திமுக தோல்விக்கு இதுதான் காரணம்! உடன்பிறப்பின் குரல் இணையதளத்தில் கொட்டித்தீர்த்த தொண்டர்கள்!

திராவிட முன்னேற்ற கழகம் (Dravida Munnetra Kazhagam) சட்டசபை தேர்தலில் சந்தித்த தோல்விக்கான காரணங்களை அறிய தொடங்கப்பட்ட ‘உடன்பிறப்பின் குரல்’ இணையதளத்திற்கு கட்சியினரிடமிருந்து மிகப்பெரிய வரவேற்பு கிடைத்துள்ளதாக தகவல்கள் வெளியாகியுள்ளன. தேர்தல் தோல்வி குறித்து கருத்துகளை பதிவு செய்ய தொடங்கப்பட்ட இந்த தளத்தில், இதுவரை 5 லட்சத்திற்கும் மேற்பட்டோர் தங்களது கருத்துகளை பதிவு செய்துள்ளதாக திமுக வட்டாரங்கள் தெரிவிக்கின்றன.

தொடங்கப்பட்ட இரண்டு நாட்களிலேயே சுமார் 3.5 லட்சம் கருத்துகள் பதிவாகியிருந்த நிலையில், தற்போது அந்த எண்ணிக்கை வேகமாக உயர்ந்துள்ளதாக கூறப்படுகிறது. தேர்தல் தோல்விக்குப் பின்னர் கட்சிக்குள் ஏற்பட்டுள்ள அதிருப்தி, குழப்பம் மற்றும் நிர்வாக குறைபாடுகள் குறித்து பல்வேறு மட்டங்களில் தொண்டர்கள் தங்கள் மனக்குமுறல்களை பதிவு செய்து வருவதாக தகவல்கள் தெரிவிக்கின்றன.

குறிப்பாக,  உதயநிதி ஸ்டாலின் (Udhayanidhi Stalin), கனிமொழி (Kanimozhi Karunanidhi) மற்றும் சபரீசன் ஆகியோரின் அரசியல் தலையீடு குறித்து கட்சிக்குள் குழப்பம் இருந்ததாக பலர் கருத்து தெரிவித்துள்ளதாக கூறப்படுகிறது. யாரின் அரசியல் வழிகாட்டுதலை பின்பற்றுவது என்ற தெளிவின்மை அடிமட்ட நிர்வாகிகளிடம் இருந்ததாகவும் பதிவுகள் வெளியாகியுள்ளன.

இதையும் படிங்க: விஜயை வீழ்த்த இதுதான் ஒரேவழி!! திமுக, அதிமுக புதிய திட்டம்! தேர்தலில் வெற்றியை தீர்மானிக்கும் முக்கிய காரணி!

மேலும், இளைஞரணியில் போலி உறுப்பினர்கள் சேர்க்கப்பட்டதாகவும், கட்சியின் உறுப்பினர் பட்டியலில் பலர் வேறு கட்சிகளிலும் இருப்பதாகவும் சிலர் குற்றம்சாட்டியுள்ளனர். இலவச பேருந்து திட்டத்தால் ஆட்டோ ஓட்டுநர்களின் வருமானம் பாதிக்கப்பட்டதால், அந்த சமூகத்தின் வாக்குகள் விஜய் (Vijay) தலைமையிலான தவெக பக்கம் திரும்பியதாகவும் கருத்துகள் பதிவாகியுள்ளன.

தேர்தல் பிரசாரத்தின் போது விஜய் திமுகவை நேரடியாக குறிவைத்து விமர்சித்த போதிலும், அதற்கு கட்சி தரப்பில் வலுவான பதில் வராதது மக்களிடையே தாக்கத்தை ஏற்படுத்தியதாகவும் குறிப்பிடப்பட்டுள்ளது. குறிப்பாக கரூர் கூட்ட நெரிசல் மரணம் தொடர்பாக விஜய் முன்வைத்த குற்றச்சாட்டுகளுக்கு சரியான விளக்கம் அளிக்காதது பாதிப்பை ஏற்படுத்தியதாகவும் கட்சியினர் கூறியுள்ளனர்.

இதனுடன், குடும்ப ஆட்சி குற்றச்சாட்டு, விலைவாசி உயர்வு, அடிமட்ட தொண்டர்களுக்கு அங்கீகாரம் இல்லாதது உள்ளிட்ட பல காரணங்களும் தோல்விக்கான முக்கிய அம்சங்களாக பதிவு செய்யப்பட்டுள்ளதாக திமுக வட்டாரங்கள் தெரிவித்துள்ளன.

இதையும் படிங்க: அதிமுகவுக்கு வாய்ப்பளித்தால்..! முதல்வர் விஜய்க்கு செக்... சிபிஎம் சண்முகம் எச்சரிக்கை..!