ராஜ்யசபா எம்.பி தேர்தல் அறிவிப்பு! திமுக, அதிமுகவுக்கு நெருக்கடி! கழுத்தை நெறிக்கும் கூட்டணி கட்சிகள்!!

தமிழக அரசியலில் புதிய சூடு ஏற்பட்டுள்ளது. தேர்தல் ஆணையம் 10 மாநிலங்களில் 37 ராஜ்யசபா எம்பி பதவிகளுக்கான தேர்தலை அறிவித்துள்ளது. இதில் தமிழகத்தின் 6 பதவிகளும் அடங்கும். இந்தத் தேர்தல் வரும் மார்ச் 16-ம் தேதி நடைபெறும். தற்போதைய எம்பிக்களின் பதவி ஏப்ரல் 2-ம் தேதியுடன் முடிவடைகிறது.

திமுகவைச் சேர்ந்த திருச்சி சிவா, என்.ஆர்.இளங்கோ, அந்தியூர் செல்வராஜ், கனிமொழி, என்விஎன் சோமு ஆகியோரும், அதிமுகவைச் சேர்ந்த தம்பித்துரை, தமாகாவின் ஜிகே வாசன் ஆகியோரும் இந்த 6 பதவிகளை வகித்து வருகின்றனர். தற்போதைய சட்டசபை உறுப்பினர்கள் எண்ணிக்கையின்படி, திமுகவுக்கு 4 இடங்களும், அதிமுக கூட்டணிக்கு 2 இடங்களும் கிடைக்க வாய்ப்புள்ளது.

தேர்தல் அட்டவணை: பிப்ரவரி 26-ம் தேதி வேட்பு மனு தாக்கல் தொடங்குகிறது. மார்ச் 5-ம் தேதி கடைசி நாள். மார்ச் 6-ம் தேதி மனுக்கள் பரிசீலனை. மார்ச் 9-ம் தேதி வாபஸ் பெற கடைசி நாள். மார்ச் 16-ம் தேதி காலை 9 மணி முதல் மாலை 4 மணி வரை ஓட்டுப்பதிவு. அதே நாள் மாலை 5 மணிக்கு ஓட்டு எண்ணிக்கை தொடங்கும்.

இதையும் படிங்க: விசாரணை இன்னும் முடியல!! டி.ஆர்.பாலுவை தொடரும் சிக்கல்!! சொல்லி அடிக்கும் அண்ணாமலை!

தமிழக சட்டசபை தேர்தல் ஏப்ரல் மாதத்தில் நடைபெற உள்ள நிலையில், இந்த ராஜ்யசபா தேர்தல் கூட்டணி பேச்சுவார்த்தைகளுக்கு பெரும் நெருக்கடியை ஏற்படுத்தியுள்ளது. திமுகவுடன் கூட்டணி பேசி வரும் காங்கிரஸ் கட்சி, ராஜ்யசபா சீட் உள்ளிட்ட பல கோரிக்கைகளை வலியுறுத்தி வருகிறது. அதிமுகவுடன் பேச்சு நடத்தும் தேமுதிக, அன்புமணி ராமதாஸ் தரப்பு ஆகியவையும் எம்பி பதவியை எதிர்பார்த்து நெருக்கடி கொடுக்கின்றன.

சட்டசபை தேர்தல் அறிவிப்பு விரைவில் வரும் என எதிர்பார்க்கப்படும் சூழலில், கூட்டணி உறுதிப்படுத்தல், சீட் பங்கீடு ஆகியவை இன்னும் முழுமையாக இறுதியாகவில்லை. இதனால் திமுக, அதிமுக இரு கட்சிகளுக்கும் அழுத்தம் அதிகரித்துள்ளது.

ராஜ்யசபா தேர்தல் முடிவுகள் கூட்டணி உறவுகளை பாதிக்குமா என்பது அரசியல் வட்டாரத்தில் பெரும் எதிர்பார்ப்பை ஏற்படுத்தியுள்ளது. தமிழக அரசியல் இனி சுவாரஸ்யமாக மாற உள்ளது.

இதையும் படிங்க: எனக்கு கடன் தந்தது என் மகனா? எனக்கே தெரியாதே?! அண்ணாமலை விசாரணையில் உளறிய பாலு! பகீர்!!