நாளை தமிழகம் வருகிறார் ராகுல் காந்தி! முதல்வர் விஜய் உடன் சந்திப்பு கன்ஃபார்ம்? வெளியானது முக்கிய தகவல்!

மக்களவை எதிர்க்கட்சித் தலைவரும், காங்கிரஸ் மூத்த தலைவருமான ராகுல் காந்தி சனிக்கிழமை ஒருநாள் பயணமாக தமிழகம் வருகிறார். சென்னை அருகே மாமல்லபுரத்தில் நடைபெற்று வரும் காங்கிரஸ் கட்சியின் மாவட்ட நிர்வாகிகள் பயிற்சி முகாமில் பங்கேற்று, நிர்வாகிகளுடன் கலந்துரையாடுவதற்காக அவரது பயணத் திட்டம் அமைக்கப்பட்டுள்ளது. இதனிடையே, தமிழ்நாடு முதல்வர் விஜய்யை ராகுல் காந்தி சந்திப்பாரா என்ற கேள்வி அரசியல் வட்டாரங்களில் பரபரப்பை ஏற்படுத்தியுள்ளது.

தமிழக காங்கிரஸ் தலைவர் மாணிக்கம் தாகூர் தலைமையில் நடைபெற்று வரும் இந்த பயிற்சி முகாம், கட்சியின் மாவட்டத் தலைவர்கள் மற்றும் நிர்வாகிகளுக்கான அமைப்பு வலுப்படுத்தும் நோக்கத்துடன் ஏற்பாடு செய்யப்பட்டுள்ளது.

கடந்த ஜூலை 23-ஆம் தேதி தொடங்கிய இந்த முகாம் ஆகஸ்ட் 1 வரை நடைபெறுகிறது. இதில் நிர்வாகிகளுக்கு அமைப்பு மேலாண்மை, களப்பணி, விவசாயிகள் மற்றும் மகாத்மா காந்தி தேசிய ஊரக வேலை உறுதித் திட்டப் பணியாளர்களுடன் நேரடி சந்திப்பு உள்ளிட்ட பல்வேறு அம்சங்களில் பயிற்சிகள் வழங்கப்பட்டுள்ளன.

இதையும் படிங்க: ராகுல் காந்தியை ஏன் பேச விடவில்லை?"... நாடாளுமன்ற வளாகத்தில் முழங்கிய INDIA கூட்டணி! சூடுபிடித்த டெல்லி அரசியல்!

நாளை காலை டெல்லியில் இருந்து விமானம் மூலம் சென்னை வரும் ராகுல் காந்தி, அங்கிருந்து சாலை மார்க்கமாக மாமல்லபுரம் சென்று, சுமார் மூன்று மணி நேரம் பயிற்சி முகாமில் செலவிட உள்ளார். மாவட்டத் தலைவர்கள் மற்றும் அவர்களது குடும்பத்தினருடன் நேரடியாக உரையாடி, கட்சியின் எதிர்கால செயல்திட்டங்கள் குறித்து கருத்துகளைப் பகிர்ந்து கொள்ளவும் திட்டமிடப்பட்டுள்ளது.

இதற்கிடையில், ராகுல் காந்தி தமிழ்நாடு முதல்வர் விஜய்யை சந்திக்க உள்ளதாக தகவல்கள் வெளியானது. ஆனால், இதுகுறித்து செய்தியாளர்கள் எழுப்பிய கேள்விக்கு பதிலளித்த தமிழக காங்கிரஸ் தலைவர் மாணிக்கம் தாகூர், ராகுல் காந்தி பயிற்சி முகாமில் பங்கேற்பதற்காக மட்டுமே வருகிறார் என்று தெரிவித்தார். இதனால், இருவருக்கும் இடையிலான சந்திப்பு நடைபெறுவதற்கான வாய்ப்பு தற்போது குறைவாக இருப்பதாக அரசியல் வட்டாரங்கள் கருதுகின்றன.

முன்னதாக, தமிழ்நாடு முதல்வர் விஜய்யின் பதவியேற்பு விழாவில் ராகுல் காந்தி சிறப்பு விருந்தினராக பங்கேற்றிருந்தார். பின்னர் டெல்லியில் நடைபெற்ற சந்திப்பிலும் முதல்வர் விஜய், ராகுல் காந்தி, சோனியா காந்தி மற்றும் காங்கிரஸ் தலைவர் மல்லிகார்ஜுன கார்கே ஆகியோரை நேரில் சந்தித்து ஆலோசனை நடத்தியிருந்தார். தற்போது தமிழ்நாடு அமைச்சரவையில் காங்கிரஸ் கட்சியைச் சேர்ந்த இரண்டு அமைச்சர்கள் இடம்பெற்றிருப்பதும் அரசியல் முக்கியத்துவம் வாய்ந்த அம்சமாக பார்க்கப்படுகிறது.

இதையும் படிங்க: முட்டாள்கள்!! பார்லி.,-யில் பொரிந்து தள்ளிய ராகுல் காந்தி!! பாஜக எம்.பிக்கள் ஆவேசம்! அனல் பறந்த விவாதம்!