காங்கிரஸ் மூத்த தலைவர் நானா படோல் பாதம் கழுவிய தொண்டர்கள்! வைரல் வீடியோவால் வெடித்த அரசியல் சர்ச்சை!

மகாராஷ்டிரா காங்கிரஸ் மூத்த தலைவர் நானா படோலின் பாதத்தை கட்சி தொண்டர்கள் கழுவிய வீடியோ சமூக வலைதளங்களில் வேகமாக பரவி வருகிறது. இந்த சம்பவம் தொடர்பாக பாஜக கடும் விமர்சனத்தை முன்வைத்துள்ளதால், மகாராஷ்டிரா அரசியல் வட்டாரத்தில் பரபரப்பு ஏற்பட்டுள்ளது.

மகாராஷ்டிரா காங்கிரஸ் கட்சியின் முக்கிய தலைவர்களில் ஒருவரான நானா படோல், கடந்த காலத்தில் அம்மாநில சட்டசபை சபாநாயகராகவும் பதவி வகித்துள்ளார். தற்போது கட்சியின் முக்கிய பொறுப்பில் உள்ள அவர், குரு பூர்ணிமா நிகழ்ச்சியில் பங்கேற்றபோது இந்த பாதம் கழுவும் நிகழ்வு நடைபெற்றதாக கூறப்படுகிறது.

இந்த நிகழ்ச்சியில், காங்கிரஸ் தொண்டர்கள் சிலர் நானா படோலின் கால்களை கழுவிய காட்சிகள் வீடியோவாக பதிவு செய்யப்பட்டு சமூக வலைதளங்களில் வெளியானது. இதையடுத்து, அந்த வீடியோ அரசியல் விவாதத்தை ஏற்படுத்தியுள்ளது.

இதையும் படிங்க: அரசு வழக்கறிஞர் பதவி ஒதுக்கீட்டில் தவெக மீது அதிருப்தி? காங்கிரஸ் உள்ளிட்ட கூட்டணி கட்சிகள் ஏமாற்றம்? புதிய சலசலப்பு!

இந்த சம்பவத்தை விமர்சித்துள்ள பாஜக, அரசியல் தலைவர்களை வழிபடும் கலாசாரம் குறித்து கேள்வி எழுப்பியுள்ளது. மகாராஷ்டிரா மாநில வருவாய்த்துறை அமைச்சர் சந்திரசேகர் பவன்குலே இதுகுறித்து கூறுகையில், இதுபோன்ற செயல்கள் காங்கிரஸ் தலைவர்களின் அரசியல் கலாசாரத்தை வெளிப்படுத்துவதாக விமர்சித்தார்.

மேலும், இதுபோன்ற நிகழ்வுகள் பொதுமக்கள் மத்தியில் எதிர்மறையான கருத்துகளை உருவாக்கும் என்றும், அரசியல் தலைவர்கள் இத்தகைய செயல்களில் ஈடுபடுவதை தவிர்க்க வேண்டும் என்றும் அவர் தெரிவித்தார்.

குரு பூர்ணிமா நாளில் குருவுக்கு மரியாதை செலுத்தும் வகையில் பல்வேறு பகுதிகளில் பாரம்பரிய நிகழ்ச்சிகள் நடைபெறுவது வழக்கம். அதேநேரத்தில், அரசியல் தலைவர்களின் பாதம் கழுவும் நிகழ்வுகள் தொடர்பாக அவ்வப்போது விமர்சனங்களும் எழுந்து வருகின்றன.

நானா படோல் பாதம் கழுவப்பட்ட விவகாரத்தில் காங்கிரஸ் தரப்பில் இதுவரை விரிவான விளக்கம் வெளியாகவில்லை. இருப்பினும், வீடியோ வைரலானதை தொடர்ந்து மகாராஷ்டிரா அரசியல் களத்தில் இந்த விவகாரம் பேசுபொருளாக மாறியுள்ளது.

இதையும் படிங்க: டெல்லியில் சசி தரூரின் ‘மாம்பழ விருந்து’... ராகுல் ஏன் வரவில்லை? காங்கிரஸில் மீண்டும் பரபரப்பு!