அன்புமணியின் சூழ்ச்சி! மனவேதனையில் ராமதாஸ்!! ஜி.கே. மணி கட் அண்ட் ரைட் பேச்சு!

சேலம்: பாட்டாளி மக்கள் கட்சியில் (பாமக) நிறுவனர் டாக்டர் எஸ். ராமதாஸ் மற்றும் அவரது மகன் டாக்டர் அன்புமணி ராமதாஸ் இடையிலான மோதல் தொடர்ந்து தீவிரமடைந்து வருகிறது. இந்நிலையில், கட்சியின் கௌரவத் தலைவர் ஜி.கே. மணி சேலத்தில் செய்தியாளர்களைச் சந்தித்து பேசினார். அன்புமணியை அடிப்படை உறுப்பினர் உள்ளிட்ட அனைத்துப் பொறுப்புகளிலிருந்தும் ராமதாஸ் நீக்கியுள்ளதாக அவர் தெரிவித்தார்.

ஜி.கே. மணி கூறுகையில், “தமிழ்நாட்டில் வலிமையான மற்றும் தவிர்க்க முடியாத கட்சியாக இருந்த பாமகவை திட்டமிட்டு சூழ்ச்சி செய்து அபகரிக்கவும், பிளவுபடுத்தவும் அன்புமணி மேற்கொண்ட நடவடிக்கைகளால் ராமதாஸ் மிகுந்த மனவேதனை அடைந்தார். அன்புமணியின் தூண்டுதலால் சிலர் ராமதாஸின் மனம் புண்படும்படி பேசினர்.

இதனால் கட்சி அங்கீகாரத்தை இழந்தது. இந்நிலையில், மீண்டும் அங்கீகாரமுள்ள வலிமையான கட்சியாக உருவாக்க ராமதாஸ் புதிய நிர்வாகிகளை நியமித்துள்ளார். இதன் அடிப்படையில் ராமதாஸ் தலைமையில் பாமக வலிமையான கட்சியாக உருவெடுத்து வருகிறது” என்றார்.

இதையும் படிங்க: “அது எப்ப நடக்குன்னு தான் நானும் காத்துக்கிட்டு இருக்கேன்”... ராமதாஸுக்கு நேரடி எச்சரிக்கை விடுத்த வழக்கறிஞர் பாலு...!

பாமகவில் நீண்டகாலமாக நிலவும் உட்கட்சி பிரச்சினை தற்போது உச்சத்தை அடைந்துள்ளது. ராமதாஸ் தரப்பு அன்புமணியை கட்சியிலிருந்து நீக்கியுள்ளதாக அறிவித்துள்ள நிலையில், அன்புமணி தரப்பு அதை ஏற்க மறுத்து வருகிறது. இதனால் கட்சி இரு அணிகளாகப் பிரிந்து செயல்படும் நிலை உருவாகியுள்ளது.

நாளை (டிசம்பர் 28) சேலத்தில் ராமதாஸ் தலைமையில் பாமக பொதுக்குழுக் கூட்டம் நடைபெற உள்ளது. இக்கூட்டத்தில் கட்சியின் எதிர்கால நடவடிக்கைகள், கூட்டணி உள்ளிட்ட முக்கிய முடிவுகள் எடுக்கப்படலாம் என எதிர்பார்க்கப்படுகிறது. இக்கூட்டம் கட்சியின் போக்கை தீர்மானிக்கும் முக்கிய நிகழ்வாக அமையும்.

பாமகவின் இந்த உட்கட்சி மோதல் 2026 சட்டமன்றத் தேர்தலை முன்னிட்டு கட்சியின் வலிமையை பாதிக்கும் என அரசியல் வட்டாரங்களில் கருத்துகள் எழுந்துள்ளன. ராமதாஸ் தரப்பு கட்சியை மீண்டும் வலுப்படுத்தும் முயற்சியில் ஈடுபட்டுள்ளதாகவும், ஜி.கே. மணியின் கருத்துகள் அதை உறுதிப்படுத்துவதாகவும் தெரிகிறது.

இதையும் படிங்க: 2026 தேர்தலில் யாருடன் கூட்டணி?... காலையிலேயே அதிரடி அறிவிப்பு.. ட்விஸ்ட் கொடுத்த அன்புமணி...!