எம்.பி சீட்டுக்கு அடம்பிடிக்கும் டிடிவி! அமித்ஷா கொடுக்கும் ஆஃபர்! அமமுகவுக்கு இவ்வளவு தான்! முடிந்தது தொகுதி பங்கீடு!

தமிழக சட்டமன்றத் தேர்தல் 2026-க்கு இன்னும் ஒரு மாதமே உள்ள நிலையில், என்டிஏ கூட்டணியில் இணைந்துள்ள அமமுக (அம்மா மக்கள் முன்னேற்றக் கழகம்) தரப்புக்கு 7 தொகுதிகள் வரை மட்டுமே ஒதுக்கீடு செய்ய முடிவு எடுக்கப்பட்டுள்ளது. அமமுக பொதுச்செயலாளர் டிடிவி தினகரன் இரட்டை இலக்கத்தில் (10 அல்லது அதற்கு மேற்பட்ட) தொகுதிகளை எதிர்பார்த்த நிலையில், இந்த ஒதுக்கீடு குறைவாக இருப்பதால் அவர் கடும் அதிருப்தி அடைந்துள்ளார். 

தொகுதிகள் குறைந்தாலும் ராஜ்யசபா எம்பி சீட் வழங்க வேண்டும் என்று அவர் பிடிவாதமாக கோரியுள்ளார். இறுதியாக மத்திய அமைச்சர் பியூஷ் கோயல் இதற்கு பாசிட்டிவ் சிக்னல் கொடுத்த பின்னரே தினகரன் கூட்டணியை முழுமையாக ஏற்றுக்கொண்டதாக தகவல்கள் வெளியாகியுள்ளன.

அமமுக என்டிஏ கூட்டணியில் இணைந்த பின்னர், தென் மாவட்டங்களில் முக்குலத்தோர் வாக்கு வங்கி அதிமுகவுக்கு கிடைக்கும் என எதிர்பார்க்கப்படுகிறது. டெல்டா மாவட்டங்கள், மதுரை, சிவகங்கை உள்ளிட்ட பகுதிகளில் இது பெரும் பூஸ்ட்டாக அமையும். 

இதையும் படிங்க: சட்டசபை தேர்தலில் டிடிவி போட்டியில்லை?! எம்.பி சீட்டுக்கு குறி வைக்கும் தினகரன்?! அமித்ஷா பதில் என்ன?

என்டிஏ பொதுக்கூட்டத்தில் தினகரன் எடப்பாடி பழனிசாமியை "அண்ணன்" என்று அழைத்தார். அதற்கு பதிலாக எடப்பாடி பழனிசாமி தினகரனை "சகோதரர்" என்று குறிப்பிட்டு, இது பங்காளி சண்டை மட்டுமே என்று தெளிவுபடுத்தினார். இருவரும் இணைந்து செய்தியாளர்களை சந்தித்தது கூட்டணியின் வலிமையை வெளிப்படுத்தியது.

ஆனால் தொகுதி பங்கீடு விவகாரத்தில் எடப்பாடி பழனிசாமி கடுமையான நிலைப்பாட்டில் உள்ளார். பாஜகவுக்கு மொத்த தொகுதிகளை ஒதுக்கிய பின்னர், உள் ஒதுக்கீடாக பாஜக மூலம் அமமுகவுக்கு பிரித்துக் கொடுக்கும் முடிவு எடுக்கப்பட்டுள்ளது. 

இதனால் தினகரன் மத்திய அமைச்சர் பியூஷ் கோயலை சந்தித்து கூட்டணியை உறுதிப்படுத்தினார். அமித் ஷா நேரடியாக ஒற்றை இலக்கத்தில் (single digit) தொகுதிகள் மட்டுமே இருக்கும் என்று தெளிவாக கூறியதால், தினகரன் ராஜ்யசபா சீட்டை மாற்றாக கோரியுள்ளார்.

ஆண்டிபட்டி தொகுதியில் தினகரன் போட்டியிடுவது சந்தேகம் என்றும், அவரது மனைவியை களமிறக்கலாம் என்றும் அமமுக வட்டாரங்களில் பேச்சு எழுந்துள்ளது. தினகரனின் இந்த முடிவு அவரது ஆதரவாளர்களிடையே கலக்கத்தை ஏற்படுத்தியுள்ளது. 

ராஜ்யசபா எம்பி ஆகும் வாய்ப்பு அதிகரித்துள்ள நிலையில், தேர்தல் களத்தில் அமமுகவின் பங்கு எப்படி இருக்கும் என்பது அடுத்த சில வாரங்களில் தெளிவாகும். என்டிஏ கூட்டணியின் இந்த இணைப்பு திமுகவுக்கு பெரும் சவாலாக அமையும் என அரசியல் விமர்சகர்கள் கருதுகின்றனர்.

இதையும் படிங்க: அதிமுக - அமமுக இணைப்பின் பின்னணியில் RSS! சக்சஸில் முடிந்த ஆபரேஷன்!!