திருப்பரங்குன்றம் தீபத்தூண் வழக்கில் தமிழக அரசுக்கு பின்னடைவு... இடைக்கால தடை கோரிக்கையை நிராகரித்த உச்சநீதிமன்றம்!

திருப்பரங்குன்றம் தீபத்தூண் வழக்கில் தமிழக அரசுக்கு முக்கிய சட்டப்பூர்வ பின்னடைவு ஏற்பட்டுள்ளது. தீபத்தூணில் கார்த்திகை தீபம் ஏற்ற வேண்டும் என்று சென்னை உயர் நீதிமன்றத்தின் மதுரைக் கிளை பிறப்பித்த உத்தரவுக்கு இடைக்கால தடை விதிக்க முடியாது என்று உச்சநீதிமன்றம் தெரிவித்துள்ளது. இதன் மூலம், தமிழக அரசு தாக்கல் செய்த இடைக்கால தடை மனு நிராகரிக்கப்பட்டுள்ளது.

இந்த வழக்கு, மதுரை மாவட்டத்தைச் சேர்ந்த ராம ரவிக்குமார் உள்ளிட்டோர் தாக்கல் செய்த மனுவில் இருந்து தொடங்கியது. அந்த மனுவை விசாரித்த உயர் நீதிமன்ற மதுரைக் கிளை, திருப்பரங்குன்றம் மலைப்பகுதியில் உள்ள தீபத்தூணிலும் வழக்கம்போல கார்த்திகை தீபம் ஏற்ற வேண்டும் என்று உத்தரவிட்டிருந்தது. பின்னர், அந்த உத்தரவு அமல்படுத்தப்படவில்லை என்ற குற்றச்சாட்டில் நீதிமன்ற அவமதிப்பு வழக்கும் தொடரப்பட்டது.

இந்த நிலையில், உயர் நீதிமன்ற உத்தரவுக்கு எதிராக தமிழக அரசு உச்சநீதிமன்றத்தில் மேல்முறையீடு செய்தது. அந்த மேல்முறையீட்டு மனு இன்று விசாரணைக்கு வந்தபோது, இடைக்கால தடை வழங்க வேண்டும் என்ற அரசின் கோரிக்கையை உச்சநீதிமன்ற நீதிபதிகள் ஏற்க மறுத்தனர்.

இதையும் படிங்க: கரூர் கூட்ட நெரிசல் வழக்கில் முக்கிய திருப்பம்! சிபிஐ இறுதி அறிக்கை தயார்! விரைவில் குற்றப்பத்திரிகை?

விசாரணையின்போது, தீபத்தூணில் தீபம் ஏற்றுவது தொடர்பான அனைத்து தரப்பினரின் வாதங்களையும் முழுமையாக கேட்ட பிறகே இறுதி முடிவு எடுக்கப்படும் என்று நீதிபதிகள் தெரிவித்தனர். மேலும், உயர் நீதிமன்றம் கடந்த ஜனவரி மாதமே உத்தரவு பிறப்பித்த நிலையில், அதற்கு எதிராக ஆறு மாதங்கள் கழித்து மேல்முறையீடு செய்தது ஏன் என்றும் தமிழக அரசிடம் நீதிபதிகள் கேள்வி எழுப்பினர்.

அத்துடன், தமிழக அரசின் மேல்முறையீட்டு மனுவுக்கு பதில் அளிக்க மனுதாரர் ராம ரவிக்குமார் மற்றும் மதுரை மாவட்ட ஆட்சியர் ஆகியோருக்கு நோட்டீஸ் அனுப்பவும் உச்சநீதிமன்றம் உத்தரவிட்டுள்ளது. இதனால், இந்த வழக்கின் அடுத்த கட்ட விசாரணை முக்கியத்துவம் பெற்றுள்ளது.

திருப்பரங்குன்றம் தீபத்தூண் விவகாரம் மத மற்றும் சட்ட ரீதியாக கவனம் பெற்றுள்ள நிலையில், உச்சநீதிமன்றத்தின் இந்த உத்தரவு வழக்கின் அடுத்தகட்ட விசாரணைக்கு முக்கிய திருப்பமாக பார்க்கப்படுகிறது.

இதையும் படிங்க: ஹப்பாடா! எ.வ. வேலுவுக்கு நிம்மதி... லுக் அவுட் நோட்டீஸ் ரத்து! தமிழக அரசின் மேல்முறையீடு தள்ளுபடி!