நாகரீக அரசியல் செய்யுறதா நினைச்சு நஷ்டப்படாதீங்க! திருமாவளவனுக்கு விசிக நிர்வாகிகள் அட்வைஸ்!

சென்னை: தமிழக அரசியலில் ஆட்சி அமைப்பு பேச்சுகள் தீவிரமடைந்துள்ள நிலையில், விடுதலை சிறுத்தைகள் கட்சி (வி.சி.க.) தலைவர் திருமாவளவனுக்கு கட்சி நிர்வாகிகள் பலரும் முக்கிய ஆலோசனை வழங்கியுள்ளனர். “நாகரிக அரசியல் செய்வதாக நினைத்து ஏமாறாமல், கிடைக்கும் வாய்ப்பை பயன்படுத்திக் கொள்ளுங்கள்” என அவர்கள் வலியுறுத்தியுள்ளனர்.

தி.மு.க. கூட்டணியில் திண்டிவனம் தொகுதியில் வன்னியரசு மட்டுமே வி.சி.க. சார்பில் வெற்றி பெற்றார். காட்டுமன்னார் கோவில் தொகுதியில் காங்கிரஸ் பின்னணியில் இருந்து வந்த ஜோதிமணி வி.சி.க. சார்பில் வெற்றி பெற்றுள்ளார். த.வெ.க.வுக்கு பெரும்பான்மை கிடைக்காததால், வி.சி.க.வின் ஆதரவை அது எதிர்பார்க்கிறது. இதுவரை விஜய், திருமாவளவனுடன் இரண்டு முறை தொலைபேசியில் பேசியுள்ளார்.

ஆனால் திருமாவளவன் முடிவெடுப்பதில் குழப்பத்தில் இருப்பதாகக் கூறப்படுகிறது. த.வெ.க.வுடன் கூட்டணி சேர்ந்தால் தி.மு.க. கட்சியை உடைக்க முயற்சிக்கும் என அவர் அஞ்சுவதாக தகவல்கள் வெளியாகியுள்ளன. தேர்தல் முடிந்த உடனே கூட்டணி மாறுவது நாகரிக அரசியலுக்கு உகந்ததல்ல என சிலர் அவரிடம் வாதிட்டுள்ளனர்.

இதையும் படிங்க: ஸ்டாலின் என்ன சொன்னார்..? விஜய்க்கு ஆதரவா..? திருமாவளவன் பேட்டி..!!

வி.சி.க. வட்டாரத்தில் நிர்வாகிகள் கூறுவதாவது: “கடந்த ஐந்து ஆண்டு தி.மு.க. ஆட்சியில் வி.சி.க.வினர் மீது மட்டும் அதிக வழக்குகள் பதிவு செய்யப்பட்டன. அதே குற்றங்களைச் செய்த ஆளும் கட்சியினர் மீது நடவடிக்கை எடுக்கப்படவில்லை. அமைச்சர்களிடம் பெரிய அளவில் எந்தப் பணியும் சாதிக்க முடியவில்லை. இப்போது த.வெ.க. தரப்பில் ஆட்சியில் பங்கு தருவதாக உறுதியளிக்கப்படுகிறது. இந்த வாய்ப்பு இனி எப்போது கிடைக்கும் எனத் தெரியாது. எனவே தயங்காமல் பயன்படுத்திக் கொள்ள வேண்டும்” என்றனர்.

மேலும், “கட்சியை உடைக்கும் துரோகிகளை தொண்டர்கள் ஒருபோதும் ஏற்றுக்கொள்ள மாட்டார்கள்” என திருமாவளவனுக்கு தெளிவாக எடுத்துரைக்கப்பட்டுள்ளது. த.வெ.க.வுடன் இணைந்தால் ஆட்சியில் பங்கு கிடைக்கும் வாய்ப்பு இருப்பதால், அதை நழுவவிடக் கூடாது என கட்சியினர் வலியுறுத்தி வருகின்றனர்.

தமிழக அரசியல் தற்போது முக்கிய திருப்புமுனையில் உள்ளது. வி.சி.க.வின் முடிவு ஆட்சி அமைப்பில் முக்கிய பங்கு வகிக்கும் என எதிர்பார்க்கப்படுகிறது. திருமாவளவன் அடுத்த சில நாட்களில் இறுதி முடிவை அறிவிப்பார் என கட்சி வட்டாரங்கள் தெரிவிக்கின்றன. 

இதையும் படிங்க: ஆட்சி அமைக்க அனுமதியுங்கள்!! விஜய்க்கு பெருகும் ஆதரவு!! கவர்னருக்கு வலுக்கும் கண்டனம்!