முதல்வர் விஜயின் கேரளா பயணம் திடீர் ரத்து.! வானிலையால் ஹெலிகாப்டர் இயக்க முடியாத நிலை..!!

தமிழக முதலமைச்சர் ஜோசப் விஜய்யின் கேரளா பயணம் இன்று திடீரென ரத்து செய்யப்பட்டது. கோவையில் பெய்த பலத்த மழையும் மோசமான வானிலையும் இதற்கு முக்கிய காரணமாக அமைந்தன. முதல்வராகப் பொறுப்பேற்ற பிறகு கேரளாவுக்கு அவர் மேற்கொள்ள இருந்த முதல் அதிகாரப்பூர்வப் பயணம் இதுவாக இருந்தது. ஆனால் வானிலை நிலைமைகள் அவரது திட்டங்களை முழுமையாக மாற்றிவிட்டன.

இன்று காலை முதல்வர் விஜய் சென்னையிலிருந்து தனி விமானம் மூலம் கோவை விமான நிலையத்தை அடைந்தார். அங்கிருந்து சாலை மார்க்கமாக காந்திபுரம் பகுதிக்குச் சென்றார். வழிநெடுகிலும் தவெக தொண்டர்கள், ஆதரவாளர்கள் மற்றும் பொதுமக்கள் அவருக்கு உற்சாக வரவேற்பு அளித்தனர். பல்வேறு இடங்களில் சாலை வலம் மேற்கொண்ட முதல்வரை மக்கள் ஆர்வத்துடன் வரவேற்றனர்.காந்திபுரம் பேருந்து நிலையம் அருகே சுமார் ஏழு ஏக்கர் பரப்பளவில் ரூ.300 கோடி செலவில் கட்டப்பட்ட பெரியார் அறிவுலகம் மற்றும் ஆராய்ச்சி மையத்தை முதல்வர் விஜய் திறந்து வைத்தார்.

ஏழு முதல் எட்டு தளங்களுடன் நவீன வசதிகளுடன் அமைக்கப்பட்ட இந்த மையத்தில் ஒரு லட்சத்துக்கும் மேற்பட்ட புத்தகங்கள், ஆராய்ச்சி வசதிகள், அறிவியல் பூங்கா, கோளரங்கம் மற்றும் போட்டித் தேர்வுகளுக்கான பயிற்சி அறைகள் உள்ளன. முதல்வர் பெரியார் சிலையைத் திறந்து வைத்தார். கல்வெட்டைத் திறந்து அந்த இடத்தை பார்வையிட்டார். இதையடுத்து அரசு விழாவில் ரூ.408 கோடி மதிப்பிலான 89 முடிவுற்ற பணிகளைத் தொடங்கி வைத்தார். ரூ.34.72 கோடி மதிப்பில் 9,343 பயனாளிகளுக்கு நலத்திட்ட உதவிகளை வழங்கினார். மேலும் ரூ.32.32 கோடி மதிப்பில் 144 புதிய திட்டங்களுக்கு அடிக்கல் நாட்டினார்.இந்த நிகழ்ச்சிகள் முடிந்ததும் கோவையிலிருந்து ஹெலிகாப்டர் மூலம் கேரள மாநிலம் திருச்சூருக்குச் செல்ல முதல்வர் திட்டமிட்டிருந்தார். திருச்சூரில் பிரபல தொழில்முனைவோர் டி.எஸ். கல்யாணராமனின் இல்லத்தில் நடைபெறும் நவராத்திரி விழாவில் சிறப்பு விருந்தினராகப் பங்கேற்க இருந்தார்.

இதையும் படிங்க: எல் நினோ தீவன மானியம் விரைவில் கிடைக்கும்.. அமைச்சர் விஜயலட்சுமி  உறுதி!

அந்த விழாவில் பல்வேறு பிரபலங்களும் கலந்துகொள்ள இருந்தனர். பயணத்தின் இடையே குருவாயூர் ஸ்ரீகிருஷ்ணன் கோவிலில் தரிசனம் செய்ய வாய்ப்பு இருந்ததாகவும் தெரிகிறது. ஹெலிகாப்டர் தயார் நிலையில் வைக்கப்பட்டிருந்தது.ஆனால் கோவையில் பலத்த மழை தொடர்ந்து பெய்தது. வானிலை மையம் மாலை நான்கு மணி வரை மழை தொடரும் என அறிவித்திருந்தது. திருச்சூர் பகுதியிலும் கனமழை எச்சரிக்கை விடுக்கப்பட்டிருந்தது. மோசமான வானிலை காரணமாக ஹெலிகாப்டர் இயக்க முடியாத நிலை ஏற்பட்டது. பாதுகாப்பு காரணங்களால் முதல்வரின் கேரளப் பயணம் உடனடியாக ரத்து செய்யப்பட்டது. அதன்பிறகு பிற்பகல் 3.30 மணிக்கு சிறப்பு விமானம் மூலம் அவர் சென்னைக்குத் திரும்பும் வகையில் திட்டம் மாற்றப்பட்டது.இந்தப் பயணம் ரத்து செய்யப்பட்டது பலருக்கு ஏமாற்றத்தை ஏற்படுத்தியது. 

இதையும் படிங்க: சிக்கலில் சி.டி.ஆர்... செம்ம டென்ஷனில் விஜய்... மக்களிடம் டோட்டலாக டேமேஜ் ஆன தவெக இமேஜ்...!