சன்ன ரகப் பொன்னி டெண்டர் விட்டதே தெரியலையே? ரேஷன் அரிசி பாலிஷ் செய்து விற்பனையா? உதயநிதி கேள்வி!

தமிழகத்தில் கூட்டுறவு அங்காடிகள் மூலம் கிலோ ரூ.30-க்கு விற்பனை செய்யப்படும் சன்னரகப் பொன்னி அரிசி தொடர்பாக எதிர்க்கட்சித் தலைவர் உதயநிதி ஸ்டாலின் கேள்விகளை எழுப்பியுள்ளார்.

ரேஷன் அரிசியை பாலிஷ் செய்து பொன்னி அரிசி என்ற பெயரில் விற்பனை செய்வதாகப் பொதுமக்கள் புகார் தெரிவிப்பதாகக் குறிப்பிட்டுள்ள அவர், அரிசி கொள்முதல் செய்யப்பட்ட விதம், ஒப்பந்தம் எடுத்த நிறுவனங்கள் மற்றும் அரசு வழங்கும் மானியம் குறித்த விவரங்களை வெளியிட வேண்டும் என வலியுறுத்தியுள்ளார்.

ரூ.30 அரிசியில் என்ன சர்ச்சை?

அரிசி விலை உயர்வால் பாதிக்கப்படும் மக்களுக்கு உதவும் வகையில், கூட்டுறவு அங்காடிகளில் சன்னரகப் பொன்னி அரிசி கிலோ ரூ.30-க்கு விற்பனை செய்யப்படும் என அரசு அறிவித்ததாக உதயநிதி ஸ்டாலின் தெரிவித்துள்ளார்.

இதையும் படிங்க: சென்னை மழை பாதிப்புக்கு நடுவே துபாய் பயணம் ஏன்? உதயநிதியை சுற்றும் புதிய சர்ச்சை!

ஆனால், இந்த அரிசியை வாங்குவதற்காக ரேஷன் கடைகளுக்குச் செல்லும் பொதுமக்களுக்கு வழக்கமாக வழங்கப்படும் இலவச அரிசியைப் பாலிஷ் செய்து பொன்னி அரிசி என்ற பெயரில் விற்பனை செய்வதாகப் புகார்கள் எழுந்துள்ளதாக அவர் குற்றஞ்சாட்டியுள்ளார். சில இடங்களில் அரிசியின் தரம் குறித்து அதிருப்தி தெரிவித்து, வாங்கிய அரிசியைப் பொதுமக்கள் திருப்பிக் கொடுத்து வருவதாகவும் அவர் குறிப்பிட்டுள்ளார்.

தேனி மாவட்டம் கம்பத்தில் பாலிஷ் செய்யப்பட்ட அரிசி வழங்கப்பட்டதாகக் கூறி, தமிழக வெற்றிக் கழக சட்டமன்ற உறுப்பினரிடம் பொதுமக்கள் கேள்வி எழுப்பிய சம்பவத்தையும் அவர் தனது பதிவில் சுட்டிக்காட்டியுள்ளார்.

2.28 கோடி குடும்ப அட்டைகள்; 250 இடங்களில் மட்டுமா?

தமிழகத்தில் சுமார் 2 கோடியே 28 லட்சம் குடும்ப அட்டைகள் உள்ள நிலையில், சன்னரகப் பொன்னி அரிசி 250 இடங்களில் மட்டுமே விநியோகிக்கப்படுவதாகவும், ஒரு குடும்பத்திற்கு 5 கிலோ மட்டுமே வழங்கப்படுவதாகவும் உதயநிதி ஸ்டாலின் தெரிவித்துள்ளார். இந்த விநியோக முறையின் பின்னணி குறித்தும் கேள்வி எழுப்பியுள்ளார்.

டெண்டர் விட்டதா அரசு?

கடந்த 2007ஆம் ஆண்டு அத்தியாவசியப் பொருட்களின் விலை உயர்ந்தபோது, அப்போதைய முதல்வர் கருணாநிதி சிறப்பு பொதுவிநியோகத் திட்டத்தைச் செயல்படுத்தி, பாமாயில், துவரம் பருப்பு, உளுத்தம் பருப்பு உள்ளிட்ட பொருட்களை மானிய விலையில் வழங்க நடவடிக்கை எடுத்ததாக உதயநிதி ஸ்டாலின் குறிப்பிட்டுள்ளார்.

தற்போது சன்னரகப் பொன்னி அரிசியைக் கொள்முதல் செய்வதற்கு அரசு எப்போது டெண்டர் வெளியிட்டது, ஒப்பந்தத்தைப் பெற்ற நிறுவனங்கள் எவை, அந்த நிறுவனங்களிடம் இருந்து என்ன விலைக்கு அரிசி வாங்கப்பட்டது, பொதுமக்களுக்கு எவ்வளவு மானியத்தில் விற்பனை செய்யப்படுகிறது என அவர் கேள்வி எழுப்பியுள்ளார்.

இந்த விவகாரத்தில் கொள்முதல் விலை, ஒப்பந்த நிறுவனங்கள் மற்றும் மானிய விவரங்களை வெளிப்படையாக வெளியிட வேண்டும் என்றும், பொதுமக்களின் புகார்களுக்கு அரசு உரிய விளக்கம் அளிக்க வேண்டும் என்றும் தனது எக்ஸ் தளப் பதிவில் வலியுறுத்தியுள்ளார்.

அரிசியின் தரம் தொடர்பான புகார்கள் மற்றும் கொள்முதல் நடைமுறைகள் குறித்து அரசு தரப்பின் விளக்கமும், சம்பந்தப்பட்ட அதிகாரிகளின் தகவல்களும் இந்த விவகாரத்தில் முக்கியத்துவம் பெறுகின்றன.

இதையும் படிங்க: சென்னையில் இளைஞர்கள் கைது! பயந்து நடுங்குகிறார் முதலமைச்சர் விஜய்?! தவெக அரசை விளாசிய உதயநிதி ஸ்டாலின்!