொருளாதார வளர்ச்சிக்கு அதிக முக்கியத்துவம் அளிக்கும் நிலையில், இந்தியாவின் பார்வை பணம் சம்பாதிப்பதுடன் மட்டும் முடிவதில்லை என்றும் அவர் குறிப்பிட்டார்.

இளைஞர்கள் எதிர்கொள்ளும் தடைகளை கண்டு பின்வாங்காமல், அவற்றை தைரியமாக எதிர்கொண்டு வெற்றியை நோக்கி உழைக்க வேண்டும் என்றும் மோகன் பாகவத் கேட்டுக்கொண்டார். நாட்டின் எதிர்காலத்தை தீர்மானிக்கும் சக்தியாக இளைஞர்கள் இருப்பதால், அவர்களின் பொறுப்புணர்வும் செயல்பாடுகளும் முக்கியமானவை என்றும் அவர் தெரிவித்தார்.

இதையும் படிங்க: அதிதீவிர ஆர்.எஸ்.எஸ் பின்புலம்.! யார் இந்த பிரகலாத் ஜோஷி? புதிய கல்வி அமைச்சரின் முழு பின்னணி தெரியுமா.?