உதயநிதி ஆப்செண்ட்!! ஸ்டாலின் அப்செட்! அண்ணா நினைவு தின நிகழ்ச்சியில் சலசலப்பு!

சென்னையில் நேற்று நடைபெற்ற பேரறிஞர் அண்ணாதுரையின் நினைவு தின நிகழ்ச்சிகளில் துணை முதல்வர் உதயநிதி ஸ்டாலின் பங்கேற்காதது திமுகவில் பெரும் சலசலப்பை ஏற்படுத்தியுள்ளது. கட்சி நிறுவனரான அண்ணாதுரையின் நினைவு தினத்தில் உதயநிதி இல்லாதது குறித்து கட்சி வட்டாரங்களில் பல்வேறு கேள்விகள் எழுந்துள்ளன.

மறைந்த முன்னாள் முதல்வர் அண்ணாதுரையின் 57-வது நினைவு தினம் நேற்று அனுஷ்டிக்கப்பட்டது. முதல்வர் மு.க.ஸ்டாலின் தலைமையில் திமுகவினர் சென்னையில் அமைதி பேரணியாக சென்றனர். அண்ணா சிலை அருகில் தொடங்கிய பேரணி அண்ணா நினைவிடம் வரை சென்றது. பேரணி முடிவில் முதல்வர் ஸ்டாலின் மலர் தூவி மரியாதை செலுத்தினார். அமைச்சர்கள், எம்எல்ஏக்கள், கட்சி நிர்வாகிகள் உள்ளிட்டோர் பங்கேற்றனர்.

ஆனால் இந்நிகழ்வில் துணை முதல்வர் உதயநிதி ஸ்டாலின் பங்கேற்கவில்லை. அதேபோல் திருவல்லிக்கேணி பார்த்தசாரதி கோவிலில் மதியம் நடைபெற்ற சமபந்தி விருந்திலும் உதயநிதி கலந்து கொள்ளவில்லை. இந்த இரு நிகழ்ச்சிகளுக்கும் அவர் வருவார் என்று முன்கூட்டியே அறிவிக்கப்பட்டிருந்தது.

இதையும் படிங்க: திமுக அமைச்சர்களுக்கு அண்ணாதுரையை தெரியாது! விஜயிடம் என்ஜினே இல்லை!! அதிரடி காட்டிய அண்ணாமலை!

திமுக வட்டாரங்கள் கூறுவது: காலை 7:30 மணிக்கு பேரணி தொடங்கும் என்று கட்சி தலைமை அறிவித்தது. காலை 7:45 மணிக்கு முதல்வர் ஸ்டாலின் பேரணி தொடக்க இடத்துக்கு வந்தார். அமைச்சர்கள் பலரும் இருந்தனர். ஆனால் உதயநிதி வரவில்லை. சமபந்தி விருந்துக்கும் அவர் வராதது கட்சியினரிடையே ஆச்சரியத்தை ஏற்படுத்தியது.

உதயநிதி காலை 10:23 மணிக்கும், 11:18 மணிக்கும் அண்ணாதுரை குறித்து சமூக வலைதளத்தில் இரு அறிக்கைகள் வெளியிட்டார். ஆனால் நேரடியாக நிகழ்ச்சிகளில் பங்கேற்காதது ஏன் என்ற கேள்வி எழுந்துள்ளது. இதனால் முதல்வர் ஸ்டாலின் 'அப்செட்' ஆகியுள்ளதாகவும், கட்சியில் சலசலப்பு ஏற்பட்டுள்ளதாகவும் வட்டாரங்கள் தெரிவிக்கின்றன.

அண்ணாதுரை திமுகவை நிறுவியவர். அவரது நினைவு தினம் கட்சிக்கு மிக முக்கியமான நாள். ஒவ்வொரு ஆண்டும் முதல்வர் தலைமையில் பிரம்மாண்ட பேரணி, மரியாதை நிகழ்ச்சிகள் நடைபெறும். துணை முதல்வர் பதவியில் இருக்கும் உதயநிதி இந்த நிகழ்ச்சிகளை தவறவிட்டது கட்சி தொண்டர்களிடையே ஏமாற்றத்தை ஏற்படுத்தியுள்ளது.

இந்த சம்பவம் திமுகவின் உள் இயக்கங்களில் புதிய விவாதங்களை தூண்டியுள்ளது. உதயநிதி ஏன் பங்கேற்கவில்லை என்பது குறித்து அதிகாரப்பூர்வ அறிவிப்பு இல்லை. ஆனால் கட்சி வட்டாரங்களில் பல்வேறு ஊகங்கள் நிலவுகின்றன. தேர்தல் நெருங்கும் நிலையில் இது போன்ற சலசலப்புகள் கட்சியின் ஒற்றுமையை பாதிக்குமா என்பதும் கவனத்தை ஈர்த்துள்ளது. 

இதையும் படிங்க: எவ்வளவு விமர்சனம் வச்சாலும் நாங்கதான் ஜெயிப்போம்! விஜய் சொன்ன திமுக குறள்!! அன்பில் மகேஷ் விளக்கம்!