டெல்டாவுக்கு குறிவைக்கும் விஜய்..!! தவெகவில் இணைகிறாரா வைத்திலிங்கம்.?? பக்கா பிளான்.!!

அடுத்த ஆண்டு தொடக்கத்தில் தமிழ்நாட்டு சட்டசபைத் தேர்தல் நடைபெற உள்ள நிலையில், அரசியல் கட்சிகள் தீவிர செயல்பாடுகளில் ஈடுபட்டுள்ளன. கூட்டணி பேச்சுவார்த்தைகள், பிரச்சாரங்கள் மற்றும் கட்சி மாற்றங்கள் போன்றவை வேகமெடுத்துள்ளன. இந்த சூழலில், அதிமுக மூத்த தலைவர்களான செங்கோட்டையன், நாஞ்சில் சம்பத்தைத் தொடர்ந்து, முன்னாள் அமைச்சர் வைத்திலிங்கமும் விஜயின் தமிழக வெற்றிக் கழகத்தில் (தவெக) இணைந்துள்ளதாக தகவல்கள் வெளியாகியுள்ளன.

டெல்டா மாவட்டத்தைச் சேர்ந்த இந்த மூத்த அரசியல்வாதியின் இணைப்பு, 2026 சட்டமன்றத் தேர்தலுக்கு முன்னதாக தவெகவின் பலத்தை அதிகரிக்கும் என அரசியல் வட்டாரங்களில் பேசப்படுகிறது. வைத்திலிங்கம், ஓரத்தநாடு சட்டமன்றத் தொகுதியின் எம்எல்ஏவாகவும், ஜெயலலிதா ஆட்சியில் அமைச்சராகவும் பணியாற்றியவர். ஜெயலலிதா மறைவுக்குப் பின், அதிமுகவில் ஏற்பட்ட பிளவில் ஓபிஎஸ் அணியில் இணைந்து, கட்சியின் துணை ஒருங்கிணைப்பாளராக செயல்பட்டார்.

இதையும் படிங்க: "சாரை சாரையாய் தவெகவில் இணையப் போறங்க" - அதிமுக + பாஜகவிற்கு ஷாக் கொடுத்த செங்கோட்டையன்...!

இருப்பினும், எடப்பாடி பழனிசாமி (இபிஎஸ்) தலைமையிலான அதிமுகவுடன் இணைப்பு முயற்சிகள் தோல்வியடைந்தன. கடந்த சில மாதங்களாக உடல்நலக் குறைவு காரணமாக பொது நிகழ்ச்சிகளில் கலந்துகொள்ளாமல் இருந்த வைத்திலிங்கம், அண்மையில் ஓபிஎஸ் தலைமையிலான 'தொண்டர் உரிமை மீட்புக் குழு' கூட்டத்தில் பங்கேற்றார். 

கடந்த நவம்பர் 24ம் தேதி அன்று நடந்த அந்தக் கூட்டத்தில், டிசம்பர் 15க்குள் அதிமுகவை ஒன்றிணைக்காவிட்டால், தமிழக அரசியலை மாற்றும் முக்கிய அறிவிப்பு வெளியிடப்படும் என வைத்திலிங்கம் எச்சரித்தார். "நாங்கள் வெளியிடும் அறிவிப்பு தமிழகத்தை திருப்பி போடும்" என்று அவர் கூறியது பெரும் பரபரப்பை ஏற்படுத்தியது.

இந்நிலையில், அவர் தவெகவில் இணைய உள்ளதாக வெளியான தகவல், ஓபிஎஸ் அணியில் அதிர்ச்சியை ஏற்படுத்தியுள்ளது. சில நாட்களுக்கு முன் இதுபோன்ற வதந்திகளை வைத்திலிங்கம் மறுத்திருந்தாலும், இன்று அவர் விஜய்யை சந்தித்து இணைவு அறிவிப்பு வெளியிடலாம் என எதிர்பார்க்கப்படுகிறது. 

தேர்தல் அரசியல் பரபரப்பின் மத்தியில், கட்சித் தாவல்கள் புதிய உருவம் பெற்றுள்ளன. இதற்கு முன்பு, அதிமுகவிலிருந்து நீக்கப்பட்ட மூத்த தலைவர் கே.ஏ. செங்கோட்டையன் தவெகவில் இணைந்தது குறிப்பிடத்தக்கது. செங்கோட்டையன், எம்ஜிஆர் காலத்திலிருந்து அரசியலில் உள்ளவர். அவரின் இணைப்பு, தவெகவுக்கு அரசியல் அனுபவத்தை சேர்த்தது என விமர்சகர்கள் கூறுகின்றனர். வைத்திலிங்கத்தின் வருகை, டெல்டா பகுதியில் - குறிப்பாக தஞ்சாவூர், திருவாரூர் போன்ற மாவட்டங்களில் - தவெகவின் செல்வாக்கை வலுப்படுத்தும் எனக் கருதப்படுகிறது. இது, அதிமுகவின் உள் கட்சி பிரச்னைகளை மேலும் வெளிச்சத்துக்கு கொண்டுவரும். 

அதிமுக தலைமை, ஓபிஎஸ் அணியின் இணைப்பு கோரிக்கையை நிராகரித்துள்ளது. "ஓபிஎஸ் திருந்த வேண்டும், இல்லையெனில் திருத்தப்படுவார்" என இபிஎஸ் எச்சரித்துள்ளார். இதனிடையே, தவெக தலைமை அலுவலகத்தில் இன்று பெரும் கூட்டம் எதிர்பார்க்கப்படுகிறது. வைத்திலிங்கத்தின் இணைப்பு உறுதியானால், அது தவெகவின் தேர்தல் உத்திகளுக்கு புதிய உத்வேகம் அளிக்கும். இருப்பினும், இது வெறும் வதந்தியா அல்லது உண்மையா என்பது இன்னும் அதிகாரப்பூர்வமாக உறுதிப்படுத்தப்படவில்லை.

இந்த நிகழ்வு, தமிழக அரசியலில் புதிய கூட்டணிகளை உருவாக்கலாம் என அரசியல் பார்வையாளர்கள் கருத்து தெரிவிக்கின்றனர். தவெக, 2026 தேர்தலில் தனித்துப் போட்டியிட திட்டமிட்டுள்ள நிலையில், அனுபவமிக்க தலைவர்களின் வருகை அக்கட்சிக்கு நன்மை பயக்கும். கொங்கு பகுதிக்காக செங்கோட்டையனை தவெகவுக்கு கொண்டு வந்த நிலையில், டெல்டா பகுதிகளைக் குறிவைத்தே வைத்திலிங்கத்தை தவெகவில் சேர்க்க உள்ளதாகவும் அரசியல் நோக்கர்கள் கூறுகின்றனர்.  

இதையும் படிங்க: நான் பேசுறத பத்தி யார் கிட்ட கேட்டீங்க? விஜயின் புதுவை விசிட் குறித்த கேள்வியால் கடுப்பான சீமான்..!