முதல்வர் விஜய் அமைச்சரவையில் புதிய முகம்? ராகுல்காந்தி ஆதரவுடன் பிரவீன் சக்ரவர்த்தி அடுத்த ‘பிளான்’!

தமிழக அரசியலில் தற்போது பிரவீன் சக்ரவர்த்தியின் அடுத்தகட்ட அரசியல் நகர்வு குறித்து பரபரப்பாக பேசப்பட்டு வருகிறது. ராஜ்யசபா எம்.பி.யாக இருக்கும் அவர், தமிழக சட்டசபை அரசியலில் நேரடியாக களமிறங்கி, எம்.எல்.ஏ.வாகி அமைச்சராகும் விருப்பத்தில் இருப்பதாக அரசியல் வட்டாரங்களில் தகவல் வெளியாகியுள்ளது.

தமிழக சட்டசபை தேர்தலுக்கு முன்பாகவே தமிழக வெற்றிக் கழகத்துடன் காங்கிரஸ் கூட்டணி அமைக்க வேண்டும் என்பதில் பிரவீன் சக்ரவர்த்தி தீவிரமாக செயல்பட்டதாக கூறப்படுகிறது. த.வெ.க. ஆட்சி அமைத்த பிறகு, முதல்வர் விஜய்க்கு ஆதரவான நிலைப்பாட்டை காங்கிரஸ் மேலிடம் எடுக்க வேண்டும் என்றும் அவர் வலியுறுத்தியதாக தகவல்கள் தெரிவிக்கின்றன.

இதன் காரணமாக விஜய்யுடன் அவருக்கு அரசியல் ரீதியான நெருக்கம் ஏற்பட்டுள்ளதாகவும் கூறப்படுகிறது. அதேநேரத்தில், காங்கிரஸ் மூத்த தலைவர் ராகுல் காந்தியின் ஆலோசகராகவும் அவர் செயல்பட்டு வருவதாக அரசியல் வட்டாரங்கள் தெரிவிக்கின்றன. இதனால் விஜய் மற்றும் ராகுல் காந்தி தரப்புகளுடன் ஒரே நேரத்தில் நெருக்கமாக செயல்படும் அரசியல் முகமாக பிரவீன் சக்ரவர்த்தி பார்க்கப்படுகிறார்.

இதையும் படிங்க: திமுக–பாஜக திடீர் நெருக்கம்?! முதல்வர் விஜய் தொகுதி மறுவரையறை கூட்டம் கூட்டியதன் பின்னணியில் பரபரப்பு!

தமிழகத்தில் நேரடியாக அரசியலில் ஈடுபட வேண்டும் என்பதே அவரது தற்போதைய விருப்பமாக இருப்பதாக கூறப்படுகிறது. ராஜ்யசபா எம்.பி.யாக தொடர்வதை விட சட்டசபை உறுப்பினராகி மாநில அரசில் முக்கிய பொறுப்பை வகிப்பது அவருக்கு அதிக ஆர்வமாக இருப்பதாக தகவல்கள் வெளியாகியுள்ளன.

பிலானியில் உள்ள பிர்லா தொழில்நுட்ப மற்றும் அறிவியல் நிறுவனத்தில் பொறியியல் படிப்பையும், அமெரிக்காவின் வார்டன் பள்ளியில் எம்.பி.ஏ. படிப்பையும் முடித்துள்ள பிரவீன் சக்ரவர்த்தி, ஐ.பி.எம்., மைக்ரோசாப்ட் உள்ளிட்ட முன்னணி நிறுவனங்களில் பணியாற்றிய அனுபவம் கொண்டவர். பொருளாதார விவகாரங்களில் நிபுணத்துவம் பெற்றவராகவும் அவர் அறியப்படுகிறார்.

இந்த பின்னணியில், தமிழக முதல்வர் விஜய்யின் அமைச்சரவையில் பிரவீன் சக்ரவர்த்தியை இடம்பெறச் செய்யும் வாய்ப்பு குறித்து அரசியல் வட்டாரங்களில் பேச்சு எழுந்துள்ளது. தற்போது காங்கிரஸ் தரப்பில் இருந்து இருவர் அமைச்சரவையில் இடம்பெற்றுள்ளதாக கூறப்படும் நிலையில், அவர்களில் ஒருவருக்கு பதிலாக பிரவீன் சக்ரவர்த்தியை கொண்டு வருவது குறித்து ஆலோசனை நடைபெறுவதாகவும் தகவல்கள் வெளியாகியுள்ளன.

இதற்காக தற்போது காலியாக உள்ள சட்டசபை தொகுதியில் போட்டியிட்டு வெற்றி பெறும் திட்டமும் அவரிடம் இருப்பதாக கூறப்படுகிறது. அதற்கான சூழல் உருவானால் ராஜ்யசபா எம்.பி. பதவியை ராஜினாமா செய்து நேரடியாக சட்டசபை தேர்தல் களத்தில் இறங்க அவர் தயாராக இருப்பதாகவும் தகவல் வெளியாகியுள்ளது.

எனினும், பிரவீன் சக்ரவர்த்தி ராஜ்யசபா பதவியை ராஜினாமா செய்வது அல்லது விஜய் அமைச்சரவையில் அவருக்கு அமைச்சர் பதவி வழங்கப்படுவது தொடர்பாக இதுவரை அதிகாரப்பூர்வ அறிவிப்பு எதுவும் வெளியாகவில்லை. அரசியல் வட்டாரங்களில் வெளியாகும் இந்த தகவல்கள் நடைமுறைக்கு வருமா என்பது, தமிழக அரசியலில் அடுத்தடுத்த நகர்வுகளை பொறுத்தே தெரியவரும்.

இதையும் படிங்க: முதல்வர் விஜய் ஆட்சியின் 100 நாள் ரிப்போர்ட்! துறை வாரியாக சாதனைகளை திரட்ட தவெக அரசு உத்தரவு!